To The Word – Day 130

₁Puku ye ke mantšu a Amose yo e bego e kile ya ba modiša motseng wa Tekoa. Mengwageng ye mebedi ya pele ga tšhikinyego ya lefase, mola Usia e le kgoši ya Juda mme Jerobeamo, morwa wa Joase, e le kgoši ya Israele, Modimo o ile a utollela Amose taba tša puku ye mabapi le Israele.

₂Amose o rile:

₃Morena o re: “Batho ba motse wa Damaskose ba dirile dibe leboelela, ka lebaka leo ke tla ba otla. Ba be ba swere batho ba Gileade ka sehlogo se segolo, bjalo ka motho ge a fola mabele ka selei sa tshipi ka fase. ₄Ka gona ke tla romela mollo mošate ga Kgoši Hasaele gomme wa tšhuma le dibo tša Kgoši Benhadade. ₅Ke tla robaganya maphika a dikgoro tša Damaskose, ka fediša le badudi ba motse wa Abene le kgoši ya Bethe-Edene. Batho ba Siria ba tla išwa bothopša nageng ya Kire.”

₆Morena o re: “Batho ba Gasa ba dirile dibe leboelela, ka lebaka leo ke tla ba otla. Ba išitše setšhaba ka moka bothopša, ba se rekišetša batho ba Edomo ya ba makgoba. ₇Ka gona ke tla romela mollo merakong ya Gasa wa fiša dibo tša gona. ₈Ke tla fediša badudi ba motse wa Ashdode le kgoši ya Ashkelone. Ke tla otla motse wa Ekrone, gomme mašaledi a Bafilista a hwa.”

₉Morena o re: “Batho ba Tirose ba dirile dibe leboelela, ka lebaka leo ke tla ba otla. Ba išitše setšhaba sohle bothopša, ba se rekišetša batho ba Edomo ya ba makgoba, gomme ba se phethe kwano ye ba bego ba e dirile ya kagišano. ₁₀Ka gona ke tla romela mollo merakong ya Tirose wa tšhuma dibo tša gona.”

₁₁Morena o re: “Batho ba Edomo ba dirile dibe leboelela, ka lebaka leo ke tla ba otla. Ba be ba hlomara Baisraele, bomorwarragobona, gomme ba itlhokiša lešoko. Ba ba galefela go feta tekanyo, gomme kgalefo ya bona ya se tsoge e fedile. ₁₂Ka gona ke tla romela mollo motseng wa Temane wa tšhuma dibo tša Botsra.”

₁₃Morena o re: “Batho ba Amone ba dirile dibe leboelela, ka lebaka leo ke tla ba otla. Dintweng tša bona tša go ikokeletša naga ba ile ba ba ba phula baimana dimpa kua Gileade. ₁₄Ka gona ke tla tukiša mollo ka gare ga merako ya motse wa Raba, wa fiša dibo tša gona. Ke moo go tlago hlabja mekgoši ka letšatši la ntwa, gomme ntwa ya gakala bjalo ka ledimo. ₁₅Kgoši ya bona le bakgomana ba gagwe ba tla išwa bothopša.”

₁Morena o re: “Batho ba Moaba ba dirile dibe leboelela, ka lebaka leo ke tla ba otla. Ba fišitše marapo a kgoši ya Edomo thokgethokge. ₂Ka gona ke tla romela mollo nageng ya Moaba wa tšhuma dibo tša Keriote. Batho ba Moaba ba tla bolawa mašateng a ntwa le mekgošing, go letšwa le diphalafala. ₃Ke tla bolaya mmuši wa Moaba gotee le bakgomana bohle ba naga yeo.”

₄Morena o re: “Batho ba Juda ba dirile dibe leboelela, ka lebaka leo ke tla ba otla. Ba ganne go hlompha melao ya ka le go phetha ditaelo tša ka. Ba timeditšwe ke yona medingwana yela ya maaka e bego e khunamelwa ke borakgolokhukhu ba bona. ₅Ka gona ke tla romela mollo Juda wa tšhuma dibo tša Jerusalema.”

