Tlaišego, tsogo le lerato la Bakriste – letšatši la 7
Tsogo ya Jesu e nea bophelo bja gago morero
(Di)temana ya Bibele
JOHANESE 20
Jesu o itšweletša go barutiwa ba gagwe
Filimi ya dithalwa tše di fetošwago diswantšho ya Finding Nemo e tantše diswantšhokgopolo tša babogedi go ralala le lefase ge e be e lokollwa. Ge e le gore ga se wa e bogela, o tla thabela go e bogela!
Go na le motsotso o kgomago pelo filiming. Nemo o monnyane o swere ka gare ga sebjana sa go lokela dihlapi ka ofising ya ngaka ya meno – o ikwa a se na kholofelo le go nolega moko. O tšea sephetho sa gore ga go na kholofelo go yena. Gomme, kukara e a fihla lefasetereng la ofisi ya ngaka ya meno gomme e mmotša ditaba tša gore tatagwe o a mo tsoma le go rutha go yo fihla Sydney go mo phološa! Ditaba tšeo di be di lekane go Nemo! Gateetee, boitshwaro bja gagwe ka moka bja fetoga. Gape, o be a ikemišeditše go lwa le go dira maano a go tšwa ka fao – gomme a kgona go dira seo!
Ke eng seo se fototšego boitshwaro bja gagwe kudu? Molaetša wa gore tatagwe o be a mo tsoma le gore o be a ka se ineele go fihla Nemo a hwetšwa. Seo se mo file kholofelo le lebaka la go phela.
Re bala Bibeleng ka fao barutiwa ba Jesu ba bego ba nolegile moko morago ga lehu la gagwe. Ba naganne gore tšohle tše ba di lwetšego le tšeo Jesu a ba rutilego tšona e be e le lefeela! Go be go se sa na selo se bohloko! Molaetša wa kholofelo o hlakafetše le Jesu!
Gomme, Jesu yo a tsogilego bahung a tšwelela go bona gomme ba kwešiša! Ka nnete o tsogile bahung bjalo ka ge a holofeditše. Seo se fetotše pono ya bona ya bophelo ka mo go feletšego. Gateetee, ba be ba ikemešeditše go ya lefaseng go yo botša bohle ka phološo ya Jesu!
Ke eng seo se fetogilego? Ba lemogile gore dikholofetšo tša Jesu e be e le nnete, le gore ka nnete o tsogile bahung le go thuba ditlemo tša lehu. Ga bjale, ba na le lebaka la go phela. Go tloga ka nako yeo go ya pela, lehu e be e se pheletšo, eupša mathomo a maswa.
