Modimo bjalo ka mothopo wa kholofelo – Letšatši la 9
Kholofelo ka Mangwalo
(Di)temana ya Bibele
2 TIMOTHEOSE 3
Dipuku tša go bala mafelong ka moka a thuto di fetwa ke nako ge mešomo e mentši ya tsebo e phatlalatšwa. Baithuti ba thutatumelo ba a hlaolwa go se ka gobane go na le puku e tee e bohlokwa e e ka se fetwego ke nako – Bibele. Bibele ke puku e le tee fela e e fihlelelago dinyakwa tša moloko o mongwe le o mongwe. Tirišo ya leleme le tlhalošo ya mantšu e ka fetoga eupša nnete le diteng tša Mangwalo a Makgethwa e ka se fetoge.
Bibele ga se puku feela, e bjalo ka ge Paulose a e hlalošitše gore e “hebeditšwe ke Modimo”. Ke lengwalo la Modimo go bana ba gagwe – go wena le nna.
Moya wo Mokgethwa o bula dikgopolo tša rena gore re kgone go kwešiša se Bibele e se utollago. Matlakaleng a yona re hwetša tsebo ka moka le melao e re e hlokago bjalo ka badumedi. Ka gobane Bibele e hlaloša phološo ka tumelo go Morena wa rena Jesu le go re hlama gore re kgone go phela maphelo a a kgahlago Modimo.
Se e bile keletšo ya Paulose go Timotheose gomme ka moka re hloka go e eleletša. Bjalo ka ge Woodrow Wilson, Mopresidente wa bo-28 wa Amerika, a boletše: “Ge o badile Bibele, o tla tseba gore ke Lentšu la Modimo, ka gobane o tla ba o e hweditše go ba senotlelo go pelo ya gago, go lethabo la gago le go mošomo wa gago.”
Ka manyami, go na le batho ba ba se nago Bibele gomme ga ba na kholofelo ya go ka e hwetša ka ntle le thušo. Mohlomongwe Modimo o a go bitša go ka ba thuša!
Tlhoko ke e kgolo. Go na le lefase le le robegilego le le hlokago go kwa ka phološo ya rena ka Morena wa rena Jesu Kriste, gomme tsela e kaone ke ka Bibele.
