Modimo wa lerato, kholofelo, kgaugelo le khutšo – Letšatši la 16

Jesu a buša a botša Bafarisei a re: “Ke nna seetša sa ba ba lego lefaseng. Yo a ntatelago a ka se phele leswiswing, o tla ba le seetša se se phedišago.” Johanese 8:12

Go tloga mola lefase le hlolwago, seswantšho sa seetša kgahlanong le leswiswi se gona go histori bjalo ka kgopolo e tlwaelegilego. Modimo o boletše gomme gwa ba le seetša, gomme a arola seetša go leswiswi. Go tloga ka nako yeo, bobedi ka mehla di a ganetšana, ka mehla di fapane. Seetša se lekantšhwa le bophelo, kwešišo, temogo; mola leswiswi le amantšwa le manyami, go se be le nnete, go felelwa ke kholofelo le kgatello.

Jesaya o tsebagaditše gore seetša se tla tla lefaseng, “Setšhaba se se bego se sepela swiswing se bone seetša se segolo” (Jesaya 9:1). Go Ebangedi ya Johanese re bala gore, “Dihlolwa tšohle di hweditše bophelo ka yena, bophelo bjo e bilego seetša sa batho. Seetša seo se bonega leswiswing, gomme leswiswi ga se la kgona go se fenya.” (Johanese 1:4-5)

Jesu ka boyena o boditše batho gore, “Ke nna seetša sa ba ba lego lefaseng. Yo a ntatelago a ka se phele leswiswing, o tla ba le seetša se se phedišago” (Johanese 8:12). Gomme, Kriste o laela bana ba gagwe go ba karolo ya go raka leswiswi lefaseng. “Pele le be le le leswiswing, eupša bjale, ka ge le le ba Morena, le mo seetšeng. Ka gona, le phele bjalo ka ba ba lego mo seetšeng.” (Baefeso 5:8)

“Ke lena setšhaba se se kgethilwego ke Modimo, ke lena baprista ba Kgoši, setšhaba se sekgethwa, setšhaba se Modimo a ikgethetšego sona go bega ditiro tše maatlaa tša yena Modimo yo a le biditšego leswiswing a le tliša seetšeng sa gagwe se se tlabago.” (1 Petrose 2:9)

Bjale, mo o ka bago o le gona, o kgethilwe go ba lebone le le tlišago seetša ka phapošing ya leswiswi, go raka leswiswi. O filwe molao wa go tliša bophelo, nnete, lerato le kholofelo.