Na o a leboga? – Letšatši la 11

Nakong ya mengwaga e mmalwa ya go feta, babadi ba mmalwa ba file bopaki ka go re ba be ba na le mathata. Mmadi o tee o botšišitše gore: “Ke ka lebaka la eng Modimo a sa arabe dithapelo tša ka?” Na le wena o itemogela “nako ya setu” tswalanong ya gago le Modimo?

Nakong ya Ntwa ya Bobedi ya Lefase, Bajuda ba bantši ba ile ba utamela Majeremane ka gare ga maobo. Morago, sereto se hweditšwe ka gare ga leobo le bjalo:

“Ke dumela go letšatši le ge le sa hlaba.

Ke dumela go lerato le ge ke sa le kwe.

Ke dumela go Modimo le ge a homotše.”

Nako le nako, le rena re na le go itemogela dihla tša setu maphelong a rena. Re rapelela keletšo le tlhahlo. Setu. Re rapelela molekani. Setu. Re rapelela tlhahlošo ya mošomo. Setu. Re rapelela phodišo ya bolwetši. Setu. Re rapelela ngwana. Setu. Goba re rapelela go boela sekeng ga ditšhelete gomme re itemogele setu. Ke eng boikarabelo bja gago ka gare ga ditu tše?

Moshe o itemogetše nako ya setu lešokeng ge a tšhabela fao morago ga go bolaya Moegepeta. Josefa o itemogetše nako ya setu kgolegong ya Egepeta, morago ga go lahlelwa kgoleng ka lebaka la ditatofatšo tša maaka tša mosadi wa Potifare. Batho ba itemogetše sehla sa setu mengwaga ye 400, morago ga molaetša wa mafelelo go tšwa go Modimo ka go Testamente ye Tala go fihla nakong ya go tla ga Jesu.

Na Modimo ga a gona nakong ya dihla tša setu? Ga go bjalo. Ka mehla o mošomong – ka dihla tša setu, Modimo o šoma re sa mmone. Bjalo ka ge medu ya semela e hloka go golela fase gore semela se dule se eme ge se golela godimo, semelo sa rena le tumelo le tšona di swanetše e be tše maatla gore re kgone go ema ge Modimo a godiša ditikologo tša rena. Teko, ka gona, e ba dinakong tša setu. Modimo o nyaka go netefatša gore re ikemišeditše koketšo.

Go Pesalome 46:10 re bala gore: “Lesang go lwa, mme le tsebe gore ke nna Modimo. Ke nna Kokamaditšhaba, ke nna Kokamalefase.”

Moshe a ba le tumelo. Lebakeng la go feta mengwaga e 40, a tseba lešoka gabotsebotse. O be a sa tsebe gore ge a na le mengwaga e 80, Modimo o tlo mmitša go mo fa mošomo o bohlokwa kudu wa bophelo bja gagwe: “Etela pele Baisraele go tloga Egepeta go ya Nageng ye e Holofeditšwego” lešokeng. Josefa a fenya teko ya semelo le yena, gomme morago ga mengwaga e mebedi kgolegong, Modimo a mo hlatloša go tloga go mogolegwa go ya go mmušiši wa Egepeta. Gomme ge batho ba be ba ikemišeditše, diprofeto tša Mophološi tše di bego di le dipelong tša rena, Modimo a romela Morwa wa gagwe, Jesu Kriste go re phološa sebeng.

A re lebogeng Modimo ka “dihla tša setu” maphelong a rena, re tseba gore O šoma re sa mmone maphelong a rena. Gomme a re fenyeng teko ya semelo go re re itemogele koketšo ya semeetseng ya Modimo. Gopola, Modimo ga a dire diphošo. Nako ya gagwe ka mehla e phethagetše. Modimo a go šegofatše.