Tlaišego, tsogo le lerato la Bakriste – letšatši la 5
Tsogo ya Jesu ke DNA ya Bokriste
(Di)temana ya Bibele
1 BAKORINTE 15
Paseka e thoma ka Lebohlano le Lebotse le Sontaga la Paseka, e fela ka Letšatši la Thotogelo. Ye ke nako ya ngwaga ge Bakriste ba kanya ka tsogo le seabe se e nago le sona maphelong a bona. Tsogo ke matswalo a Bokriste.
1 Bakorinte 15:17-18 Gomme ge eba Kriste ga se a ka a tsošwa, tumelo ya lena e ka se le hole ka selo, le dibe tša lena ga se tša swarelwa. Le gona ke go re bao ba ithobaletšego ba dumela go Kriste ba timetše.
“Ebangedi ya Kriste ke ebangedi ya tsogo. Tsogo ke pelo ya tumelo ya Bokriste, bophelo le thutatumelo” (Dirkie Smit). Tsogo e dira gore Bokriste e be bja moswananoši. E fapantšha Bokriste go ditumelo tše dingwe. Ka ntle tsogo, Bokriste ke fela tumelo ye nngwe goba filosofi ye e nago le dithuto tše ntši le mekgwa e mebotse ya godimo ya boitshwaro. Ke tsogo ya Kriste ye e re neago maatla a go fetoša bophelo. Go dumela go tsogo ya Kriste, go hlaloša gore badumedi ba na le pono e mpsha le bokamoso bjo boswa bophelong.
Go hlaloša gore badumedi ba na le pono e fapanego bophelong ge ba bapetšwa le bao ba sa dumelego. Se ga se hlaloše gore bophelo bjo boswa ga bo na tlaišego, bohloko le manyami, eupša se dira gore bophelo bo be le morero. Se hlaloša gore lehu ga se pheletšo, eupša mathomo a maswa. Jesu o tsogile ka nnete! O ile go yo re lokišetša lefase le leswa leo le re emetšego!
Ge o sa dumele go tsogo, bophelo bja gago bo fela lefaseng le le ditlaišego tša lona ka moka le manyami! Ga gona bophelo go wena ka morago ga mo. Ke tsogo ye e dirago gore Bokriste e be bja moswananoši kudu le go kgahliša! Tumiša Jesu ka se!
Jesu o tsogile bahung ka letšatši la pele la beke (Sontaga). Ka morago ga se, Bakriste ba bokane ka letšatši la pele la beke pele ba thoma go šoma le go tumiša Modimo ka thapelo, ba opela le go bala Mangwalo a Makgethwa. Mathomong, Sontaga (letšatši la pele la beke) e be e le letšatši le le tlwaelegilego. E bile fela ka nako ya Constantine (321 AD) moo Sontaga semmušo e bilego letšatši la semoya moo batho ba bego ba sa swanela go šoma. Ka gona ba kgonne go keteka tsogo ya Jesu mmogo letšatši ka moka.
