Modimo wa lerato, kholofelo, kgaugelo le khutšo – Letšatši la 9

Bogolo bja gagwe ke phetatlhaologanyo! Jobo 36:26

Go tloga go kgaolo ya pele go fihla go ya mafelelo, Bibele e hlaloša maatla ka moka a Modimo. Bogolo bja Modimo bjalo ka mohlodi, mophediši, mmuši, mofilosofi, ngaka, mophološi le moetapele bo a ahlaahlwa le go opelwa ke bangwadi ba bantši le bareti, gomme le ge go le bjalo, go bonala eka ga go na mantšu a go hlaloša Modimo gabotse.

Monagano wo o hlalefilego wa motho, wo o kgontšhitšego batho go ya ngweding, wo o fofišago sefofane sa ditone tše 650 lefaufaung le go aroganya diathomo, o ema o homotše pele ga bogolo bja Modimo. Go na le makgobapuku a a tletšego ka dingwalwa tša mengwagakgolo, diswantšho le mešomo ya bokgabo tšeo di lekago go hlompha letago la Modimo, eupša di bolela fela ka dipharologantšho tše itšego tša Modimo.

Ka ngwagakgolo wa bo-11 Mopišopo wo Mogolo Anselm wa Canterbury o rile Modimo ke Modimo yo go se nago selo goba motho yo a ka bapetšwago le yena.

Isak de Villiers, o rile:

Naa ke tla tsoga ke go tsebile?

Ke tla kgona go nagana – le go tseba?

Go kgoma – le go tseba?

Go kwa – le go tseba?

Goba go bapetša Wena leboelela

go selo se fapanego,

eupša sa go swana le Wena,

seo ke tlago kgona go se kwešiša?

Ga go selo se swanago le Wena.

Modimo yo o mmotse ke Mmopi wa ka le Mophološi. Naa nka se dire nako, kgafetšakgafetša, go homola le go go tumiša ka tlhompho?