Mo tumiše – Letšatši la 6

Ka seruthwane ge bophelo bjo boswa tlhagong bo bontšha pono ya maatla a tlhamo ya Modimo, motho o nagana ka sewelo ka dikomelelo tše di ka go fiša bobotse bjo bjalo. Ge letšatši le lengwe go direga, gomme matlakala a a ponnego, matšoba a a hwilego le lerole le le omilego le le akgwaakgwago ke moya, di llela meetse.

Se ke sona se se diregago seretong se go Pesalome 42. Komelelo e wetše motho wa ka gare wa mongwadi. Moya wa gagwe wo o se nago selo o tletše ka dipelaelo, dipotšišo le tlhologelo, o bitša Modimo. Go ka ba bjang go se bjalo? Batho ba mmotšiša ka go nyaka go mo kweša bohloko gore Modimo wa gagwe o kae? Ga a sa kgona go kgokagana le Modimo, ka gobane ga a sa ya tempeleng go yo mo tumiša ka boyena goba le ba bangwe (Pesalome 42:2,4). O bothopša nageng e šele (Pesalome 42:6). Mafelelong o fihla boemong bjo a botšišago Modimo ka go lebanya: “O reng o ntebetše?” (Pesalome 42:9).

Eupša o a gopola gore: Modimo o be a le gona ge a itemogela lethabo le le ntši a hlahla batho go ya tempeleng! Ekaba Modimo bjale o nyametše? Aowa, gape o sa le gona lefelong le šele le kgopo moo a ikhwetšago a le gona. Modimo gape o gona ge batho ba mo kwera ka “go se be gona” ga Modimo wa gagwe.

Gomme kholofelo e a tšwelela ka gare ga legogo le komelelo ya gagwe: kholofelo go Modimo. Kholofelo go Modimo wa gagwe – mothuši le leswika la gagwe.

Kholofelo ye e mo hlohleletša go ka itlhahloba ka mo go tseneletšego: “Wena pelo ya ka, o reng o hlokofetše gakaaka? O reng o ferekane? Tshepha Modimo, gobane ke tla buša ka mo tumiša, yena Mophološi le Modimo wa ka” (Pesalome 42:5).

Motho yo mongwe le yo mongwe o itemogela maemo a bjalo bophelong ao a tshwenyago, go gatelela le go roba motho, a baka gore re we le go belaela bogona bja Modimo. Eupša ekaba go a kgonega gore Modimo a lebale ngwana wa gagwe, tlholo ya gagwe? Aowa, e se ge re sa theeletša se Modimo ka boyena a se bolelago: “Kgane mosadi a ka lebala lesea la gagwe, a se rate ngwana yo a mmelegego? Le ge eba a ka mo lebala, nna nka se tsoge ke lebetše lena, setšhaba sa ka. Wena Jerusalema, nka se tsoge ke go lebetše! Ke ngwadile leina la gago ka diatleng tša ka. Merako ya gago ke dula ke e gopotše” (Jesaya 49:15-16).

Kholofetšo ye e swanetše e be tlhohleletšo kudu go go fa kholofelo maemong a gago. Latela mohlala wa mopesalome: Bolela le wena gomme o kgale go nolega moko ga gago ka bjako gape o tiišitše, tsebagatša ka mo go kwagalago kholofelo ya gago go bokgoni bja Modimo go fetola dilo gomme o ikemišetše go mo tumiša – maemong a gago a bjale gape le ge a fetola dilo.