Re bolokegile go Jesu Kriste – Letšatši la 16

Filipi e be e le yo mongwe wa batiakone ba bašupa bao ba kgethilwego semmušo ke Baapostola, ka kgopelo ya Bajuda bao ba bolelago leleme la Segerike (Ditiro 6:5-6). Filipi o bile le seabe se segolo bjalo ka moebangedi kua Samaria le go tliša lethabo le legolo motseng woo (Ditiro 8:6-8).

Morongwa o boditše Filipi go ya tseleng ya lešoka gomme o tla hwetša koloi ya mohlankedi yo mogolo wa go hlokomela mahumo a Kandase, kgošigadi ya Etopia, yo a bego a etšwa Jerusalema a eya Gasa.

Filipi a dira bjalo ka ge a boditše. Bibele e thala seswantšho se sebotse sa mantšu sa Filipi a kitima go bapa le koloi, moo mohlankedi wa mošate a bego a dutše gomme a bala pukung ya Jesaya. “A etša nku ye e išwago tlhabong, a ikhomolela bjalo ka kwanyana ye e kotwago, a se bolele selo. A kokobetšwa a se a sekišwa. Ga go yo a tlago bolela ka ditlogolo tša gagwe, gobane bophelo bja gagwe lefaseng bo a kgaotšwa.” Ditiro 8:32-33

“Na seo o se balago o a se kwešiša?” Filipi a botšiša. “Nka se kwešiša bjang ke se na wa go ntlhalošetša?” mohlankedi a araba.

A kgopela Filipi gore a namele a dule le yena ka koloing gomme Filipi a mo hlalošetša taba ye botse mabapi le Jesu. Ba fihla mo go nago le meetse gomme mohlankedi a kgopelwa go kolobetšwa. Morago ga ge Filipi a mo kolobeditše, ba arogana, ba se sa bonana. Moya wa Morena wa široša Filipi gomme mohlankedi a tšwela pele ka leeto la gagwe, a thabile.

Batho ba babedi, ba hlahlwa ke Moya wo Mokgethwa, ba abelana ebangedi ya Morena Jesu Kriste. Yo mongwe a hlaloša tsela mola yo mongwe a amogela le go gafela Morena bophelo bja gagwe.

Tiragalo e diragaditšwe gantši mengwageng. E direga ge badumedi, bjalo ka nna le wena, ba abelana taba ye botse ya Jesu Kriste. Ka go dira bjalo, re tliša letago go yo a gafilego bophelo bja gagwe ka lebaka la rena.