Nako e bohlokwa – Letšatši la 1

Modimo o na le tšhupamabaka ya gagwe gomme ka moka re karolo ya leano la gagwe le lekgethwa. Gantši, re wela molabeng wa go leka go bea Modimo ka gare ga lepokisi le re itiretšego lona. Re dumela gore re tseba bokaone le go letela Mohlodi wa rena go dira, ka menagano ya rena ya go dira diphošo, ka mo rena re ka bago re dirile mola re be re le yena.

Re a lemoga gore dilo tše di ka se hlalošwego, tša go makatša di direga kudu go batšwasehlabelo ba ba se nago molato lefaseng la rena le le welego. Modimo o kae ge go direga masetlapelo? Modimo o kae ge lehu, bolwetši bja go se alafege goba tlhalo e šwalalanya lelapa?

Ke selo se se tsebjago gore ge monna goba mosadi a lahlegelwa ke molekani ka lebaka la lehu, gantši ba befelela molekani ka ge a ba tlogetše. Gantši batho ba ba lego boemong bjo bjalo ba sola Modimo ka tobo ya bona gomme tumelo ya bona e a fokotšega.

Jesaya o bile le keletšo ya boruti go dinako tše bjalo ka tše: “Bakgopo a ba lahle ditiro tša bona, ba babe ba tlogele megopolo ya bona. A ba sokologele go Morena, mme yena o tla ba šokela; ba retologele go Modimo wa rena, ka gobane o swarela batho dibe gantšintši. Morena o re: ‘Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena’ ” (Jesaya 55:7-9).

Ka Manthole 1939 go be go le manyami a magolo go Britain. Kgoši George VI o boletše radiong, a lemoša balata ba gagwe ka dinako tše thata tše di tlago le go ba tutuetša ka mantšu a go ruma go tšwa go sereto, “The Gate of the Year”, ka Minnie Louise Haskins:

Ke rile go monna yo a bego a eme mojakong wa ngwaga:

“Mphe lebone gore ke kgone go sepela gabotse go ya go se se sa tsebjego.”

Gomme a araba:

“Eya leswiswing gomme o bee seatla sa gago Seatleng sa Modimo.

Seo se tla ba kaone go wena go feta lebone le go bolokega kudu go feta tsela e e sa tsebjego.”

Anke Moya wo Mokgethwa o re kgontšhe go dira ka mo go swango.