To The Word – Day 105

₁Wena Jerusalema, tsoga!

Tsoga, o tie gape!

Wena Sione,

motse wo mokgethwa wa Modimo,

apara diaparo tša botšhepi!

Moditšhaba le yo a sego a hlweka a ka se sa tsena go wena.

₂Ithinthe lerole, wena Jerusalema, itokolle bokgobeng!

Emelela o dule setulong sa gago sa bogoši!

Tlemollang ditlemo tše le tlemilwego melala ka tšona,

lena mathopša a Sione!

₇Go botse bjang go bona motseta a etla a theoga dithabeng a re tlela le ditaba tše dibotse,

ditaba tša khutšo!

O bega go fenya ntweng,

o botša batho ba Sione o re:

“Modimo wa lena ke Kgoši!”

₈Baleti ba motse ba hlaboša mantšu,

ba goa mmogo ka lethabo.

Ba bona Morena ka a bona mahlo ge a boela Sione.

₉Hlabang mekgolokwane,

lena marope a Jerusalema!

Morena o tlilo hlakodiša motse wo,

mme a homotša setšhaba sa gagwe.

₁₀Morena o tlilo dira taba ye kgolo ka maatla a gagwe a makgethwa ditšhaba di lebeletše;

batho ba dinaga tša kgole ba tla bona

ge a phološa setšhaba sa gagwe.

₁₁Hudugang! Hudugang!

Le tlogeng Babilonia,

lena barwadi ba dibjana tša Tempele!

Le se kgome selo se se sego sa hlweka;

le dule le itlhwekišitše gomme le huduge.

₁₂Bjale le ka se tloge ka lepotlapotla;

le tla be le sa tšhabe.

Morena o tla le eta pele,

gomme yena Modimo wa Israele a ba a le leta a le šetše morago.

“Mohlanka wa ka o tla atlega modirong wa gagwe;

o tla hlompšha, a godišwa kudu.

₁₄Batho ba bantši ba ile ba kgotsa ge ba mmona;

o be a sentšwe sefahlego e bile nke ga se motho,

a gobaditšwe mme a sa swane le batho.

₁₅Eupša bjale ditšhaba tše dintši di tla mo makala,

le magoši a hloka molomo ge a mmona.

Ba tla bona tše ba bego ba se ba di botšwa,

ba kwešiša tše ba bego ba se ba di kwa.”

“Ke mang yo a bego a ka dumela tše bjale re di begago?

Le gona ke mang yo a bego a ka bona gore tše ke ditiro tša Morena?

₂Mohlanka wa gagwe o godile pele ga gagwe bjalo ka lehlogedi,

boka modu wo o melago mobung wo o omilego.

O be a se ne seriti le gona e se yo mobotse mo re bego re ka mo šetša.

Mo go yena go be go se se se re kgahlago,

mo re bego re ka mo kganyoga.

₃Re be re mo nyatša,

re mo gana;

o be a phela a tlaišwa,

a tlwaetše go kwešwa bohloko.

Go be go se na le motho yo a ratago go mo lebelela –

re mo nyatša mme re sa mo šetše.

₄“Eupša mahloko ao a bego a lebane rena a kwelwe ke yena;

ditlaišego tše di bego di re swanetše di wetše yena,

mola rena re be re gopola gore o otlwa ke Modimo ka matshwenyego ao.

₅Eupša o hlabilwe ka lebaka la dibe tša rena,

a otlwa ka lebaka la makgopo a rena.

Rena re ile ra boelanywa le Modimo ka go otlwa moo ga gagwe,

ra fodišwa ke dintho tša gagwe.

₆Ka moka re be re swana le dinku tše di timelago,

mongwe le mongwe a eya mo a ratago gona.

Eupša Morena a mo rweša makgopo a rena bohle.

₇“O ile a swarwa gampe,

eupša yena a ikokobetša,

a se ke a re selo.

A etša kwanyana ye e išwago tlhabong,

a ikhomolela bjalo ka nku ye e kotwago –

a se ke a bolela selo.

