Khomotšo go tšwa Lentšung – Letšatši 5

₁Modimo, o Modimo wa ka,

mme ke go hlologetše;

ke go hlologetše ka pelo ya ka ka moka.

Ke go nyoretšwe bjalo ka motho a nyorilwe nageng ye e omilego ya lehwafa, ya go hloka meetse.

₂Ke nyaka go go bona ka Tempeleng ya gago ye kgethwa,

go bona maatla le letago la gago.

₃Lerato la gago, kilaphetogo,

le phala le bjona bophelo,

ka gona ke tla go tumiša.

₄Ke tla go reta ka mehla ge ke sa phela;

ke tla emiša diatla ke go tumiša.

₅Pelo ya ka e tla ipshina

bjalo ka ya motho yo a khošego tša monyanya,

mme ka go reta ka mekgolokwane.

₆Ge ke patlame malaong ke a go gopola;

bošego bjohle ke lala ke nagana ka wena,

₇gobane o nthušitše ka mehla.

Ke tla goa ke thabile ke šireleditšwe ke wena.

₈Ke a go kgomarela,

mme wena o nthekga ka letsogo la gago le le tiilego.

₁Yo a lego ka lehwafeng la Ramadulagodimo,

a dulago a šireleditšwe ke Ramaatlaohle,

₂a ka re go yena:

“Ke wena setšhabelo sa ka le sebo sa ka;

o Modimo yo ke mmotilego.”

₃Gobane ke yena a go phefišago mereo ya barei le malwetši a mašoro.

₄O go šireletša ka diphego tša gagwe;

o bolokega ge o hlokometšwe ke yena.

O botegela go go šireletša le go go phemela.

₅O ka se boife dikotsi tša bošego,

goba go hlaselwa mosegare,

₆le ge e le mauba a a welago batho bošego,

goba malwetši a a bolayago mosegare.

₁₅Ge a nthapela ke tla mo kwa;

ge a le mathateng ke tla ba le yena.

Ke tla mo hlakodiša, ka mo hlompha.

₁Ke rata Tempele ya gago bjang,

wena Modimo Ramaatlaohle!

₂Ke a duma ebile ke hlologetše kudu

go ba ka kgorong ya Tempele ya Morena.

Ke hlabela Modimo yo a phelago mekgolokwane ka pelo ya ka ka moka.

₃Ešita le diphorogohlo di agile dihlaga,

le dipeolane di na le magae;

di fepa mafotwana a tšona ka go ona kgauswi le dialetare tša gago,

wena, Morena Ramaatlaohle,

Kgoši ya ka le Modimo wa ka.

₄Go lehlogonolo ba ba phelago Tempeleng ya gago;

ba ba dulago ba go reta gona. Sela

₁₁Morena ke Mophediši le Mošireletši wa rena;

o a re gaugela,

a dira gore re hlomphege.

Badiraboloki ga a ba kone tše botse.

₁₂Modimo Ramaatlaohle,

go lehlogonolo bao ba go botago!

₁Ke lelalela kua dithabeng;

ke botile go thušwa ke mang?

₂Ke botile go thušwa ke Morena,

Mohlodi wa legodimo le lefase.

₃A ka se go lese o kgopša;

Mošireletši wa gago ga a potume.

₄Ee, Mošireletši wa Israele ga a potume,

le gona ga a robale.

₅Morena ke Mošireletši wa gago;

o šika le wena go go leta.

₆Letšatši le ka se go dire selo mosegare,

le ge e le wona ngwedi bošego.

₇Morena o tla go šireletša kotsing tšohle,

o tla šireletša bowena bja gago ka moka.

₈O tla go šireletša mayong le maboong a gago,

gonabjale le go ya go ile.

₁Ke mo gobotse go go leboga, Morena,

le go go opelela ditumišo,

wena Ragodimodimo,

₂le go bega leratorato la gago e sa le gosasa,

le go anega potego ya gago bošego ka moka

₃ke letša harepa,

harepa ya metato ye lesome,

ke letša le sekgapa.

₄Gobane wena, Morena,

o nthakgaditše ka ditiro tša gago;

ke hlalalela tše o di dirilego.

₅Morena,

mediro ya gago ke ye megolo bjang!

