Thapelo – Letšatši la 4

Lenaneo la dipelaelo mabapi le dinako tše re phelago go tšona ke le letelele. Ga go motho yo o ka kopanago le yena yo a sa lapišwago ke ka tsela ye dilo di tsamayago ka gona – lenyalong la bona, maemong a bona a mošomo, mererong ya naga, le boemong bja lefase. Ke nnete, go na le dilo tše ntši tše o ka ipelaetšago ka tšona. Go na le dintwa le dikgaruru tše tšwelelago kua Middle East ye e šetšego e tletše ka dikgaruru le batšhošetši ba ba rulaganyago go balaya batho ba bantši ka mo ba ka kgonago, mola dikotsi tša tlhago bjalo ka phišo ya lefase ka bophara, meetsefula le ditšhikinyego tša lefase di dira gore re belaele le go feta. Ge o bogela ditaba go CNN le BBC, o ka se solwe go nagana gore go tla senyega go ya pele.

Gabotse, ditaba tše mpe ke gore dipelaelo tše ga se tše mpsha. Ge e le gore o hloka go gopotšwa ka se, bala mantšu a moprofeta Habakuku yo a tšerego dipelaelo tša gagwe a di iša go Morena: “Morena, na ke go bitše go fihlela neng ke kgopela thušo wena o sa ntheeletše?” (Habakuku 1:2a). Ekaba o no ipelaetša ntle le lebaka? Aowa, o emela phetolo ya Modimo. Se e be e le poledišano ya batho ba babedi.

Modimo o arabile ka gore bokgopo bo tla otlwa ka nako ya bjona. Ga bjale “yo a lokafaditšwego ke Modimo ka tumelo ya gagwe yena o tla phela” (Habakuku 2:4b). Modimo o botša Habakuku go gomarela dikholofetšo tša gagwe go sa šetšwe dinako tše bohloko: “Bjalo ka ge lewatle le na le meetse a mantši, batho ba lefase le bona ba tla ba le tsebo ye ntši ya bogolo bja Morena” (Habakuku 2:14).