₈O ile a swarwa, a ahlolwa, a tšewa a yo bolawa,

mme le o tee wa batho ba mehleng yeo

a se ele tša go bolawa ga gagwe hloko.

₉Le ge ba be ba rerile go mmoloka le disenyi,

o ile a bolokwa ka lebitleng la mohumi.

O be a se a ka a oba molato goba a bolela maaka.”

“E be e le thato ya ka gore go bolawe yo ke dirilego gore a tlaišwe;

lehu la gagwe e bile sehlabelo sa tebalelo ya dibe.

Ka gona o tla phela nako ye telele,

a ba a bona ditlogolo tša gagwe,

mme nna ka phethagatša merero ya ka ka yena.

₁₁Ka morago ga go tlaišwa le go bolawa o tla buša a phela.

O tla tseba gore ga se a tlaišetšwa lefeela.

Mohlanka wa ka yo a se nago bosodi o tla otlwa legatong la ba bantši,

mme, ka lebaka la gagwe, ka ba swarela.

₁₂Ka gona ke tla dira gore a godišwe,

a dule le banna ba go hlomphega.

O gafile bophelo bja gagwe ka go rata,

a tlaišwa bjalo ka disenyi,

le ge a be a rwele dibe tša ba bantši,

mme a rapela gore badiradibe ba swarelwe.”

₁Wena Jerusalema,

o be o swana le mosadi wa moopa,

mosadi yo a sa belegego.

Eupša bjale opela ka lethabo,

o duduetše o hlaba le mekgolokwane.

Wena o bego o le noši o tla ba le bana ba bantši,

wa fetiša le mosadi yo a nago le monna.

₂Katološa tente ye o dulago ka go yona ka go phurolla seila ya yona,

o telefatše dithapo,

o tiiše le dikokotela.

₃Wena Jerusalema,

o tla oketša naga ya gago ka mathoko ohle;

ditlogolo tša gago di tla thopa naga ye bjale e dutšwego ke ditšhaba tše dingwe.

Metse ye bjale e lego marope

e tla dulwa ke batho.

₄O se ke wa boifa,

ka gobane o ka se sa gobošwa,

o ka se lešwe dihlong gape.

O tla lebala ge o kile wa goboga mola o sa le yo mofsa;

o ka se sa gopola kgobogo yela ya bohlologadi bja gago.

₅Mmopi wa gago o tla ba bjalo ka monna wa gago;

leina la gagwe ke Morena Ramaatlaohle.

Mophološi wa gago ke Modimo yo mokgethwa wa Israele;

ke yena Modimo wa lefase ka moka.

₆Wena Israele, o swana le mosadi yo mofsa yo a lahlilwego ke monna gomme a nyamile kudu.

Eupša Morena o go bitša gore o boele go yena mme o re:

₇“Ke ile ka go lahla lebakanyana fela;

bjale ke tla go iša gae ke go rata kudu.

₈Ke ile ka go furalela lebakanyana ke sa selekegile;

bjale ke tla go rata go ya go ile.”

O realo, Morena, Mophološi wa gago.

₉O tšwela pele o re:

“Mehleng ya Noa ke ile ka ena gore nka se sa tsoga ke tlišitše meetsefula lefaseng.

Bjale ke ena le gore nka se sa go galefela gape goba ka go kgalemela.

₁₀Le ge dithaba di ka šutha,

meboto ya šikinyega,

nna nka se tsoge ke lesitše go go rata.

Ke go holofetša gore ke tla phela le wena ka khutšo go ya go ile.”

₁₁O realo, Morena, morati wa gago.

“Jonna, wena Jerusalema,

motse wo o tlaišegago,

o sa kgonego go itwela,

o hlokago mohomotši!

Ke tla aga metheo ya gago ka maswika a bohlokwa a botala bja legodimo,

ka swaraganya maswika a leboto ka leraga le le tiilego.

₁₃Ke tla aga dibo tša gago ka magakabje a mahwibidu,

difero ka di aga ka magakadima,

gomme merako ya gago yona ya ba ya mabenyabje.

