Re bolokegile go Jesu Kriste – Letšatši la 18

Na e sa le wa ikhwetša o le ka gare ga boemo bjo bo beago bophelo kotsing? E sa le wa lebelela ka gare ga mahlo a motho goba batho ba ba go hlaselago gomme wa kwa maatla a maikemišetšo a bona a bosenyi le a polao?

Batho ba araba ka mo go fapanego maemong a bjalo. Go thwe re tla araba ka e tee ya ditsela tše tharo. Ra ema, ra lwa (ge re kgona) goba ra tšhaba.

Ga go na dihlong ka go boifa, ke karolo ya tlhago ya batho. Le ge go le bjalo, tshwaro ya yona e ka re tlogela re se na maatla gape re hlaselega gabonolo.

Poifo ya go ka kwešwa bohloko mmeleng le lehu ga se dipoifo fela tše di kago re tlaiša. Go na le dipoifo tše dingwe tše re kopanago le tšona bophelong. E ka ba poifo ya bokamoso ye e re tlaišago, poifo ya phetogo, poifo ya tobo, poifo ya go se šome, poifo ya bolwetši, bjalobjalo lenaneo ke le le telele.

Modimo o na le karabo e tee go dipoifo tša rena ka moka. O neile karabo ye e swanago go Isaka. “O se ke wa boifa; ke na le wena.” (Genese 26:24)

Jesu o re rutile gore tumelo le go tshepha Modimo go fenya poifo. O re rutile go ithuta go kabelo ya Modimo go dinonyana. Jesu o re netefaleditše gore re ba bohlokwa kudu go Modimo le gore o tlo re nea dinyakwa tša rena. Go balabala ka merero e bjalo go ka se, boemong le ge e le bofe, re thuše go phela lebaka le le telele (Mateu 6:25).

Jesu o rile ga re a swanela go balabala ka go hloka dijo le diaparo, bjalo ka ge baditšhaba ba dira. Go e na le moo, re swanetše go phela letšatši le tee ka nako le go tsepelela ka mo go feletšego go mmušo wa Modimo, le gore Tate wa rena wa magodimong o nyaka re dire eng (Mateu 6:33).

Tsela e tee feela ya go fenya poifo ke go bea tumelo e feletšego le tshepo go Morena wa rena Jesu Kriste. Ke Mophološi wa rena, Mogwera wa rena le Mothuši. Bea seatla sa gago ka gare go sa gagwe gomme o tla go kgontšha go sepela tsela ya bophelo ka ntle le poifo.