To The Word – Day 13

₁Ka morago ga lebaka Josefa a botšwa gore tatagwe o a babja. Ka gona a tšea barwa ba gagwe ka babedi, Manase le Efraime, a yo bona Jakobo. ₂Ge Jakobo a botšwa gore Josefa, morwagwe, o tlile go mmona, a itiiša, a tsoga a dula malaong. ₃A re go Josefa: “Modimo Ramaatlaohle o iponagaditše go nna kua Luse, nageng ya Kanana, a ntšhegofatša. ₄A re go nna: ‘Ke tla go fa bana ba bantši, mme ditlogolo tša gago e tla ba ditšhaba tše ntši; ke tla fa ditlogolo tša gago naga ye gore ba dule go yona go ya go ile.’ ”

₅Jakobo a tšwela pele a re: “Josefa, barwa ba gago ka babedi bao o ba belegetšwego mo Egepeta pele ga ge ke etla mo, ke ba ka; Efraime le Manase ke ba ka bjalo ka Rubene le Simeone. ₆Ge o ka ba le barwa ba bangwe gape, e ka se be ba ka; bohwa bjo ba bo hwetšago bo tla tla ka Efraime le Manase. ₇Ke dira se ka lebaka la Ragele, mmago. Ke ile ka nyama kudu ge a hlokafalela nageng ya Kanana, re šetše re batametše Efrata, ge ke boa Mesopotamia. Ke mmolokile fao ka thoko ga tsela ya go ya Efrata.”

Efrata bjale e tsebja ka la Betlelehema.

₈Ge Jakobo a bona barwa ba Josefa, a mmotšiša a re: “A bašemanyana ba ke bomang?”

₉Josefa a mo fetola a re: “Ba ke bona barwa ba ka bao Modimo a mphilego bona mo Egepeta.”

Jakobo a re: “Ba tliše mo go nna gore ke ba šegofatše.” ₁₀Mahlo a Jakobo a be a šetše a fifala ka lebaka la botšofadi, mme o be a sa bone gabotse. Josefa a tliša bašemanyana bao go yena, mme Jakobo a ba ubarela, a ba atla. ₁₁A re go Josefa: “Ke be ke sa gopole gore ke tla go bona gape, gomme bjale Modimo o ntirile gore ke bone le bana ba gago.” ₁₂Ke moo Josefa a ba tšerego difarong tša Jakobo, a obama pele ga gagwe.

₁₃Josefa a tšea Efraime ka letsogo la gagwe la go ja, a mmea go lebana le la nngele la Jakobo, gomme a tšea Manase ka letsogo la gagwe la nngele, a mmea go lebana le la go ja la Jakobo. ₁₄Eupša Jakobo a putlaganya matsogo a gagwe, gomme a bea letsogo la go ja hlogong ya Efraime, le ge e be e le yo monnyane, mme letsogo la nngele la ba hlogong ya Manase, yo e bego e le yo mogolo. ₁₅Ka gona a šegofatša Josefa a re:

₁₇Josefa o ile a tshwenyega ge a bona gore tatagwe o beile letsogo la gagwe la go ja godimo ga hlogo ya Efraime; ka gona a swara letsogo la tatagwe go le tloša hlogong ya Efraime go le iša go ya Manase. ₁₈A re go tatagwe: “E sego ka mokgwa woo, tate. Mošemanyana yo mogolo šo; bea letsogo la gago la go ja hlogong ya gagwe.”

₁₉Tatagwe a gana a re: “Ke a tseba, morwake, ke a tseba. Ditlogolo tša Manase le tšona e tla ba batho ba bantši. Fela moratho wa gagwe e tla ba yo mogolo go mo feta, gomme ditlogolo tša gagwe e tla ba ditšhaba tše kgolo.”

₂₀A ba šegofatša ka tšatši leo a re: “Baisraele ba tla šegofatšana ka maina a lena. Ba tla re: ‘A Modimo a go šegofatše bjalo ka ge a šegofaditše Efraime le Manase.’ ” Ka tsela yeo Jakobo a etiša Efraime pele ga Manase.

₂₁Ke moo Jakobo a itšego go Josefa: “O a bona, ke batametše go hwa, fela Modimo o tla ba le wena, gomme o tla go bušetša nageng ya borakgolokhukhu ba gago. ₂₂Shekeme, selete sela sa go nona se ke se tšerego go Baamore ka tšhoša ya ka le bora bja ka, ke e fa wena, e sego bomorwarrago.”

₁Jakobo o ile a laela gore barwa ba gagwe ba bitšwe, a re: “Mpotapoteng, ke le botše tše di tlago le hlagela ka moso:

₂₈Tšeo ke dikgoro tše lesome le tše pedi tša Israele, gomme seo ke se tatabo a se boletšego ge a šegofatša barwa ba gagwe, mongwe le mongwe a fiwa tšhegofatšo ye e mo swanelago.

