Na o a leboga? – Letšatši la 8

Bopaki bjo bja mosadi wa Kapa bo dirile gore ke lemoge bohlokwa bja lerato le le feletšego le kamogelo:

Surina o be a šalela go ya sekolong letšatši le letšatši. Ka dinako tše dingwe, o be a fihla sekolong ka bo-10:30 mosong. O be a sa dire mošomo wa gagwe wa gae gomme ka phapošing ya sekolo, o be a baka tšhitišo. Barutiši mafelelong ba thoma go lahlegelwa ke kholofelo ya gore o tla fetoga. Morago ga tiragalo e nngwe ka phapošing ya sekolo, barutiši ba Surina ba ile go hlogo ya sekolo ba nyaka gore a fegwe.

Se ba bego ba sa se tsebe ke gore bobedi batswadi ba Surina ke ditagwa. Ge a fihla gae go tšwa sekolong, batswadi ba gagwe ba šetše ba tagilwe. Ge a leka go dira mošomo wa gagwe wa sekolo, tatagwe, magareng ga diphapano tša go se fele ka lapeng, o kgeila dipuku tša gagwe tša sekolo. Surina a bolela gore ka nako yeo, bokamoso bja gagwe bo be bo bonala bo swiswetše bjalo ka bja batswadi ba gagwe. O be a sa bone ka fao a kago tšwa ka gare ga dinako tše tše boima.

Go e na le gore a fegwe, hlogo ya sekolo o file barutiši ba Surina tlhohlo ya beke e tee. Ka beke e tee, ba be ba swanetše go bontšha lerato le le feletšego le kwelobohloko go yena. Mantšu a bona a be a swanetše go mo hlohleletša le go mo kgothatša ge ba be ba leka go hlola tikologo e e bolokegilego moo a tlago ikwa a amogelegile, go sa šetšwe boitshwaro bja gagwe. Mathomong, se se be se bonala bjalo ka mošomo wa go se kgonege. Lega go le bjalo, barutiši ba dumela gore ba tla dira seo beke e tee.

Ba maketše kudu ge boitshwaro bja bona bjo bo fetogilego bo tliša phetogo go boitshwaro bja Surina ka matšatši a mmalwa. O be a sa fihle fela sekolong ka nako mosong, eupša o be a dira mošomo wa gagwe wa gae gabotse lekga la pele nakong ya dikgwedi. Tlhohlo ya “beke e tee” ya fetoga dibeke gomme barutiši ba be ba maketše go bona ka fao Surina, lerabele, a fetogilego go ba mofenyi.

Lehono Surina o nyetšwe gomme o na le morwa. O na le kgwebo ye e atlegilego ya boditšhabatšhaba. Ke eng se se tlišitšego phetogo? Lerato le le feletšego le kamogelo.

O a lemoga gore modimo gape o re amogetše le go re rata ka mo go feletšego ge re be re sa le badiradibe? Go Baroma 5:8 re bala gore: “Modimo yena o re bontšhitše lerato le a re ratago ka lona, e lego la mola Kriste a re hwela re sa le badiradibe.” Ga go se re se dirile nakong ya go feta se se ka se lebalelwego ge re fetoga re boela go yena. Se se a tiišetšwa go Numeri 14:18: “Nna, Morena, ga ke befelwe ka pela, ebile ke na le potego le lerato le legolo, mme ke lebalela batho dibe le dikarogo tša bona.”

Modimo o nyaka go ba le tswalano le rena ka moka. Na ga a re fa Morwa wa gagwe a le noši? Ka gona, a re mo lebogeng ka lerato la gagwe le le feletšego le kamogelo, re leke go bontšha se gape go bašomi-gotee ba rena ba dihlogo tše thata mošomong, bana ba rena ba ba sa theeletšego magaeng le gaešita le baagišani ba rena ba go selekega gabonolo. Ka boitshwaro bjo bo fetogilego re ka, bjalo ka barutiši ba Surina, makala kudu ka phodišo ye Modimo a e tlišago maphelong a batho. Modimo a go šegofatše.