Re bolokegile go Jesu Kriste – Letšatši la 11
Ebangedi ya Monyetla wa Bobedi
(Di)temana ya Bibele
LUKASE 22
Jesu o botša Petrose gore o tlilo mo latola
JOHANESE 14
Sathane a ka ba a thabile kudu ge Simone Petrose a latola gararo gore o tseba Jesu, pele Simone a tšwela ntle, a lla gabohloko (Lukase 22:56-62). Sa pele, e bile Judase Eskariote gomme ga bjale ke Simone Petrose yo a tlogelago Jesu.
Le ge go le bjalo, go sa šetšwe gore re ba babe gakaakang, Jesu ka mehla o nea monyetla go bao ba itsholago ka nnete le go tla go yena go kgopela tebalelo.
E diregile go Petrose ge a be a le Letsheng la Tiberiase kua Galilea a na le Thomase, Nathaniele, Jakobose le barutiwa ba babedi bao ba sa bitšwego ka maina. Petrose a ya go thea dihlapi. Le bona ba ya le yena.
Ba thea bošego ka moka gomme ge go šetše go sele, ba bona monna a eme lebopong. E be e le Jesu eupša ba sa mo tsebe. A re go bona, “Banna, afa le tantše sa go šeba?” Ba araba, “Aowa, ga se ra tanya.” “Lahlelang lelokwa la lena ka lehlakoreng la go ja la leselawatle, gomme le tla tanya.” Ke moka ba lahlela lelokwa, gomme ba šitwa le ke go le gogela ka leselawatleng ka lebaka la bontši bja dihlapi.
Johanese a re go Petrose, “A! Ke Morena!” Petrose, a thabile kudu, a itahlela ka meetseng gomme a rutha go ya go Jesu. Barutiwa bale ba bangwe ba tla ka leselawatle, ba ntše ba goga lelokwa lela la dihlapi. Ba be ba se kgole le lebopo, ba ka ba dimetara tše lekgolo. E rile ge ba fologela lebopong, ka moka ba bona Jesu eupša ba ba le dihlong go mo thabela. A ba laletša gore ba je gomme morago ga go ja, Jesu a bolela le Petrose.
Gararo, Petrose a latola Jesu. Ga bjale, Jesu o mo fa monyetla wa bobedi. Gararo, Jesu o botšišitše Petrose, “Na o a nthata?” Nako le nako, Petrose a araba ka gore o a mo rata.
Re swanetše go kwešiša gabotse gore Jesu o be a hlaloša eng ge a botšiša Petrose gore o a mo rata. Bibele e hlaloša gabotse: “Yo a amogelago melao ya ka mme a e phetha, ke yena yo a nthatago. Gomme yo a nthatago ke yena yo a tlago ratwa ke Tate. Le nna ke tla mo rata, ka ikutollela yena.” Johanese 14:21
Na o a nthata? Ke potšišo e kgolo ye Jesu a botšišago mang le mang yo a bolelago le yena. Ge e ba ke, “Ee, ke a go rata gomme ke tla go obamela Morena”, ka gona go sa šetšwe dibe tše re latofatšwago ka tšona, re tla hwetša monyetla wa bobedi le mathomo a maswa, sathane a ka se re ubule ge re swere ke Jesu.