₁₄“Nna ka noši ke tla ruta setšhaba sa gago,

ka se tlišetša boiketlo le katlego.

₁₅O tla tiišwa ka toka.

O ka se boife go gatelelwa,

ebile o ka se tsoge o tšhošeditšwe.

₁₆Ge manaba a ka go hlasela a tla be a se a hlohleletšwa ke nna.

O tla fenya bao ba lwago nago.

₁₇“Ke nna ke bopilego morulatshipi yo a butšwetšago mollo,

gomme a dira dibetša ka bokgoni bja gagwe.

Le mohlabani yo a bolayago ka dibetša tšeo o bopša ke nna.

₁₈Eupša wena ga go sebetša se o tlago hlaselwa ka sona sa go gobatša.

Bohle bao ba go pharago ka molato tshekong

o tla ba bontšha gore ke bona ba nago le molato.

Ke ka moo ke tlago dira gore bahlanka ba ka ba bolokege,

ka dira le gore ba fenye.”

O realo, Morena.

“Etlang, bohle lena le nyorilwego –

meetse šea!

Etlang, lena le se nego tšhelete –

rekang mabele le je!

Ee, etlang le reke beine le maswi –

ga go lefiwe selo!

₂Le senyetšang tšhelete ka tše di sa khorišego?

Le reng le reka dijo ka meputso ya lena

etšwe di sa le khoriše?

Ekwang nna mme le phethe

tše ke le botšago tšona,

ke mo le tlago ipshina ka dijo tše dibosebose.

₃“Ntlhwaeleng ditsebe,

lena setšhaba sa ka,

le tle go nna;

le ntheeletše, gomme le tla phela!

Ke tla dira kgwerano ya go ya go ile le lena,

gomme ka le fa ditšhegofatšo tše di sa felego,

tše ke di holofeditšego Dafida.

₄Ke ile ka mo dira moetapele le molaodi wa ditšhaba,

gomme ka yena ka ba bontšha maatla a ka.

₅Bjale le tla bitša ditšhaba tše le bego le sa di tsebe,

mme le tšona di sa le tsebe;

di tla tla go lena di kitima!

Tšeo di tla direga ka gobane nna,

Morena Modimo wa lena,

Modimo yo mokgethwa wa Israele,

ke tla dira gore le hlomphege.”

₆Retologelang go Morena a sa le file sebaka;

mo rapeleng a sa le kgauswi.

₇Bakgopo a ba lahle ditiro tša bona,

ba babe ba tlogele megopolo ya bona.

A ba sokologele go Morena,

mme yena o tla ba šokela;

ba retologele go Modimo wa rena,

ka gobane o swarela batho dibe gantšintši.

“Megopolo ya ka ga e swane le ya lena,

le ditsela tša ka di fapana le tša lena.

₉Bjalo ka ge magodimo a phagame kudu ka godimo ga lefase,

ka wona mokgwa woo ditsela le megopolo ya ka di ka godimo ga tša lena.

₁₀“Lentšu la ka le bjalo ka pula le lehlwa,

tšona di nago di etšwa godimo.

Ga di boele morago,

di fela di thapiša lefase, di hlogiša dibjalo,

tša medišetša balemi peu mme tša tlišetša batho dijo.

₁₁Ke ka moo lentšu le ke le bolelago le tlago ba ka gona –

lona le ka se palelwe ke go dira se ke ratago gore le se dire;

gape le tla atlega go tše ke le romago gore le di dire.

₁₂“Lena le tla tšwa motseng wa Babilone ka lethabo;

la iketla le etetšwa.

Dithaba le meboto di tla duduetša ge le batamela,

le mehlare ya naga e tla phaphatha diatla e thabile.

₁₃Mephaene e tla mela mo bjale go metšego mehlašana ya meetlwa,

legatong la ditshehlo go tla mela memirte.

Seo e tla ba sešupo sa go ya go ile se se ka se senyegego,

ya ba segopotšo sa tše di dirilwego ke nna, Morena.”