Mathomo a maswa – Letšatši la 3

Setsopola sa go tsebega se balega ka tsela ye: “Motho yo a palelago ke go rulaganya, o rulaganya go palela.” Ka ntle le ditebanyo tše di hlakilego, re ba bjalo ka motho yo a tsenago ka koloing ya gagwe gomme a sa tsebe mo a yago. Go sa šetšwe gore koloi ke a botse bjang le gore e kitima ka lebelo le le bjang, ka ntle le boyo, thanka ya koloi e tla felelwa ka makhura gomme motho yoo o tla be a se a fihla mo a yago gona.

Nagana moo o nyakago go ba gona nakong ya ngwaga. Naa o nyaka mošomo o mokaone? O nyaka go fokotša mmele wa gago, o ye mošamawatle goba o be le tswalano ye kaone le lapa la gago goba le bašomi-gotee ba gago? Eya pele, nagana nakwana. O nyaka go ba kae?

Ekaba o a lemoga gore ka tsela ye o dirago ka yona lehono le letšatši le lengwe le le lengwe lenyaga, go tla bontšha ka fao o lego kgole goba kgauswi ka gona le ditebanyo tša gago mathomong a išago? Mo ke dintlha tše pedi tše di ka go thušago gore o thome go rulaganya ditebanyo tša gago mathomong a ngwaga o moswa:

NTLHA YA 1: KGOPELA BOHLALE GO MODIMO

Go Diema 16:9 re bala gore: “Motho a ka itherela boyo, fela ke Morena yo a mo etetšago.” Pele o ngwala ditebanyo tša gago fase, kgopela Moya wo Mokgethwa go go hlahla. Kgopela Modimo go go laetša ka go lebanya seo a go rulagantšego go go direla sona lenyaga.

NTLHA YA 2: LEBANYA

Rulaganya ditebanyo tša gago tša ngwaga, eupša di rulaganye go ya le ka ditebanyo tša kgwedi le kgwedi gaešita tša beke le beke. Ditebanyo tše nnyane di dira gore go be bonolo go fihlelela ditebanyo tše kgolo. Mo ke magoro a šupa go ka thoma ka wona:

1. 1.Mošomo (Ke eng seo ke nyakago go se fihlelela mošomong lenyaga?)
2. 2.Tša leago (Ke mang yo ke hlokago go mo etela gantši? Naa go na le yo mongwe wa bagwera ba gago yo o hlokago ke go mo rapelela?)
3. 3.Ditšhelete (Dira sephetho sa gore o tla lefela bokae go tšwa go moputso wa gago go dikarolo tša lesome, go tšhelete ye o e bolokago goba go neela badiidi)
4. 4.Tswalano le Modimo (Dira sephetho sa gore ke nako efe ya letšatši ye o tla e fetšago o na le Modimo – go fa mohlala, seripa sa iri pele o thoma go šoma goba nakong ya dijo tša matena?)
5. 5.Lapa (Dira sephetho sa go rapelela lapa la gago le go dira maiteko a go kgokagana le bona le go ba etela kgafetšakgafetša)
6. 6.Tša maphelo (Dira sephetho sa go ja dijo tša phepo le go itšhidulla gantši)
7. 7.Ditoro (Dira sephetho sa go thala mothaladi go kgabaganya bonnyane e tee ya “dilo tša gago tše dintši tše o nyakago go di dira”!)

Gopola, o ka no se lahlegelwe ke dikilokramo tše 10 bekeng ya pele, wa kitima lebelo la dikilometara tše 10 kgweding ya pele goba wa kgona go kgotlelela mošomi-gotee ofising ya gago. Le ge go le bjalo, ka go ikgala, boikgafo bjo bonnyane le go rapela kudu, o tla hwetša go e ba bonolo gore “aowa” go malekere, wa thoma go itšhidulla ka ntle le go nganga mošifa gomme gaešita le go hwetša segwera sa go ikgetha le motho wa go hloka botho yo šommego le yena. Tšea kgato ya pele lehono gomme go tseba mang, mohlomongwe lenyaga e tla ba ngwaga wa gago wo mokaonekaone go fihla bjale! Modimo a go šegofatše.