Modimo ke Mang? – Letšatši la 14

Ekaba o lemogile ka fao batho ba bangwe ba ratago modumo wa mantšu a bona? Ga gona sekgoba poledišanong ya bona moo motho yo mongwe a kago nea tšhišinyo, ka ge seboledi se kgahlwa ke go bolela le difilosofi tša gagwe.

Ka nnete ga gona bohlokwa bja gore batho ba itsebiše, ba hlaloše se ba se dirago le go hlakiša botsebi bja bona ge ba ka mengwa go dira bjalo. Se ke bolelago ka sona mo, ke motho yo a iponago e le yo bohlokwa kudu moo a sa theeletšego dipono tša batho ba bangwe, gomme ga a na boikokobetšo go lemoga gore ke fela karolo ye nyenyane ya se se feletšego, goba kgopolo ya go lemoga gore batho ba bangwe ba bohlokwa le gore ba swanetše go ba le monyetla wa go bolela. Boikgogomošo bo ka bonala maemong a go fapanafapana, eupša bo lemogwa le semeetseng boemong bjo.

Lengwalo le la ka godimo le bolela ka go lebanya ka bothata bjo le go bo hlaloša go tšwa go mmono wa Modimo: O tseba se re se dirago gomme O ahlola ditiro tša rena. Diema 21:2 e tiišetša se mo re balago: “Motho a ka no gopola gore tšohle tše a di dirago di lokile, kganthe yo a elago maikemišetšo ke Morena.” Gape re na le kwešišo ya bokgole bjo bogolo magareng ga dikgopolo tša Modimo le dikgopolo tša rena. Gomme go Diema 21:4 e bitšwa ka se e lego sona ka gobane boikgogomošo bo itšweletša go: “Ka mehla bakgopo ba a ikgogomoša, ba a ikgantšha, gomme seo ke sebe!”

Re swanetše re iphetleke kgafetšakgafetša re lekole boitshwaro bja rena go bona ge e ba boikgogomošo le boikgantšho ga di a tsena megolong le ditirong tša rena.

Boikokobetšo ga se selo se bonolo go se dira ka ge bo dira gore re itebelele ka nnete le go lemoga tlhoko go rena go sa šetšwe ka moka tšeo re di fihleletšego. Bo re dira gore re ikwe re sa lokela pitšo ya rena bophelong ka gobane ka mehla go ba le se re swanetšego go ithuta sona, seo se dirago gore re se kwe re lokologile. Lega go le bjalo se ke ka fao re swanetšego go ba ka gona pele ga Modimo gore ka go dumela tlhoko ya rena, A ka re matlafatša gore re yo šoma ka maatla a Gagwe, go fihlelela dilo tše kgolo le go šegofatšwa kudu, eupša, ka ge letago le tla ya go Yena, le re dumelela gore re se be le boikgogomošo le boikgantšho.

Ke ka lebaka la eng Modimo a na le taba le se?