Modimo ke Mang? – Letšatši la 8

Ekaba o bolela maaka? O dira dikholofetšo tše o sa di phethagatšego, goba mohlomongwe, o di lebalago?

Mangwalo a ka godimo a bolela ka selo se se aroganyago motho go Modimo ge e le gabotse, le go fapanya tlhago ya motho ye e welego le tlhago ya Gagwe e kgethwa. Ke pharologantšho ya nnete ye e lego bohlokwa kudu bophelong yeo batho ba hwetšago go le boima go ka e hwetša. Ga se maaka ka moka ao e lego a ka boomo. Ka nako ye nngwe batho ba bolela maaka go šireletša ba bangwe, goba ba holofetša se sengwe ntle le go nagana go efoga boemo bjo boima, gomme ba palela ke go phethagatša kholofetšo yeo ka gobane maemo a fetogile; eupša gantši ke selo se batho ba se dirago ka boomo gomme gantši ba kweša ba bangwe bohloko, le bona, ka go dira bjalo.

Moo o ka yago gona bophelong o tla hwetša batho ba kwešitšwe bohloko ka lebaka la maaka, gomme go bolela maaka ga go dire ke bana fela bao ba sa tsebego bokaone, basenyi bao ba nago le bothata bja go dira selo se se lokilego, goba batho ba go no bolela maaka ka lebaka la mathata a monagano. Ga go dire phapano gore lebaka ke eng, go bolela maaka go sepedišana le boradia, boikgakantšho, bofora, go hlalefetša le go dira dilo tše dingwe tše fošagetšego, gomme go dira gešita le ke batho ba ba hlomphegago kudu mafelong a hlomphegago kudu.

Modimo o lokile! Ga a itemogele bothata bjo! Ke ka lebaka la eng Modimo a sa bolele maaka? Ke ka lebaka la eng a phethagatša dikholofetšo tša Gagwe ka dinako tšohle? Ka gobane o pethagetše gomme potego ya Gagwe ke karolo ya yo A lego Yena. Ga a hloke go bolela maaka: ga A laole ke motho; ga A hloke go kgahliša motho. Ke boloki ka boYena gomme O, a le noši, a tshepega. Ge a boletše selo, ke nnete gomme A ka se fetole kgopolo ya Gagwe. Potego ya Gagwe ga e na bosodi.

Motho, ka letsogong le lengwe, ka dinako ka moka o laola ke yo mongwe (le ge a kgetha go se dumele). Go se swane le Modimo, motho o a fokola le go dira diphošo gomme gantši o hwetša a le ka gare ga maemo moo a ikwago gore o hloka go bolela maaka go phološa seriti sa gagwe, goba go se dumele diphošo go ka itšweletša bokaone go feta ka mo a lego ka gona. Bjoo ke boemo bjo bo nyamišago!

Re nyaka go tseba Modimo ka noši gobane re hloka go itemogela letšatši le letšatši bobotse bja nnete ya Gagwe ye e feletšego le phethagalo lefaseng la rena le le robegilego, gore re se lebelele lefase ka mo go swanago gape. Re hloka boitemogelo bjo bja go fetola bophelo!