Na o a leboga? – Letšatši la 9

Go be go fiša kudu kua Cape Town ka letšatši le lengwe la selemo. Go be go le ka bo-4 thapama gomme themperetšha e be e sa le ditikree Celsius tše 30 ge ke tšea sephetho sa go iša morwedi wa ka, Joalé, yo a ratago go rutha, letangwaneng la go rutha la kgauswi.

Dilo ka moka di sepetše gabotse – go fihla mo e ka bago dikilometara tše pedi go tšwa letangwaneng la go rutha. Gateetee, go se iketle setulwaneng sa gagwe le phišo tša ba le seabe go Joalé. A thoma go lla gomme ga go a ba le mantšu a khomotšo goba kholofetšo ya se sengwe se sebotse se se tlago seo se dirilego gore a se lle. Ka nako yeo, o be a nyaka go tšwa ka koloing! Nakong e nngwe ke nyakile ke gomela morago gae.

Ge re bona letangwana, dikeledi tša Joalé tša timelela le semeetseng gomme tša tšeelwa legato ke myemyelo e kgolo. Go se iketle ga nakwana ka koloing go be go kwešišega gape go swanela ge a lemoga gore go be go le mabapi le eng.

Fao, kgauswi le letangwana, gwa fihla go nna gore, nako le nako, re ikarabela ka mo go swanago ge re itemogela dihla tša go se iketle maphelong a rena. Go e na le gore re tshephe Modimo gore a laole dilo le go šoma ka mo go sa bonagalego, re thoma go ngongorega le go ipelaetša.

Baisraele ba dirile se lešokeng. Modimo o be a ba eteletše pele go ya Nageng ye e Holofeditšwego. A bontšha maatla a gagwe le bokgoni ka mehlolo ya go fapanafapana. Lega go le bjalo, ba ile ba se kgotsofale ka tšhitišo ya nakwana. Se se bakile go ngongorega le go ipelaetša. Se dirile gore ba se nagane gabotse gomme, mafelelong, sa baka gore moloko ka moka o se tsene Nageng ye e Holofeditšwego.

Go Pesalome 30:11-12 Mopesalome o ngwala gore: “Sello sa ka o se fetošitše mogobelo; o nkapotše diaparo tša go ilela, wa nkapeša lethabo, gore ke go opelele ditumišo ke sa homole. Morena Modimo wa ka, ke tla go reta go iša go sa felego.”

Teko e kgolo nakong ya dihla tša go se iketle maphelong a rena ke go thoma go botšiša Modimo dipotšišo. Gomme re thomo go ngongorega le go ipelaetša. Nnete, lega go le bjalo, ke gore Modimo o tseba tše di tlago hlaga. O na le dithulaganyo tša go tliša katlego go rena e se dikotsi, gomme o šetše a na le diaparo tša lethabo go tšeela legato diaparo tša go ilela. Ka gona, a re tumiše Morena ge re mo leboga ka dihla tša go se iketle maphelong a rena. “Letangwana la go rutha” le “naga ye e holofeditšwego” mohlomongwe di kgauswi kudu. Modimo a go šegofatše.