Mathomo a maswa – Letšatši la 6

Morago ga boineelo bja letšatši la 4, moo ke boletšego ka bohlokwa bja go ba le tumelo go dikholofetšo tša Modimo, babadi ba mmalwa ba mpotšišitše gore ba ka di tseba bjang dikholofetšo tša Modimo ka maphelo a bona.

Pele re bolela ka dikholofetšo, e re ke le gopotše ka mantšu go 2 Timotheose 3:16-17: “Mangwalo a Makgethwa ka moka a ngwadilwe ka go huetšwa ke Modimo, gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo, gore motho yo a ineetšego Modimo e be yo a kgonago gape a loketšego go dira mediro yohle ye mebotse.”

Lentšu la Modimo le a phela gomme le a šoma. Ke lebone tseleng ya rena ya bophelo le sebetša ntweng ya rena kgahlanong le lenaba – Jesu o šomišitše Lentšu la Modimo go thibela lenaba ge a be a lekwa lešokeng. Re dira bjang seo? Mo ke mehlala ye re ka go e latela:

BODUTU: Ge lenaba le leka go go kgodiša gore o lewa ke bodutu gomme ga go yo a go kgathalelago, le gopotše gore mantšu a Modimo go Baheberu 13:5: “Gape Modimo o rile: ‘Nka se tsoge ke le tlogetše, ebile nka se tsoge ke le lahlile.’ ”

GO BALABALA: Ge lenaba le leka go go kgodiša gore o ka se amogele katlego go tšwa mathateng a gago a bjale, le gopotše ka mantšu go Bafilipi 4:6-7: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

PHAPANO LE MORATIWA WA GAGO: Ge lenaba le go dira gore o dumele gore lenyalo la gago le ka gare ga mathata goba tswalano ye e phuhlamego le mogwera, mošomi-gotee goba ngwana e ka se tsošološwe, le gopotše ka mantšu a Modimo go Hesekiele 36:26: “Ke tla le fa dipelo tše mpsha le menagano ye mefsa. Ke tla le amoga dipelo tša lena tše thata ka le fa dipelo tše boleta.”

PHODIŠO: Ge dingaka di go nea pego e mpe goba lenaba le dira gore o ikwe o ka re o ka se fole, le gopotše ka mantšu go Jesaya 53:5: “… ra fodišwa ke dintho tša gagwe (Jesu).”

BOHLALE: Ge lenaba le go dira gore o belaele ge e ba o dirile sephetho sa maleba lefelong la gago la mošomo goba lapeng la gago, le gopotše ka mantšu go Jakobose 1:5: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.”

Boela morago go Lentšu la Modimo. Ngwala dikholofetšo tša gagwe fase go boemo bja gago. Ge o ikwa o nolegile moko, boela morago go dikholofetšo tše le go di tiišetša leswa. Ka tsela ye, tumelo ya gago go Modimo e tla matlafatšwa gome lenaba le tla go tlogela. Gopola, Modimo (le dikholofetšo tša Gagwe) ga a fetoge! Modimo a go šegofatše.