To The Word – Day 139

₁Setšhaba ka moka sa Israele se ile sa ya go Dafida kua Hebrone sa re go yena: “Re madi eno. ₂Mehleng ye e fetilego, le mola Saulo e sa le kgoši ya rena, o be o eta setšhaba sa Israele pele ntweng. Ebile Morena Modimo wa gago o rile go wena: ‘Ke wena o swanetšego go diša setšhaba sa ka; ke wena o swanetšego go ba mmuši wa sona.’ ” ₃Ka gona baetapele ka moka ba Israele ba tla go Kgoši Dafida kua Hebrone. Yena a dira kgwerano le bona pele ga Morena, ba mo tlotša gomme ya ba kgoši ya Israele, bjalo ka ge Morena a be a holofeditše ka Samuele.

₄Kgoši Dafida le Baisraele ka moka ba ya ba hlasela Jerusalema. Ka nako yeo motse woo o be o sa tsebja ka leina la Jebuse, gomme Bajebuse, badudi ba mathomo moo nageng yeo, ba be ba sa agile moo. ₅Bajebuse ba botša Dafida gore a ka se tsene motseng, eupša Dafida a thopa sebo sa bona sa Sione, gomme sa tsebja ka la “Motse wa Dafida”. ₆Yena a re: “Motho wa mathomo yo a kago bolaya Mojebuse e tla ba moetapele le molaodi wa madira a ka!” Joaba, yo mmagwe e bego e le Tseruya, a hlasela pele gomme ya ba molaodi. ₇Ka lebaka la gore Dafida o ile a yo dula ka sebong seo, se ile sa bitšwa “Motse wa Dafida”. ₈O ile a tsošološa karolo ya motse ya go se potologa, a thoma felo mo naga e bego e lekelelantšwe, gomme Joaba a tsošološa ye nngwe ye e šetšego. ₉Maatla a Dafida a fela a oketšega ka gobane Morena Ramaatlaohle o be a na le yena.

₁₀A ke maina a bagale ba Dafida ba bagolo bao, gammogo le setšhaba ka moka sa Israele, ba ilego ba ema naye gore e be kgoši, bjalo ka ge Morena a be a boletše gore e tla ba kgoši. Bona ba ile ba fela ba mo thekgile kudu mmušong wa gagwe.

₁₁Wa mathomo e be e le Jashobamo wa kgorwana ya Hakmone, moetapele wa “Bararo”. O ile a lwa le banna ba makgolo a mararo ka lerumo la gagwe gomme a ba bolaya ka moka ntweng e tee. ₁₂Wa bobedi gare ga “Bararo” bao ba bagale e be e le Eleasara, morwa wa Dodo, wa kgorwana ya Ahoage. ₁₃Yena o ile a lwa le Bafilista ntweng ya Pase-Damime a na le Dafida. O be a le ka tšhemong ya garase ge Baisraele ba thoma go tšhaba, ₁₄eupša yena le banna ba gagwe ba ema gare ga tšhemo ba bolaya Bafilista mme ba šireletša tšhemo. Morena a fentšha Baisraele fenyang.

₁₅Ka letšatši le lengwe bagale ba bararo ba bagolo ba “Ba Masome a Mararo” ba ya go Dafida leswikeng kgauswi le lewa la Adulamo, mola sehlopha sa Bafilista se hlomile mešaša molaleng wa Barafa. ₁₆Ka nako yeo Dafida o be a le ka sebong thabeng, gomme sehlopha sa Bafilista se thopile Betlelehema. ₁₇Dafida a kwa a nyoretšwe meetse a gabo mme a re: “Nke nkabe motho a yo nkgela meetse sedibeng sa lesorong la kgoro ya Betlelehema!” ₁₈Bahlabani bale ba bararo ba bagale ba šwahla mešaša ya Bafilista, ba yo ga meetse sedibeng seo, gomme ba a tlišetša Dafida. Fela a se ke a a nwa, eupša a a tšholla ya ba kabelo go Morena ₁₉gomme a re: “A Modimo a se ntumelele go nwa meetse a! Ge nka a nwa go ka swana le ge ke enwa madi a banna ba ba ilego ba ipea kotsing ya lehu ba!” Ka gona a gana go a nwa.

