Na o a leboga? – Letšatši la 3

Mošomi-gotee o abile bopaki bjo bo latelago, a bontšha bokgoni bja Modimo go fetola thapelo ya ngwana:

Luané: “Kgweding ya mathomo morago ga go huduga Bellville go ya Somerset West, morwa wa ka o monnyane, Mikal, o be a sepela le nna mosong o mongwe le o mongwe ge re be re sa letile gore a ye sekolong se seswa. Ka tsebo ya gore ga a kgone go dula metsotso ye 15 a sa šikenyege, ke be ke nyaka selo se se tla dirago gore a dule a swaregile mmileng mesong le mantšiboa.

Lebakeng la beke e tee mmileng, Mikal o bile le lerato la dilori. Thaloko ya rena e be e le, ‘Phopholetša gore go ka ba go na le eng ka gare ga lori’ ge e feta. Diphopholetšo di be di fapafapana go tloga go lori e tletše ka borametlae go ya go dimpšanyana – se se bakile lesego le legolo. Ge lori e kgolo ya Spar e feta mosong o mengwe, morwa wa ka o ile a fegelwa gomme a re, ‘Mma, ye ke lori e botsebotse e ke sa lego ka e bona!’ Seo se fetošitše thaloko ya rena go ka nyaka lori ya Spar leetong la rena. Ge re e bona, Mikal o be a thaba kudukudu.

Gomme gwa direga. Matšatši a mabedi a feta ka ntle le go bona dilori tša Spar di re feta mmileng. Ke be ke felelwa ke mabaka a gore di ka ba kae gomme ka mosong wa boraro, Mikal a tsena koloing ka kgopelo ya gore re rapele. Gomme a rapela: ‘Morena Jesu yo a rategago, ntumelele ke e bone lehono.’ Gateetee ka tseba gore o be a bolela ka lori ya Spar. Morago ga thapelo ya gagwe, Mikal a dula ka setu setulong sa gagwe gomme a thoma go lebelela mmila – ka tumelo.

Ga re a bona dilori tša Spar mmileng, eupša ge re potologa khona ya boraro kgauswi le sekolo, gateetee Mikal a goa ka lethabo! Ka pele ga rena go be go eme lori ya Spar. Batho ba be ba fološa dilo. Ke ile ka ema gomme ka tšea Mikal seswantšho kgauswi le lori, ke tseba gore ‘Morena wa gagwe Jesu yo a rategago’ ga se a araba fela thapelo ya gagwe go ka bona lori, eupša a oketša ka moputso wa gore rena re kgone go tšea seswantšho kgauswi le yona.

Ke beile seswantšho le kanegelo go Facebook. Se se diragetšego go latela, se be se sa letelwa. O tee wa bagwera ba ka o reketše Mikal lori e nnyane ya Spar. O e amogetše ka myemyelo e kgolo, a re: ‘Mma Jesu o ntoketše kudu’. Gape, o tee wa bašomedi ba Spar a bona kanegelo gomme a laletša Mikal go senthara ya phatlalatšo ya Spar. Gape, Mikal a fegela ge a bona dilori tše 20 tša Spar tše di bego di eme kgauswi le kgauswi. Lekga le a kgona go namela e tee le go letša pele. Ke ile ka phumola dikeledi tša ka ka tebogo, ke lemoga gore Modimo o hlomphile tumelo ya ngwana yo o monnyane ye e lego e kgolo bjalo ka lori.”

Luané o nepile. Modimo o nyaka gore re be le tumelo bjalo ka ngwana. Go Markose 10:13-15, re bala ka karabelo ya Jesu go barutiwa ba gagwe ba ba befelago ka lebaka la batswadi ge ba tliša bana ba bona go yena gore a ba šegofatše: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo.”

O rapelela eng lehono? A re tšweleng pele go botša Modimo tše di lego ka dipelong tša rena, bjalo ka ge Mikal a dirile, gomme re lete go bona gore o tla dira eng. Re ka itemogela ka fao Modimo gape a tlišago “lori”, gore e eme pele ga rena. Modimo a go šegofatše.