Tlaišego, tsogo le lerato la Bakriste – letšatši la 15

Go bontšha lerato la nnete ke selo se tee fela seo se tlago bontšha lefase gore Jesu ka nnete o dira phapano maphelong a batho. Kerekeng ya pele, Bokriste bo phatleletše ka lebelo lefaseng la boheitene ka gobane balatedi ba Kriste ba phetše ka lerato la go hloka mellwane. Ba be ba kwešiša seo lerato la Kriste le bego le le mabapi le sona. E be e le lerato la go ikgafa leo le sa tsebego mellwane. Setšhaba sa baheitene se ba lemogile bjalo ka batho bao ba bego ba phela ka mo go fapanego, e se ka gobane e le ba bakaone, eupša ka gobane ba be ba hlankela. E be e le boebangedi bjo kwagalago bjo bo kgontšhitšego kereke go gola.

Pukung ya gagwe ya The Rise of Christianity, setsebi sa tša leago Rodney Stark o bolela ka malwetši a mabedi a kotsi a go fetela kudu ao a hlasetšego Mmušo wa Roma ka 165 AD le 251 AD ka tatelano. Nako e nngwe le e nngwe, batho ba e ka bago tee-tharong ya setšhaba sa Mmušo wa Roma ba be ba hlokafala. Setlwaedi sa Baroma e be e le go bea batho ba bona ba ba babjago mekgotheng go fokotša kotsi ya phetelo. Bao ba bego ba kgona ba tšhabetše dithabeng go efoga bolwetši. Dionysius, Mopišopo wa Alexandria, o ngwetše gore Baroma ba be ba swara batho bjalo ka ditšhila go efoga bolwetši.

Bakriste ba ikarabetše ka mo go fapanego. Go ngwetšwe gore Bakriste ba tšwetše pele go hlokomela balwetši ba bona le ge ba be ba lebeletšane le lehu le bona. Ba latile Baroma, bao ba bego ba lahlilwe mekgotheng, ba ba amogela dintlong tša bona le go ba hlokomela. Bakriste ba bantši ba hlokafetše ka lebaka la seo, eupša go be go le ka lethabo gore ba rwetše manyami a batho ba bangwe, ba ba hlokomela le go dira gore ba iketle, le ge seo se lobišitše maphelo a bona. Tumelo ya Bakriste e tlišitše kgopolo e mpsha lefaseng la Roma; gore lerato ga le na mellwane gomme ga se la motho o tee fela, gomme ba se kgaotše go bontšha lerato go Bakriste-gotee. Batho ba ba go botega ba dirile gore ba bangwe ba nagane gabedi ka maphelo a bona gomme kereke ya tšwela pele go matlafala.