Tlaišego, tsogo le lerato la Bakriste – letšatši la 12
Tsogo e go dira motho wa seetša
(Di)temana ya Bibele
BAEFESO 5
Go be go na le kgoši ye e bego e dula ka mošate o mmotse kudu kua Austria, mo e ka bago mengwaga e 400 ya go feta. Balata ba gagwe ba be ba botega go yena, ka gona a nyaka go ba tlogelela se sengwe. Mafelelong, o tšere sephetho sa go thuba kereke ya bona ya kgale ye e bego e hlagetše gomme a aga e mpsha. O be a ikwa gore e mo fa kgopolo e fošagetšego ka Bokriste, gore o dula ka gare ga mošate o mmotse kudu mola badumedi ba tumiša Kgoši ya legodimo ka gare ga moago wo o bego o le kgauswi le go wa.
Setšweletšwa sa mafelelo e bile kereke e botse ya go agiwa ka maswika. Diswantšho tše betlilwego di be di kgabišitšwe ka dišupo tša go fapafapana tša Bokriste. Mafesetere a digalase tša mebala a be a hlaloša kanegelo ka moka ya Jesu. Tora ya kereke e be e šupile lefaufaung go Modimo bjalo ka monwana. Ka nnete e be e le tokelo ya go ikgetha go rapela ka go yona. Ka gare, o ikwetše o le kgauswi le Modimo gomme o be o itemogela bogona bja gagwe.
Ge batho ba bokana go tla go neela ka kereke, senwelo sa bona se be se tletše se falala ka lethabo le tebogo. Morwedi wa kgoši, le ge go le bjalo, o sebetše tatagwe ka tsebeng a re: “Eupša tate, ga gona mabone ka kerekeng.” Kgoši o šupile dihlomamabone tše di bego di se na mabone lebotong la kereke. O emeletše a re: “Bagwera, kereke ga e na mabone. Yo mongwe le yo mongwe wa lena o tla tla le lebone la gagwe. Nakong ya tirelo, lebone la gago le tla bonegetša karolo ya kereke. Ge motho a sa tle kerekeng, karolo ya gagwe ya kereke e tla ba leswiswing, gape le tsela ye a sepelago ka yona ge a etla kerekeng. Le a gopola se Jesu a re rutilego sona?” Kgoši a ruma polelo ya gagwe ka mantšu a: “Le seetša sa lefase.”
Ka gona, kereke ye e ile ya tsebja bjalo ka “Kereke ya Mabone”.
Tsogo ya Jesu e thubile ditlemo tša leswiswi go re fa seetša sa go ya go ile. Le rena, bao re tsošitšwego le Kriste, re swanetše go dumelela seetša se go bonegetša maphelo a rena letšatši le letšatši.
O tla bonegetša bjang seetša sa Jesu go batho ba o kopanago le bona lehono?