₆Morena o re: “Batho ba Israele ba dirile dibe leboelela, ka lebaka leo ke tla ba otla. Moloki yo a palelwago ke go lefa melato ya gagwe, le modiitšana yo a sa kgonego le go lefa le molato wa dieta tše a di tšerego, bona ba a ba rekiša ya ba makgoba. ₇Ba swara bahloki gampe, le bahlaki ba ba hlokiša toka. Motho le tatagwe ba robala le modiredi o tee wa mosadi, mme ba tšhilafatša leina la ka. ₈Batho ba robala kgauswi ga aletare ye nngwe le ye nngwe diaparong tše ba sa di tšeetšego baadingwa. Beine ye ba e lefišitšego bao ba adimilego tšhelete ba e nwela ka Tempeleng ya Modimo wa bona.

₉“Kganthe e be e le ka lebaka la lena, setšhaba sa ka, ge ke fediša Baamore ba e bego e le ba botelele bja mesedere, ba kgwahlile bjalo ka meeike. ₁₀Ke nna ke le ntšhitšego Egepeta, ka le sepetša lešokeng mengwaga ye masome a mane gore le tle le tšee naga ya Baamore. ₁₁Ka dira barwa ba lena ba bangwe baprofeta, le masogana a lena a mangwe Banasire. Kgane ga se nnete, lena batho ba Israele? Ke realo, nna, Morena. ₁₂Eupša lena la gapeletša Banasire go nwa beine, la ba la laya baprofeta gore ba se bolele molaetša wa ka. ₁₃Bjale ge, ke tla le imela la thekesela bjalo ka koloyana ye e imelwago ke diako tša mabele. ₁₄Ešita le wa lebelo a ka se kgone go tšhaba; senatla se ka se holwe ke maatla a sona, le mohlabani a ka se kgone go iphološa. ₁₅Ramesebe a ka se swarelele; wa lebelo a ka se phonyokge, gomme le monamedi wa pere a ka se itlhakodiše. ₁₆Mohlang woo le mogale wa bagale o tla lahla dibetša tša gagwe, a hlanola direthe.” O realo, Morena.

₁Lena setšhaba sa Israele, theeletšang se Morena a se boletšego ka lena, setšhaba ka moka se a se ntšhitšego Egepeta: ₂“Gare ga ditšhaba ka moka tša lefase ke lena fela ke le kgethilego. Ke ka lebaka leo ke swanetšego go le otla ka lebaka la makgopo ohle a lena.”

₃Na banna ba babedi ba ka tšea leeto mmogo ba se ba kwana?

₄Kgane tau e ka bopa ka sethokgweng e sa hlasele phoofolo?

Tawana yona e ka rora ka serobeng sa yona e se ya swara selo?

₅Na nonyana e ka tanywa ke sefu se se sego sa thewa?

Na sefu sona se ka thenkgologa se se sa kgongwa ke selo?

₆Kgane phalafala ya ntwa e ka lla motseng ya se tšhoše batho?

Na motse o ka welwa ke kotsi e se ya tlišwa ke Morena?

₇Morena, Mong wa bohle, ga a ke a dira selo a sa botše baprofeta, bahlanka ba gagwe, maikemišetšo a gagwe.

₈Ge tau e bopa, na ke mang yo a sa boifego?

Ge Morena, Mong wa bohle, a bolela, ke mang a ka se begego molaetša wa gagwe?

₉Begelang ba ba dulago ka dintlong tše dikgolo Ashdode le Egepeta le re: “Kgobokanang dithabeng tše di dikologilego motse wa Samaria le bone kgakanego le kgatelelo ya gona.”

₁₀Morena o re: “Batho ba ba kgobela ka dintlong tša bona dilo tše ba ikhweleditšego tšona ka kgang le ka kgapeletšo. Go dira tša go loka ga ba go tsebe. ₁₁Ka gona manaba a tla dikanetša naga ya batho ba Samaria, a senya dibo tša bona, a hula le dintlo tšeo tša bona tše dikgolo.”

