Mathomo a maswa – Letšatši la 16

A re re o phahla kuranta mesong ya gosasa gomme o hwetša athekele ye e tsebišago maloko a setšhaba gore o hlokafetše bošego bja go feta. Ka ntle le go makala le letšhogo la pele, naa o ka ikgantšha ka seo o tlago se bala athekeleng?

Tše di ngwetšwego ka godimo di ka kwagala e le bošilo, eupša seo ke se se diregilego go Alfred mathomong a ngwagakgolo wa 20. Ka go makala, a bala hlogo ya athekele makga a mmalwa: Kgoši ya Dithuthupi e hlokafetše. Gomme, ka athekeleng ka moka, mongwadi o be a mmitša “morekiši wa lehu” ka ge a hlamile tanamaite, yeo e šomišwago go tšweletša le go aba dibetša tše ntši tše kotsi. Alfred o maketše kudukudu ge a lemoga gore mongwadi a ka ba a nepile. Le ge go le bjalo, naa o be a nyaka go tsebja bjalo ka “morekiši wa lehu”? Aowa!

Ka nako yeo, Alfred o lemogile gore o be a fiwa monyetla wa bobedi – go ngwala leswa pego ya lehu la gagwe ya nako ye e tlago kuranteng. Morago ga go rapela kudu, a lemoga maatla a phodišo a Jesu Kriste, mola pelong ya gagwe go bile le tlhoko ya go ka dira se sengwe go ka dira phapano maphelong a batho.

Bophlong bja gagwe ka moka, Alfred Nobel o feditše nako ya gagwe, maatla le tšhelete a kgothaletša khutšo magareng ga dihlopha tše di lwago. Ka lehu la gagwe (le go fihla lehono), Alfred Nobel ga a gopolwe ka go hlama ga gagwe dithuthupi, go swana le ge e le mothomi wa Sefoka sa Khutšo sa Nobel.

E re ke go botšiše gape: naa o tla ikgantšha ka pego ya gago ya lehu kuranteng ge o ka hlokafala lehono? Naa o hloka go fetoša dilo tše mmalwa bophelong bja gago? Theeletša gape go mantšu a Kutollo 21:5: “Yo a dutšego setulong sa bogoši a re: ‘Bona, dilo tšohle ke di dira tše mpsha!’ ”

Modimo ke Modimo wa menyetla ya bobedi. O dirile Saulo, Paulose gomme Simone a mo dira Petrose. O šomišitše segwebakathobalo, Rahaba, go thuša dihlodi tša Baisraele go tšhaba Jeriko. Go swana le Alfred Nobel, o fiwa monyetla wa bobedi go fetoša mantšu leswikeng la gago la segopotšo. Naa o tla o gomarela monyetla wo? Modimo a go šegofatše.