Re bolokegile go Jesu Kriste – Letšatši la 1

Johanese F Kennedy o beilwe semmušo bjalo ka Mopresidente wa United States of America ka 20 Pherekgong 1961. O tla gopolwa go ya go ile ka lefoko le tee polelong ya gagwe ge a bewa semmušo: “Se botšiše gore naga ya gago e ka go direla eng, botšiša gore o ka direla naga ya geno eng.”

Ke ka lebaka la eng o sa amantšhe seo le boemo bja gago bja mošomo?

“Se botšiše gore mothwadi wa gago a ka go direla eng, botšiša gore o ka direla mothwadi wa gago eng.”

Temana ya rena ya Bibele e re botša gore ga go bohlokwa gore re dira eng eupša ka fao re dirago ka gona. Ka mantšu a mangwe, re swanetše go dira mešomo ya rena ka lerato le ka dipelo tša rena ka moka.

Ga go bonolo go ba le tlhohleletšo le phišego, go ka emelana le mathata le kgateletšego ye e bakago ke mošomo o mongwe le o mongwe. Simone (Petrose) o itemogetše dikgakanego tše swanago tša mošomo.

“Mong wa ka, re letše re katana bošego ka moka, fela ra se sware selo. Eupša ge o realo, ke tla no theošetša malokwa.” Ba ile ba a theošetša gomme ba swara dihlapi tše dintšintši, malokwa a ba a nyaka go gagoga. Lukase 5:5-6

Re ka ithuta go se gaešita le ge re šoma gaboima eupša re sa atlege, re swanetše go tšwela pele le go kgotlelela – re swanetše go theošetša malokwa gape! Re swanetše go tšwela pele go leka le go katana.

Paulose o bile le mantšu a temošo go bao ba kgathago tema dipolitiking tša lefelong la mošomo: “Fela ge le gobatšana ebile le rathaganyana, gona le itote, ka gore le ka fetšana taa.” Bagalata 5:15

Bjalo ka Bakriste, re swanetše go gopola gore go sa šetšwe gore boemo bja rena bja mošomo bo ba boima ga kaakang, mafelelong, ga re šomele batho eupša Morena – gomme Modimo wa rena a ka se kolote motho.