Modimo ke Mang? – Letšatši la 22

E tee ya maitemogelo a go kgahliša ao a nthabišitšego, ao ke šegofaditšwego go ka a dira makga a mmalwa bophelong bja ka, e bile nakong ya “kopelo ya Hallelujah” go tšwa go Handel’s Messiah nakong ya ge ke be ke le khonsateng. Bothakga bja mmino wo o kgahlišago bja go thoma ka “Hallelujah!” ye e kwagalago kudu ke selo se ke dumago gore mang le mang kae le kae a itemogele sona, ka gobane ga se fela gore e na le seabe se maatla go ka kgona go dira gore motho a lle, eupša gape e ka go fa boikwelo bjo bo makatšago bja gore go tla ba bjang go ba legodimong batho ka moka ba kopane go tumiša Modimo Ramaatlaohle! Ke Yena yo a tlago buša ka go sa felego. Eupša ke eng moletlo, le gona ke mang a o tutueleditšego?

Tlhahlobong ya mafelelo ya yo Modimo e lego Yena, temana ye ya go kgahliša go tšwa go Kutollo 11:15 e re iša thwii nakong ye e tlago le go dilo tša legodimo, ge lefase le tla be le bušwa ke Modimo go ya go ile. Re tla be re le bogeneng bja Gagwe. Go molaleng gore ke sona se se tutueditšego go hlangwa ga mošomo, gomme nnete ya wona e tletše gohle ka Bibeleng.

Mathomong ka Bibeleng, ka go Eksodose, Moshe le Miriamo ba ngwala kopelo ya phenyo ka sehlogo sona se. Morago ga go fenya Farao le madira a Baegepeta, ge ba tšhošwa kudu ke maatla a magolo a Modimo ka go ba lokolla le go fenya manaba a bona, ba opela bjalo ka karolo ya kopelo ya bona: “Wena Morena, o tla buša ka mehla yohle” (Eksodose 15:18). Se e be e le boitemogelo bja bona ka Yena Yo a lwelego legatong la bona ka ditsela tša mehlolo.

Gomme Dafida o tsebagatša go dipesalome gore “Morena ke Kgoši go iša go sa felego …” ge a tumiša Modimo ka ge a kwele sello sa bao ba gateletšegilego, le go ba netefaletša ka go lwela “dillo tša ditšhiwana le tša ba ba gateletšwego” kgahlanong le manaba a bona (Pesalome 10:16,18).

Le mongwadi wa Dillo, a le manyaming ka lebaka la sebe sa Israele, o tsebagatša gore “Eupša wena, Morena, o buša go ya go ile, gomme o tla ba kgoši ka mehla yohle” (Dillo 5:19) gomme Kgoši Nebukadnesare wa go tuma, morago ga go bona ka fao Modimo Morena a phološitšego Shadraka le Meshaka le Abednego ka moubelong wo o laumago mollo wo phišo ya wona e tšhumilego madira a gagwe ao a bego a ba lahlela ka moubelong, a tsebagatša gore “Ke tše dikgolo bjang dimakatšo tša gagwe! Mehlolo ya gagwe ke ye maatla e le ruri! Bogoši bja gagwe ke bja go ya go ile, le mmušo wa gagwe ke wa go dulela ruri melokong ka moka” (Daniele 4:3).

Wena o reng? Modimo ke Mang?