Re bolokegile go Jesu Kriste – Letšatši la 22
Morena wa Rena o Kgauswi le go Tla
(Di)temana ya Bibele
JOHANESE 14
Go tloga ka nako ya thotogelo ya Morena wa rena, Bakriste ba hlologela le go holofela go boa ga gagwe. Batho ba ba profetilego letšatši la go boa ga Morena wa rena le bofelo bja lefase ba forile Bakriste ba bangwe.
Baprofeta ba maaka ba bokane le bao ba ba kgolwago le go letela letšatši leo ka tetelo e kgolo, fela go nyamišwa ka ge Morena wa rena a sa boa ka ge ba profetile.
Jesu o a boa. Kholofetšo ya gagwe ke nnete. “Ke tla boa ka tla ka le tšea gore le lena le yo ba mo ke lego gona” (Johanese 14:3). Le ge go le bjalo, mo ke moo bao ba profetago letšatši la go boa ga gagwe ba fošago. Morena wa rena ka noši o rile ga se taba ya rena go tseba dinako le mabaka ao Tatagwe a a beilego ka maatla a gagwe yena mong (Ditiro 1:7).
Temaneng ya rena ya letšatši, Modimo o hlalošwa bjalo ka “Modimo wa Kholofelo”. Ke tlhalošo ya moswananoši ye e sa hwetšagalego go gongwe Bibeleng. Kholofelo gammogo le tumelo le lerato, ke e nngwe ya dilo tše tharo tše di dulago di le gona tšeo Bakriste ba šegofaditšwego ka tšona (1 Bakorinte 13:13).
Ge Modimo a hlola lefase, Modimo a lebelela tšohle tše a di dirilego mme a kgahlega kudu (Genese 1:31). Le ge go le bjalo, dilo tša se sepele gabotse ge sebe se fihla lefaseng. Go tloga ka nako yeo, tlhago ye e welego e be e se na kholofelo.
Bakriste ba amega go tše di diregago lefaseng. Ka dinako tše dingwe, maphelo a rena e ba tlhakatlhakano, kudukudu ge dikholofelo le ditoro tša rena di sa direge. Tše dingwe tša dikholofelo tša rena e ba nnete gomme tše dingwe e ba manyami a magolo, le go dira gore re be le kgateletšego ya monagano. Le ge go le bjalo, ga re a swanela go nolega moko. Modimo wa Kholofelo ke mothopo wa dikholofelo tša rena ka moka.
Jesu o gafile bophelo bja gagwe sefapanong go re hlakodiša go boemo bja go hloka kholofelo gomme ga bjale, re ka thaba nneteng e feletšego ya gore o a boa.
Mantšu a mafelelo ka Bibeleng a re, “Ee, ke kgauswi le go tla.” Go seo, gammogo le Bakriste ka moka go tloga ka thotogelo ya gagwe, re ka bolela ka tetelo ye e nago le kholofelo gore, “Amene! Etla, Morena Jesu!”
