Mo tumiše – Letšatši la 16

Setšhabeng se se laolwago ke ditiro, mabokgoni a batho a mošomo a a bapetšwa gomme boleng bja gago bjalo ka motho le “setšweletšwa” gantši di elwa ka tsela ye. Ke mo go sa phemegego gore re huetšwa ke se: Re itebelela ka mahlo a batho ba bangwe gomme ra ahlola ditiro tša rena kgahlanong le ditiro tša bona. Go molaleng gore, ka pela re lemoga gore ka mehla go na le batho ba ba lego kaone goba ba babe go feta rena gomme temogo yeo gantši e baka maikwelo a boikgogomošo goba a lenyatšo.

Gomme lega go le bjalo go tšwa go Bagalata 6:4-5 go molaleng gore boitshwaro bja ka le bja gago bo swanetše bo be mabapi le mošomo wa rena; re swanetše go hlahloba, go lekola le go leka ditiro tša rena (e se tša ba bangwe) goba go e bea ka tsela e nngwe, re swanetše go lebelela se ka galase ya go godiša. Gantši go na le maikemišetšo a utamilego morago ga maiteko a rena a mošomo – re nyaka go kgahla batho, re hwetše tlhompho ya batho, re dira dilo ka tumo, re nyaka go ikgantšha. Tekanyo e tee fela ya ditiro tša gago ke gore e swanetše e be ye kaone. Go ya ka Bakolose 3:23 kelo ya boemo e tee fela ya “kaone” ke boemo bja Modimo: “Sengwe le sengwe se le se dirago le se dire ka pelo ka moka, mo nkego ga le se direle motho, le se direla Morena”. Go ela kgahlanong le se, o ka ikgantšha ka se o se dirago ka ntle le go bapetša mošomo wa gago go motho yo mongwe.

O a bona, dipoelo tša leano la galase ya go godiša ke gore re ka tsena bogoneng bja Modimo ka ntle le go lewa ke dihlong ge re na le lebaka la ditiro tša rena. Ka nnete o ile go nyaka lebaka: “Bjale ge, wena o jago merogo fela, o reng o bona ngwaneno phošo? Le wena o jago sengwe le sengwe, o reng o nyatša ngwaneno? Gape ka moka ga rena re tlilo ema pele ga Modimo gore a re ahlole. Gobane Mangwalo a Makgethwa a re: ‘Ke ikana ke le Modimo yo a phelago gore mongwe le mongwe o tla nkhunamela, mang le mang o tla dumela gore ke nna Modimo.’ Ka gona mongwe le mongwe wa rena o tla itlhaloša go Modimo ka tše a dirilego” (Baroma 14:10-12).

Ka lebaka la ditemana tše, re ka iketla ge re dira mošomo wa rena goba ditiro tše botse. Modimo ga a re ahlole ka maemo a batho, gape e se ka maemo a rena, eupša ka maemo a gagwe, gomme seo ga se ka godimo ga mabokgoni a rena. Ka gona, ikane gore tšohle tše o di dirago, o tla direla yena le go kgahla yena.