Na o a leboga? – Letšatši la 7

A sa kgone go robala, kgoši a bala dipuku tša gagwe. O be a sa kgone go robala gomme a tšea sephetho sa go hwetša ge e ba go na le yo a mo kolotago tšhelete. Nakong e nngwe, a ema gomme a hlahloba diteng ka kelohloko. Ka go makatšwa ke se a se hweditšego, ge le hlaba a bitša o mongwe wa bahlanka ba gagwe.

“E kae tšhelete ya ka?” kgoši a goeletša, ge mohlanka a tsena ka phapošing go ema pele ga gagwe. Sefahlego sa mohlanka sa sehlefala. O be a kolota kgoši dimilione tša diranta. Mohlanka a araba ka go naya: “Ke maswabi, Kgoši. Ga ke na tšhelete. Ke šaparegile. Nka se kgone go lefela sekoloto sa ka.” Se sa befediša kgoši kudu. A lebelela o mongwe wa bahlanka ba gagwe ka taelo ye: “Rekiša thoto ka moka ya monna yo. Ge o feditše, tšea yena le balapa la gagwe o ba iše mmarakeng gomme o ba rekiše bjalo ka makgoba!”

Ka poifo, mohlanka a itahlela fase maotong a kgoši, a phophota a re: “Hle, se mphelele pelo, ke tla go lefa molato woo ka moka!” Kgoši a kgona go bona gore monna yo o a itshola. Ka gona, a tšea sephetho sa go mo gaugela le go phumola sekoloto sa gagwe.

Ge mohlanka a etšwa ka mošate, a hwetša monna mmarakeng yo a bego a mo kolota tšhelete e nnyane. Ka pefelo, mohlanka a swara monna ka hempe, a nyaka tšhelete ya gagwe. Monna a mo phophothela: “Anke o se mphelele pelo; ke tlo go lefela tšohle.” Lega go le bjalo, mohlanka a se be le mogau, gomme a laela gore monna a lahlelwe ka kgolegong.

Morago ga go kwa ka tiragalo ye, kgoši a bitša mohlanka gape. Lekga le kgoši a se be le mogau: “Ke go phumoletše sekoloto sa gago sa dimilione,” a omanya mohlanka, a tuka bogale, “gomme o paletše ke go ba le mogau go monna yo a go kolotago diranta tše mmalwa!” Morago ga fao, kgoši a laela gore mohlanka a lahlelwe ka kgolegong mo a tlago hlokofatšwa.

Go Mateu 18:35, Jesu o ruma seswantšho ka mantšu: “Le Tate wa magodimong o tlo le dira ka mokgwa woo ge le sa lebalele, ge motho a sa lebalele ngwanabo ditšhito tša gagwe ka pelo.”

Gopola morago ka bophelo bja gago nakwana. Modimo o go lebaletše ka eng? Bjale, ke mang bophelong bja gago yo o hlokago go mo laetša mogau? Na boitshwaro bja gago bo laetša tebogo ya gago go tebalelo ya Modimo – goba o bjalo ka mohlanka yo a lebetšego se kgoši a mo diretšego sona? Modimo a go šegofatše.