₁₂Morena o re: “Bjalo ka ge modiša a hlakodiša fela marapo a mabedi a maoto goba nkgetlwana ya tsebe ya sehuswane se se llwego ke tau, ka wona mokgwa wo mobjalo go tla phologa ba se bakae gare ga badudi ba Samaria, bao gonabjale ba kwaelago didulong tša masethesethe le malaong ao a kgabišitšwego ka nakatlou.” ₁₃Morena Ramaatlaohle, Mong wa bohle, o tšwela pele o re: “Bjale theeletšang gomme le botše ditlogolo tša Jakobo gore ke re: ₁₄Mohla ke otla batho ba Israele ka lebaka la dibe tša bona, ke tla pšhatlaganya dialetare tša Bethele. Manaka a aletare ye nngwe le ye nngwe a tla kgonolwa a wela fase. ₁₅Ke tla phušola dintlo tša marega le tšona tša selemo. Dintlo tše di kgabišitšwego ka nakatlou di tla thubega; go tla kgerešwa dintlo tše dintši.”

₁Theeletšang mo, lena basadi ba Samaria, le nonnego bjalo ka dikgomo tša Bashane, lena le hlakišago bahloki, le pateletšago badiidi, le gona le rego go banna ba lena: “A bo tle re bo kakate!” ₂Morena, Mong wa bohle, o ikanne ka ge e le yo mokgethwa a re: “Go tlilo tla nako yeo ka yona ba tlago le hlwahlwaiša ka dikgwega. Mongwe le mongwe wa lena o tla hlwahlwaišwa ka kgwega ya dihlapi. ₃Le tla hlwahlwaišwa la ntšhetšwa ka ntle, mongwe le mongwe a ntšhwa ka lešoba la morako le a lebanego nalo, a rakelwa thabeng ya Hermone.” O realo, Morena.

₄“Lena Baisraele, le ka no ya Bethele la dira dibe! Le ka no ikela Gilgale la dira dibe le go feta! Le ka no tsogela go iša didimo ka mehla, la iša karolo ya lesome ka letšatši le lengwe le le lengwe la boraro. ₅Le ka no iša senkgwa ya ba kabelo ya tebogo, la ba la itheta ka dikabelo tša lena tša boithaopo; la ikgantšha ka tšona, gobane seo ke se le se ratago.” O realo, Morena, Mong wa bohle.

₆“Ke nna ke ilego ka le bolaiša tlala metseng yohle ya lena, ka le hlokiša dijo ka malapeng a lena, fela la se sokologele go nna.” O realo, Morena. ₇“Ka le tima le pula go sa šetše kgwedi tše tharo gore go bunwe. Ka neša pula motseng wo mongwe, wo mongwe ka o hlokiša yona. Ya na tšhemong ye nngwe, go ye nngwe ya se ne, mme dibjalo tša yona tša pona. ₈Batho ba metse ye mmalwa ba be ba ikgoga ba eya motseng wo mongwe go nyaka meetse a go nwa, fela ba sa hwetše a a lekanego. Le ge go le bjalo la se sokologele go nna.” O realo, Morena.

₉“Ka le otla ka phori le tlhakgama. Mogokong wa hlohlora mašemo a lena le dirapa tša lena tša merara, le mego le mehlware ya lena. Fela la no se sokologele go nna.

₁₀“Ka le romela leuba la bolwetši la go swana le lela ka go le romela Egepeta. Ka bolaya masogana a lena ka tšhoša, ka ba ka le amoga dipere. Ka le nkgišetša seuta ka mešašeng ya lena. Le ge go le bjalo la no se sokologele go nna.” O realo, Morena.

