Tema ya mehlare ka Bibeleng – Letšatši la 21

Nakong e fitilego mogwera wa ka o nthometše sereto ka Alfred Joyce Kilmer (1886-1918), sereti sa mo-Amerika le mongwadi wa ditaba. O ngwetše sereto ka 1913 gomme se be se bitšwa “Mehlare”.

Ke nagana gore nka se sa bona
Sereto se sebotse bjalo ka mohlare.

Mohlare wo molomo wa wona o swerego ke tlala o ikemišeditše
Kgahlanong le leumo le elago ga monate la lefase;

Mohlare wo o lebelelago go Modimo letšatši ka moka,
Le go phagamiša makala a matlakala go rapela;

Mohlare wo ka selemo o kago apara
Sehlaga sa dinonyana moriring wa wona;

Wo godimo ga sefega sa wona go nago le lehlwa;
Wo mafelelong o dulago le pula.

Direto di dirwa ke ditlatla bjalo ka nna,
Eupša ke Modimo fela yo a ka dirago mohlare.

Methaladi ye e hlaloša gabotse bohlokwa bja leeto la rena ka gare ga mehlare ya Bibele kgwedi ya go feta! Gopola ka mohlare o mmotse wa mosedere goba mohlare o mo telele wa mophaene o emiša makala a wona a matlakala go rapela, dinonyana di agile dihlaga mohlareng wa modiwane wo o bapilego le meetse goba mogo wo o phetšego kgauswi le pula.

Re ka aga dikepe le meago ye metelele le difouno tša maemo a godimo eupša re ka se tšweletše mohlare. Ke Modimo fela yo a kago tšweletša mohlare. Ke Modimo fela yo a kago hlola mogarenate o mmotse wa sebopego sa mphapahlogo le mohlare wa mopalema wo o atlegago leganateng goba moeike o tiilego.

Mogwera wa ka o okeditše ka gore sereto se se mo gopotša Pesalome 1, e lego moo ge e le gabotse re thomilego poledišano ya rena ya mehlare. Mopesalome o re bao ba naganišišago ka Lentšu la Modimo ba lehlogonolo le gore ba bjalo ka “mohlare mobjalwamoeleng; wa enywa dikenywa lebakeng la gona, le gona wa se pone matlakala. Go tšohle tše a di dirago o a atlega”. A re be bjalo ka mohlare — wo o bjetšego ke Modimo, o khothago ke Lentšu la gagwe le go nošetšwa ke Moya wa gagwe gore re tšwele pele le go tšweletša dikenywa tše botse.