Na o a leboga? – Letšatši la 10

Pono ya John e be e mpefala ka pelapela. Ngaka ya gagwe ya re a ye go setsebi sa mahlo se se bego se tla mo dira opareišene ya go tura go ka mo thuša. E be e le kholofelo e le tee ya John.

Morago ga go ntšha tšhelete ya gagwe ka moka ye a bego a e bolokile, a rulaganya go yo bona setsebi. O be a le tlalelong gomme o be a ka neela ka tšhelete ya gagwe ka moka le dithoto go monyetla wa go ka kgona go bona gape. Morago ka tlhahlobo ya kelohloko, setsebi se tšere sephetho sa gore opareišene ya go tura e swanetše e dirwe ka pejana gore John a kgone go bona gape. Go bile le bothata bjo tee: tefo ya go tlwaelega ya ngaka e be e le gaselela go feta tšhelete ye John a bego a e bolokile.

“Gabotse,” John a fegela ka go nyama, “ke swanetše ke amogele go re nka se sa bona gape. Nka se kgone go lefa tšhelete yeo e ntši.” Setsebi sa mo lebelela gomme sa fetola: “Go na le tsela e le tee ya go rarolla bothata bjo. O ka se kgone go lefa tšhelete ye e nyakegago gomme le nna ka se šomele tšhelete e nnyane. Ka gona, ke tla swanela ke go dira opareišene mahala.”

A re boeleng morago nakwana. O kgona go kwa modumo wa go gwaša ga matlakala moo Adamo le Efa ba bego ba leka go khutela Modimo Serapeng sa Edene? Ba be ba sa obamela Modimo gomme, tshepetšong, ba senya tswalano ya bona ya kgauswi le yena. Sebe se bile karolo ya lefase la go hloka sebe. Sehlabelo sa go fodiša bosenyi bjo se be se tura kudu. Se tura kudukudu moo e lego gore Adamo goba Efa ba be ba ka se kgone go emelana le sona. Madi a be a swanetše go falala. Go be go swanetše go dirwe sehlabelo ka motho.

A re gatele pele nakong mmotong wa Khalbari. Na o bona Monna a lekeletše sefapanog mo gare? O bona madi a elela thameng ya gagwe pele a goeletša: “Eloi, Eloi, lema sabachthani?” Ka mantšu a, a neela moya. Monna yo a se nago sebe o tšere dibe tša lefase magetleng a gagwe.

Modimo, bjalo ka ngaka, o tsebile gore re be re ka se kgone go lefa tefo ya go ka tsošološa tswalano le yena. Ka gona, a dira sehlabelo se segolo kudu se kago akanywa. Re bala go Johanese 3:16: “Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego.” Gomme go ngwetšwe go Baroma 8:32: “Modimo ga se a babalela Morwagwe, eupša o ile a re gafela yena go re phološa bohle. Bjale a ka napa a se re fe tše dingwe tšohle?”

Modimo o file ka Morwa wa gagwe a le noši bjalo ka sehlabelo, ka kholofelo ya gore re tla tšea monyetla go ka aga tswalano le yena. O lebogile neng Modimo ka Jesu?