Mo tumiše – Letšatši la 14

Go ditirelo tše mmalwa tša go feta tša letšatši le letšatši re boletše ka tlhophego ye e ka se thibelwego, mathata le tlhomaro tše di diregago go badumedi. Ga se mathata fela ka gobane e le mathata, eupša a na le kholofetšo ya go gola semoyeng le moputso.

Go Baroma 8:19-21 Paulose o re bontšha letago le bobedi batho le tlholo ka moka di kago le letela morago ga ge tlhophego ye ya lefaseng e fedile. Tlholo ka moka e fišegela go tlo utollelwa ba e lego bana ba Modimo. O a bona, kutollong ya rena, tlholo ka boyona e tla lokollwa go bomenetša gomme e tla latswa tokologo le letago le bana ba Modimo ba tlago itemogela lona.

Paulose gomme o tsepelela go rena bao ba amogetšego Moya.

Le rena re llela teng ge re sa letetše letšatši la tokologo le topollo ya rena, eupša re na le kholofelo (Baroma 8:23-25).

Ka matšatši a re katanago go ba le kholofelo, Modimo ga a re tlogele re le noši: “… re thušwa le ke Moya, ka ge re fokola gakaaka. Gape rena ga re tsebe gore ge re rapela re kgopele eng, le gona bjang, eupša Moya ke wona o re bolelelago le Modimo ka mefegelo ye e sa laodišegego” (Baroma 8:26).

Go sa šetšwe dilo tše mpe tše di diregago go rena, re na le kgonthišetšo ya gore “… go ba ba ratago Modimo dilo ka moka di šomela go ba hola” (Baroma 8:28). Go ka ba ka tsela ye nngwe bjang? Etse bao a ilego a ba kgetha o ile a ba rerela gore ba tle ba swane le Morwagwe (Baroma 8:29). Go feta moo, re lokafaditšwe gape re na le letago (Baroma 8:30).

Ka dipotšišo tše mmalwa tša go phuruphutša le dikarabo, Paulose o bontšha tswalano ya Modimo ye e sa fetogego le ya lerato le rena:

“Ge ditaba di le ka mokgwa wo na re ka reng? Kgane ge Modimo a na le rena ke mang yo a ka emeletšanago le rena? Na bao ba kgethilwego ke Modimo, o gona yo a ka ba beago molato? Etse Modimo yena ga a ba bone molato! Bjale ke mang yo a ka ba bonago molato? Gape Kriste Jesu o hwile a ba a tsošwa, a yo dula madulong a bogoši kgauswi le Modimo, gomme o re rapelela go yena” (Baroma 8:31,33-34).

Gomme Paulose o kgwatha pelo ya tlhago ya Modimo ge a botšiša:

“Bjale ke mang yo a ka kgonago go re aroganya le Kriste yo a re ratago yo? Kgane tlalelo e ka kgona, goba mathata, goba tlaišo, goba tlala, goba mohlako, goba kotsi, goba lehu? Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena” (Baroma 8:35,38-39).

Ka boripana, ge o lebeletšane le diteko le mathata, lerato la Modimo go wena ga le fetoge. O ikemešeditše go go fihlelela gomme a go thuše!