₂₉Ke moo Jakobo a laetšego barwa ba gagwe a re: “Bjale ka gore ke kgauswi le go kopana le batho ba gešo ka go hwa, le mpolokeng le botate ka leweng leo le lego tšhemong ya Efrone, Mohete, ₃₀kua Makapela, ka bohlabela bja Mamre, nageng ya Kanana. Abrahama o rekile lewa leo le tšhemo yeo go Efrone, Mohete, gore e be serapa sa go bolokela bahu. ₃₁Fao ke mo ba bolokilego Abrahama le mosadi wa gagwe, Sara; fao ke mo ba bolokilego Isaka le mosadi wa gagwe, Rebeka; gomme fao ke mo ke bolokilego Lea. ₃₂Ke ra tšhemo le lewa le le lego go yona tše di rekilwego go Bahete.” ₃₃Ge Jakobo a fetša go laela barwa ba gagwe a boetša maoto malaong, gomme a kgaoga.

₁Josefa a itahlela go tatagwe, a lla, a mo atla sefahlego. ₂Ka morago a laela bahlanka ba gagwe ba dingaka gore ba omeletše setopo sa tatagwe. ₃Komeletšo yeo e ile ya tšea matšatši a masome a mane, gobane go omeletša setopo go tšea matšatši a makaalo. Ka morago Baegepeta ba mo ilela matšatši a masome a a šupago.

₄Ge nako ya go mo ilela e fetile, Josefa a re go bakgomana ba kgoši: “Hle, mpoleleng le kgoši le re: ₅‘Ge tate a batametše go hwa, o ile a nkeniša gore ke mmoloke lebitleng leo a ipetletšego lona kua Kanana. Ka gona hle, ntumelele ke sepele ke yo boloka tate, gomme ka morago ga moo ke tla boa.’ ”

₆Kgoši ya fetola ya re: “Sepela o yo boloka tatago, bjalo ka ge o enne.”

₇Ka gona Josefa a ya go boloka tatagwe. Bahlankedi ba kgoši ka moka, le bakgomana ba bagolo ba kgoro ya gagwe, le baetapele ka moka ba Egepeta ba ya le Josefa. ₈Lapa la gagwe ka moka, le bomorwarragwe, le lapa la tatagwe ba ya naye. Seleteng sa Goshene go ile gwa šala fela bana ba bona ba bannyane le dihuswane le dikgomo. ₉Banna ba makoloi le ba ba nametšego dipere ba ya le yena; ya ba sehlopha se segolo kudu.

₁₀Ge ba fihla seboeng kua Atade, ka bohlabela bja noka ya Jordane, ba tsoša sello se segolo, gomme Josefa a dira ditlhobogo matšatši a a šupago. ₁₁Ge badudi ba Kanana ba bona batho bao ba lla kua Atade, ba ile ba re: “Sello sa Baegepeta ke se segolo bjang!” Ke ka lebaka leo felo fao go ilego gwa rewa leina la Abele-Mitsraime. Lefelo leo le ka bohlabela bja Jordane.

₁₂Ka gona barwa ba Jakobo ba ile ba dira ka moo a bego a ba laetše ka gona; ₁₃ba mo iša Kanana, gomme ba mmoloka ka leweng tšhemong ye e lego Makapela, ka bohlabela bja Mamre, yeo Abrahama a bego a e rekile go Efrone, Mohete, gore e be serapa sa go bolokela bahu. ₁₄Ge Josefa a bolokile tatagwe, a boela Egepeta le bomorwarragwe le bohle bao ba bego ba ile polokong le yena.

₁₅Ge bomorwarragoJosefa ba bona gore tatagobona o hlokafetše ba ile ba re: “Re tla dira eng ge eba Josefa o sa re swere ka pelo, gomme o ikemišeditše go itefeletša bobe ka moka bjo re mo dirilego bjona?” ₁₆Ka gona ba romela molaetša go Josefa ba re: “Pele ga ge tatagorena a hlokafala ₁₇o boletše gore re go botše re re: ‘Hle, o lebalele bomorwarrago molato wa bona ka ge ba ile ba go dira gampe.’ Bjale hle, re lebalele phošo ye re e dirilego, rena bahlanka ba Modimo wa tatago.” Josefa a lla ge a botšwa molaetša wo.

₁₈Ke moka bomorwarragwe le bona ba tla ba itahlela fase pele ga gagwe ba re: “Ke rena ba, re makgoba a gago.”

₁₉Eupša Josefa a re go bona: “Le se ke la boifa; nka se ipee maemong a Modimo. ₂₀Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši. ₂₁Le se ke la boifa selo. Ke tla le hlokomela, lena le bana ba lena.” Ka gona a ba kgothatša a ba bea pelo.

₂₂Josefa o ile a fela a phela Egepeta le ba lapa la tatagwe; o be a na le mengwaga ye lekgolo le ye lesome ge a ehwa. ₂₃O ile a phela, a ba a bona bana ba Efraime le bana ba bona. A amogela bana ba Makire, morwa wa Manase, ya ba ba gagwe. ₂₄A re go bomorwarragwe: “Ke kgauswi le go hwa, eupša Modimo o tla le hlokomela, a le ntšha mo nageng ye a le iša go ye a enetšego Abrahama le Isaka le Jakobo a re o tla ba fa yona.” ₂₅Ke moo Josefa a enišitšego barwa ba Jakobo a re: “Nkeneleng gore ge Modimo a le iša nageng yeo, le tla sepela le mašapo a ka.” ₂₆Ka gona Josefa a hlokafala a na le mengwaga ye lekgolo le ye lesome. Ba omeletša setopo sa gagwe Egepeta, gomme ba se bea ka lepokising.