Mathomo a maswa – Letšatši la 9
Mathomo a maswa … ka dilo tše mpsha tše di tlago pele bophelong bja gago
(Di)temana ya Bibele
MATEU 6
Ke eng selo se bohlokwa se se tlago pele bophelong bja gago ga bjale? Protšeke ye e hlohlago mošomong, mathata ka ngwana wa gago sekolong, lenyalo la gago le le lego kgauswi le go phuhlama, tebanyo ye e tutuetšago ye o nyakago go e fihlelela lenyaga goba o ka bolela ka kgonthe gore Modimo (le thato ya Gagwe) ke Yena yo bohlokwa kudu yo a tlago pele bophelong bja gago?
Theeletša setsopolwa se:
“Nyaka pele mmušo wa LEHUMO, gomme o tla tshwenyega ka ranta le sente ye nngwe le ye nngwe ka pankeng. Nyaka pele mmušo wa tša MAPHELO, gomme o tla tshwenyega ka dibabo goba bohloko bofe goba bofe bjo o kago itemogela bjona mmeleng wa gago. Nyaka pele mmušo wa go TUMA, gomme o tla ikhwetša o le ka gare ga thulano ye nngwe le ye nngwe. Eupša nyaka pele mmušo wa MODIMO, gomme o tla hwetša gore o ka se tshwenyege ka selo.”
Go Mateu 6:33 Jesu o rile, “Lena sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona.”
A re lekodišišeng leswa dilo tše di tlago pele maphelong a rena, gore batho ba re phelago le bona ba pake gore re bea Mmopi wa rena (le se se lego bohlokwa go Yena) pele maphelong a rena. Ka tsela ye, nka go netefaletša gore seemo se sengwe le se sengwe se tla ba le dipoelo tše Modimo a di rulagantšego ka sona. Modimo a go šegofatše.