Menagano ya gago ga se ka go iša.

₆Tšeo ke tše mašilo a sa di tsebego;

ditlaela ga di di kwešiše.

₇Le ge bakgopo ba hloga bjalo ka sekoro,

le badiradibe ka moka ba atlega,

sa bona ke go tlo fedišetšwa sa ruri.

₈Eupša wena, Morena,

o yo o phagamego go ya go ile.

Bona manaba a gago, Morena!

₉Ka kgonthe manaba a gago a a hwa;

badirakgopo bohle ba a phatlalatšwa.

₁₀Nnaena o mphile maatla a nkego a nare;

o nthakgaditše gape.

₁₁Manaba a ka ke a lebelela ka lenyatšo.

Badirakgopo ba go ntakana ke ba kwele.

₁₂Baloki bona ba tla atlega boka mepalema;

ba tla letla bjalo ka mesedere ya Lebanone.

₁₃Ba tsemilwe ka ntlong ya Morena,

ba tla atlega dikgorong tša Tempele ya Modimo wa rena.

₁₄Le ge e šetše e le diputswa,

ba tla no fela ba tiile,

ba le bjalo ka mehlare ye metala.

₁₅Seo e tla ba sešupo sa go loka ga Morena.

Ke yena sebo sa ka,

gomme mo go yena ga go bokgopo.

₁A go tumišwe Morena,

yena setšhabelo sa ka,

yena a nthutago go lwa ntwa,

yena a ntlwaetšago go hlabana.

₂Ke yena mošireletši wa ka le sebo sa ka;

ke botšhabelo bja ka le mophološi wa ka;

ke kotse ya ka, ke sefahlelo sa ka;

o mpea mmuši wa ditšhaba.

₃Morena, motho ke selomang,

ge o bile o mo šetša;

ke ra motho wa nama,

ge o bile o mo ela hloko?

₄Gape motho ga se selo;

nako ya gagwe e feta bjalo ka moriti.

₅Morena, sekamiša legodimo,

o theogele fase;

kgwatha dithaba, di tupe muši.

₆Gadimiša magadima,

o šwalalanye manaba;

betša mesebe ya gago,

ba hlanole direthe.

₇Otlolla diatla o le moo godimo,

o nkinole bodibeng, o mphološe;

ntlhakodiše dinaleng tša bašele,

₈bona ba go dula ba bolela maaka,

ba a bolela le ka go ikana.

₉Modimo, a ke go opelele sefela se sefsa,

ke go opelele ke letša harepa ya metato ye lesome,

_10-11wena o kgontšhago magoši go fenya,

wena Mohlakodiši wa Dafida,

mohlanka wa gago.

Mphološe go bakgopo ba ba nyakago go mpolaya;

ntlhakodiše dinaleng tša bašele,

bona ba go dula ba bolela maaka,

ba a bolela le ka go ikana.

₁₂A barwa ba rena ba godišwe bjalo ka dimelana tše di nošetšwago;

barwedi ba rena ba etše dikokwane tša dikhutlo

tše di kgabišitšwego ka meseto,

tše di thekgilego ntlo ya mošate.

₁₃A matlolo a rena a tlale dijo tša mehutahuta,

dihuswane tša rena di tswale ka diketekete kua mafulong a gaborena.

₁₄A dikgomo tša rena di none,

le rena re se hlaselwe ra išwa bothopša.

A go hlokege sello mapatlelong a rena.

₁₅Go lehlogonolo tšhaba se se šegofatšwago bjalo;

go lehlogonolo tšhaba seo Morena

e lego yena Modimo wa sona.

₅O ntikaneditše ka gohle;

o mpontšha gore ke nna wa gago.

₆Go kwešiša taba ye go a mpalela,

go šita tlhaologanyo ya ka.

₇Na nka go tšhabela kae?

Ke kae mo nka go khutelago gona?

₈Ge nka rotogela legodimong,

ke yo hwetša o le gona;

ge nka yo patlama bodulabahu,

o tla be o le gona kua.

₉Ge nka fofela kua bohlabatšatši,

goba ka yo dula ka mafelelong a bodikelatšatši,

₁₀le gona moo o tla ntlhahla ka seatla sa gago,

o tla ntshwara ka seatla sa la go ja.