Mošomong le Modimo – Letšatši 5

_13-14“Le se ke la hlalefetšana ge le šomiša dikeloboima le dikelo. ₁₅Le šomiše dikeloboima le dikelo tša mmakgonthe tše di tshephegago, gore le tle le phele nako ye telele nageng ye Morena Modimo wa lena a le fago yona. ₁₆Morena o hlaswa batho ba ba hlalefetšago.”

₃₅“Le se ke la radia yo mongwe ka go šomiša dikelo tša bofora ge le ela botelele goba boima goba bontši. ₃₆Le šomišeng dikala le dikeloboima le dikelo tše di nepagetšego. Ke nna Morena Modimo wa lena yo a le ntšhitšego nageng ya Egepeta. ₃₇Le phetheng melao ya ka le ditaelo tša ka ka moka. Ke nna Morena.”

₄Theeletšang mo, lena le gatelelago bahloki, le tlaišago badiidi ba naga ye. ₅Le ipotša le re: “Monyanya wa Ngwedi wa lebalana o tla feta neng gore re tle re rekiše mabele a rena? Sabatha e tla feta neng, gore re tle re a rekiše? Ke mo re tlago ela ka dikelo tše e sego tšona, ra lefiša batho go feta tekanyo, ra ba hlalefetša ka dikeloboima tše e sego tšona. ₆Modiidi re ka mo reka ka tšhelete, le mohloki ra mo reka ka dieta, ešita le ditlhoka tša mabele ra di rekiša.”

₇Morena, yo Baisraele ba ikgantšhago ka yena, o ikanne a re: “Nka se tsoge ke lebetše mediro ya bona ye mebe.

₉Go boifa Morena ke bohlale. O bitša ba motse wa Jerusalema o re: “Theeletšang, lena le kgobokanego mo motseng wo! ₁₀Ka dintlong tša batho ba kgopo go na le mahumo ao ba a ikhweleditšego ona ka bohwirihwiri. Ba šomiša dikelo tša bofora, e lego selo se ke se hloilego. ₁₁Na nka napa ka swarela batho ba ba šomišago dikelo le dikeloboima tša bofora? ₁₂Bahumi ba gabolena ba rata boganka, le gona ka moka ga lena le bompheane ebile le baradia. ₁₃Ka gona ke šetše ke thomile go le otla, gomme ke tla le bolaya ka lebaka la dibe tša lena. ₁₄Le tla ja, fela la se khore – gabotsebotse la no swarwa ke tlala. Tše le di thopilego di ka se lotege. Se sengwe le se sengwe se le se lotilego ke tla se fediša ka ntwa.