Re bolokegile go Jesu Kriste – Letšatši la 8

Re botšwa ka mehla gore re dula motsaneng wa lefase ka bophara. Lefase ka nnete ke le le nnyane. Ga bjale, Afrika Borwa e na le batho ba bantši ba ba diilago. Banna le basadi ba tšhabile go mebušo e šoro le ditikologo tša ntwa go nyaka mafelo a šereletšegilego kudu ka tlase ga letšatši le boleta.

Ka moka ba hlologela botho gomme ba bantši ba nyaka thušo. Re swanetše go leka go thuša moo re kago kgona, ka ge ditlhaselo tša lehloyo go batšwantle di se na lefelo semelong sa Bakriste. Kgoši Jesu o tla re ka letšatši le lengwe, “Ruri, ke le botša gore ge le be le sa direle yo mongwe wa banyatšegi ba, ke gona ge le be le sa direle nna.” Mateu 25:45

E re ke dire gore le kwišiše gabotse. Selo se tee seo malapa a mantši a swanago ka sona ke batho ba go diila. Batho ba bangwe ba a diila ka gobane ba dirile diphetho tše di fošagetšego mengwageng ya bona ya pele gomme ba paletše ke go fenya ditlamorago. Ba bangwe ba diila ka ka lebaka la maemo ao ba ka se a laolego.

Motho yo mongwe e sa le a mpotša ka manyami a gagwe ge a ekwa la pele gore morwarragwe o lahlegetšwe ke tšohle tše a bego a na le tšona gomme ga bjale o dula mekgotheng ka ge bophelo bo le boima go yena. Ka morago ga dikgwedi, o be a otlela kombi ya gagwe, le bana ba gagwe le bagwera ge a bona morwarragwe a sepela ka thoko ga tsela. Ka ge a be a sa nyake gore bana ba gagwe ba lewe ke dihlong, o ile a lebelela ka lehlakoreng le lengwe gomme a oketša makhura a feta morwarragwe.

Malapa ao a bego a tlemagane, ka dinako tše dingwe a arogana. Diwili le ditestamente gape di ka baka lehloyo le karogano. Gantši, bana ba motho ba arogana gabonolo ge ba latela dikgahlego tša bona gomme ba fetoga batho ba šele.

Go ka ba le se sengwe sa go kgahliša ka go amogela baeng legaeng la gago, ka go tseba gore e ka ba barongwa. Le ge go le bjalo, go ba le lethabo ge badiidi ba kokota, ka gobane re a tseba gore ga se barongwa. Gantši, ba baka dihlong ge ba fihla ntle le taletšo.

Ka ntle le pelaelo, monna wa mohumi seswantšhong sa Jesu o be a ikwa ka mo go swanago ge Lasarose a fihla lesorong la gagwe, a duma “go iphepa ka marathana a a wago tafoleng ya gagwe” (Lukase 16:20). Le ge go le bjalo, pheletšo e bohlokwa. Lasarose a ya legodimong mola monna wa mohumi a ile diheleng. Dithoto ka moka tša monna wa mohumi ga di a mo hola ka selo. Lasarose o be a sa nyake tše ntši, botho le marathana a a wago tafoleng ya mohumi yoo.

Mohlomongwe, motho yo a bego a le kgauswi le wena o hlologela go kwa go tšwa go wena gape. Tsela e tee ya go ka tseba seo ke go ikgokaganya le yena. Dira seo ga bjale, ka gobane selemo e ka ba ngwagola.