₁₁“Ba bangwe ba lena ka ba fediša, nna, Modimo, ka ba etša motse wa Sodoma le wa Gomora. Ba ba phologilego ba etša legong le le phamotšwego mollong. Fela la no se sokologele go nna.” O realo, Morena. ₁₂“Bjale ge, Baisraele, ke tlilo le otla. Ka gona, itokišetšeng go ahlolwa ke nna, Modimo wa lena!”

₁Lena setšhaba sa Israele, theeletšang ge ke opela sefela sa go le llela ke re:

₃Morena, Mong wa bohle, o re: “Motse wa Israele wo o tšwago dira ka bahlabani ba sekete o tla šalelwa ke ba lekgolo; wo o tšwago dira ka ba lekgolo o tla šalelwa ke ba lesome.”

₄Morena o re go setšhaba sa Israele: “Etlang go nna, mme le tla phela. ₅Bethele le se ye go rapela, Gilgale le gona le se ye, le ge e le go fetela Beresheba, gobane batho ba Gilgale ba lebanwe ke go išwa bothopša; motse wa Bethele le wona o tlilo fedišwa.”

₆Eyang go Morena gomme le tla phela. Ge le sa ye o tla tla bjalo ka mollo wa hlaga a swielela setšhaba sa Israele. Mollo woo o tla tšhuma Bethele, gwa se be le motho wa go o tima. ₇Lena le pherekanyago toka, le e gatakago ka maoto, le a ikobela.

₁₄Ikemišetšeng go dira tše di lokilego, e sego tše mpe, gore le tle le phele. Ke gona Morena Modimo Ramaatlaohle a tlago ba le lena, lena le ipotšago gore o na le lena. ₁₅Hloyang tše mpe, le rate tše di lokilego, gomme le šetše gore dikgorong go ahlolwe ka toka. Mohlomongwe Morena a ka šokela mašaledi a setšhaba se.

₁₆Ka gona Morena Modimo Ramaatlaohle o re: “Mapatlelong ka moka a motse go tla gololwa, le mekgotheng yohle ya motse go tla kwagala ‘Jo nna joo!’ Le balemi ba tla bitšwa gore ba tle ba llele bahu, ba be le bao ba lefetšwego go tlo lla. ₁₇Ka dirapeng ka moka tša merara go tla ba le dillo. Tšohle tše di tla hlaga ge ke putla gare ga lena.”

₁₈Go madimabe lena le hlolosetšego Letšatši la Morena! Na letšatši leo le tla le hola ka eng? Go lena e tla ba letšatši la leswiswi, e sego la seetša. ₁₉Go tla swana le motho yo e ka rego a tšhaba tau a gahlana le bere! Goba monna yo e ka rego a fihla gae, a ithekga ka seatla lebotong gomme a longwa ke noga. ₂₀Ga ke re Letšatši la Morena e tla ba leswiswi, e sego seetša; le tla fifala la se tage?

₂₁Morena o re: “Ke hloile menyanya ya lena ya sedumedi, mme ke a e gana, le diphuthego tša lena di a ntsheleka! ₂₂Le ge le ntirela dihlabelo tša go tšhungwa ka moka, le ntlišetša le dikabelo tša bupi, ga ke di amogele; ga ke amogele le diruiwa tše le di nontšheditšego go tlo ntirela dihlabelo tša kagišano ka tšona. ₂₃Homotšang dikoša tšeo tša lena tša mašata; ga ke nyake go kwa diharepa tša lena. ₂₄A go upše go be le toka mme e ele bjalo ka noka, le boloki bo ele bjalo ka moela wo o sa pšhego.

₂₅“Lena setšhaba sa Israele, kgane mola le le lešokeng mengwaga ye masome a mane le be le ntirela dihlabelo le dikabelo? ₂₆Le be le rwala Sikute, modimo wa lena wo mogolo, le Kijune, modimo wa lena wa naledi, e lego diswantšho tše le ipopetšego tšona. ₂₇Ke ka lebaka leo ke tlago le iša bothopša nageng ye e lego ka kua ga Damaskose.” O realo, Morena, yo leina la gagwe e lego Modimo Ramaatlaohle.