Mo tumiše – Letšatši la 9
Melomo ye e bolelago nnete
(Di)temana ya Bibele
DIEMA 4
Batho ba maleme a boreledi ba elela bjalo ka kgwele ya wulu ge e tatologa. Ba atlega go segiša batho go fihlela ba lla, ka metlae ya bona. Dikanegelo tše di feteletšwago ka badiši mabapi le dikgama tše tharo tše di thuntšwego ka kolo e tee, goba Rubber, mpša ya motswako, ye e phethogilego ditikree tše 180 moyeng ge e bona tau, di jewa bjalo ka dikuku bjalo ka nnete.
Mehuta ye ya dikanegelo e anegwa dibešong, eupša diphedišanong tša rena le batho, melewana ye mengwe e a dirišwa. Dafida o be a sa rate batho ba maaka, ba kgegeo, ba go kopiša, ba go ikgogomoša mo a bego a duma gore: “Nke Morena a fediše bohle ba maleme a boreledi le baikgogomoši ba go re: ‘Maleme a rena a a re thekga; re itaola ka go bolela; kgane ke mang yo a ka re laolago?’ ” (Pesalome 12:3-4).
Vine’s Expository Dictionary e hlaloša gore diteng tša dipoledišano tše bjalo ke tša maaka – nnete e a bebjwa, e a tswakwa, e a kgopamišwa le go fetošwa go ba se e sego sona.
Modimo gape ga a tlogelwe ka gare ga mantšu a mantši a boikaketši . Asafo o rile mabapi le Israele: “Fela ba leke go mo radia ka dipolelo, ba mmotša maaka. Ba be ba sa mmotegele, ba sa botegele le kgwerano ya gagwe” (Pesalome 78:36-37). Ga go makatše gore tate o file morwa wa gagwe keletšo ye e latelago: “O ile go bolela maaka; polelo tša boradia di se tšwe go wena” (Diema 4:24).
Go na le lentšu le tee le le hlalošago tlhago ya mantšu a a swanetšego go tšwa melomong ya rena: nnete (Baefeso 4:25). Ke seswantšho sefe se se ka e hlalošago bokaone go feta sediba sa meetse a mabose (Jakobose 3:11) goba mantšu a a nokilwego ka letswai? (Bakolose 4:6). Meetse a go hlweka, a mabose a go nyorolla gomme letswai la go hlweka go tšwa mobung le oketša tatso go dijo tša gago.
Re tla ikhola ge, pele re bolela, re ka ikgopotša ka tlhago ya mantšu a Tatewešo: “Tše di bolelwago ke Morena di hlwekile; di hlwekišitšwe go no swana le silibera ye e hlwekišitšwego sebešong gašupa” (Pesalome 12:6).
O ka ikhwetša seemong moo o lego motšwasehlabelo wa dinnete tše di kgomapišitšwego goba maaka a matala le dikanegelo tša maaka tše di phatlalatšwago ka wena. Se wele ka gare ga molaba wa go ka iphetolela go dipolelo tše bjalo. Dumelela Yo mantšu a gagwe a hlwekišitšwego go ka go lwela.
Ge e le gore mohlomongwe o motho yo a senyago motho leina ka dipolelo tša maaka, nako e fihlile ya gore o rapele thapelo ye: Tate nthuše ke tlogele go bolela maaka le go dira tše fošagetšego ka molomo wa ka. Ke nyaka gore nnete e buše leleme la ka.
