Bible Society of South Africa
Dithulaganyo tša go bala
Matšatši a šupa a tutuetšo go tšwa go Kutullo
Matšatši a šupa a tutuetšo go tšwa go Kutullo - Letšatši la 6
Gerhard Lindeque

Matšatši a šupa a tutuetšo go tšwa go Kutullo - Letšatši la 6

Ke tla go šireletša

(Di)temana ya Bibele

KUTOLLO 3

Molaetša wa go ya Filadelfia

7“Ngwalela morongwa wa Modimo wa phuthego ya Filadelfia o re:

“Yo e lego yo mokgethwa le wa go botega,

yo a swerego sekgonyo se e bego e le sa Dafida,

yo e rego ge a bula mojako

gwa se be le yo a ka kgonago go o tswalela,

ge a o tswalela

gwa se be le yo a ka kgonago go o bula,

“o re: 8Tše le di dirago ke a di tseba. Ke le buletše mojako wo o lego mo pele ga lena, gomme ga go motho yo a kago o tswalela. Ke a tseba gore ga le na maatla a mantši, eupša le latetše thuto ya ka, la mpotegela. 9Bjale theeletšang! Ge e le bao ba phuthego ya Sathane bona, bafeane bao ba go ipitša Bajuda etšwe e se bona, ke tla ba dira gore ba tle ba le khunamele, ba tsebe gore ke a le rata. 10Ka ge le phethile taelo ya ka ya gore le kgotlelele, le nna ke tla le lotola nakong ya moleko wo o tlilogo tla lefaseng ka moka go leka batho. 11Ke kgauswi le go tla. Le sware seo le nago le sona le se tiiše, gore le se tlo amogwa ke motho sefoka sa lena. 12Yo a fentšego ke tla mo dira kokwane ka tempeleng ya Modimo wa ka, gomme a ka se tsoge a tlogile gona. Ke tla mo ngwala leina la Modimo wa ka le la motse wa Modimo wa ka, Jerusalema ye mpsha, ye e tlago theoga e etšwa legodimong go Modimo wa ka. Le gona ke tla mo ngwala leina la ka le lefsa.

13“Yo a nago le tsebe a a kwe se Moya o se botšago diphuthego.”

KUTOLLO 3:7-13NSO00Bula go Mmadi wa Bibele

Sekgonyo se e bego e le sa Dafida temaneng ye mohlomongwe se bolela ka Jesaya 22:22, moo Eliakime a fiwago boikarabelo bja go laola kgoro ya mošate kua Jerusalema. Ka Jesu Kriste, bjale re hwetša tumelelo ya mahala go mmušo wa Modimo. Jesu Kriste ke sekgonyo se se kgontšhago batho go ba karolo ya mmušo wa Modimo. Khomotšo ya kereke ke gore ga go selo goba motho yo a kago tswalela lebati le gape. Se Jesu Kriste a se dirilego, se ka se dirollwe.

Sinagoge ya Sathane e ra batho bao e lego manaba a Modimo le kereke ya gagwe. Ngwagakgolong wa pele ka morago ga Kriste go be go na le, magareng ga ba bangwe, gape Bajuda bao ba bego ba hlomara kereke. Ba be ba dumela gore ke bona batho ba nnete ba Modimo. Le ge go le bjalo, kereke, ka moka bao ba dumelago go Jesu Kriste, ke batho ba Modimo. Re sa le karolo ya batho ba Modimo lehono; se ke ka lebaka leo re ka letelago lehloyo le kganetšo.

Polelo “Ke tla le lotola” e šomišwa makga a mararo temaneng ye. Sa pele, e šomišwa bjalo ka tiišetšo ya gore badumedi ba swareletše go molaetša wa Jesu Kriste wa kgotlelelo dinakong tša tlaišego, bjalo ka kholofetšo ya gore Modimo o tla ba šireletša dinakong tše boima gomme, sa mafelelo, bjalo ka pitšo go kereke go swarelela go mphapahlogo wa bona – go bontšha gore re karolo ya mmušo wa Modimo.

Tlaišego le meleko ke karolo ya bophelo bja modumedi yo mongwe le yo mongwe. Modimo ga a holofetše gore re tlo tlaišega, eupša gore o tlo re šireletša le go ba le rena. Rena, bjalo ka kereke ya gagwe, re phela ka tebelelo ya go boa ga Jesu. Re bohlokwa kudu go Modimo. Bjalo ka kokwane ka tempeleng, Modimo ka mehla o bogoneng bja rena. O na le tswalano ya kgauswi le rena ka gobane yo mongwe le yo mongwe wa rena o hwetša leina le leswa go tšwa go Modimo. Go re dira batho ba boitšhupo bjo boswa, bao ba phelago ka mo go fapanego.

Nagana ka:

  1. 1.Na ka mehla go bonolo go ba karolo ya mmušo wa Modimo?
  2. 2.Ke phetogo efe ye re swanetšego go e dira maphelong a rena?

Bible Society of South Africav.4.26.9
RE HWETŠE GO