Tšeo e bile ditiro tše bogale tša bahlabani bao ba bararo ba bagale.

₂₀Abishai, morwarragoJoaba, e be e le moetapele wa “Bagale ba Masome a Mararo”. O ile a lwa le banna ba makgolo a mararo ka lerumo la gagwe, a ba bolaya, gomme a thoma go tuma gare ga bao “Ba Masome a Mararo”. ₂₁Ke yena a bego a tumile kudu moo gare ga “Ba Masome a Mararo” gomme e ile ya ba moetapele wa bona, eupša o be a se a tuma go swana le “Bararo” bale.

₂₂Benaya, morwa wa Joyada, wa go tšwa Kabtsiele, e be e le mohlabani yo mongwe yo bogale; o dirile ditiro tše ntši tše kgolo, go balwa le go bolaya bahlabani ba babedi ba bagolo ba Bamoaba. O kile a theogela ka moleteng ka letšatši la lehlwa a bolaya tau. ₂₃Le gona o kile a bolaya monna yo mongwe wa tšitširipa wa Moegepeta wa go feta dimetara tše pedi ka botelele, yo a bego a itlhamile ka lerumo leo theko ya lona e bego e lekana le mpheng wa mogoma. Benaya a mo hlasela ka molamo, a ubula lerumo lela seatleng sa Moegepeta, a mmolaya ka lona. ₂₄Tšeo e bile ditiro tše bogale tša Benaya yo le yena a bego a tumile gare ga “Ba Masome a Mararo”. ₂₅O ile a tuma kudu gare ga bona, eupša a se swane le “Bararo” bale. Dafida o ile a mmea mohlokomedi wa baleti ba gagwe.

_26-47Bahlabani ba bangwe ba bagale šeba:

₁Mola Dafida a sa dula kua Tsikelage, mo a bego a ile gona ge a tšhabile Kgoši Saulo, o ile a tlatšwa ke bagale ba ba ilego ba mo thuša dintweng, ₂banna ba kgoro ya Benjamene, ye e bego e le ya gaboSaulo. Ba be ba kgona go thunya mesebe le diragamabje ka matsogo a go ja le a nngele. _3-7Balaodi ba bona e be e le Ahiesere le Joase, barwa ba Shemaa wa Gibea.

Bahlabani bao šeba:

₈Šea maina a bagale ba bagolo ba ba bego ba loketše ntwa ba kgoro ya Gade ba ba ilego ba tlatša Dafida mola a le sebong sa lešokeng. E be e le bakgoni ba go swara dikotse le marumo, difahlego tša bona di be di tšhoša bjalo ka sa tau, mme ba na le lebelo la tshephe. _9-13Ka maemo ba be ba latelana ka mokgwa wo: Esere, Obadia, Eliaba, Mishmana, Jeremia, Athai, Eliele, Johanane, Elsabade, Jeremia le Makabanai.

₁₄Banna ba bangwe ba kgoro yeo ya Gade e be e le balaodi ba bagolo, yo mongwe le yo mongwe a laola banna ba sekete, ba bangwe e le balaodi ba bannyane, yo mongwe le yo mongwe a laola banna ba lekgolo. ₁₅Kgweding ya pele ya ngwaga wo mongwe ka nako ye noka ya Jordane e tletše wa go falala ba kile ba e tshela, ba raka batho ba ba bego ba dula melaleng ya ka bohlabela le ya ka bodikela bja noka.

₁₆Ka nako ye nngwe banna ba bangwe ba kgoro ya Benjamene le ya Juda ba kile ba ya sebong se Dafida a bego a le ka go sona. ₁₇Yena a tšwa a yo ba gahlanetša gomme a re: “Ge eba le tlile ka maikemišetšo a mabotse go tlo nthuša, ke le amogela ka pelo ya ka ka moka. Eupša ge le tlilo nkeka mme la nkgafela manabeng a ka, etšwe ke se ka phošetša motho, Modimo wa borakgolokhukhu ba rena o tla bona taba yeo gomme a le otla.”

₁₈Moya wa Modimo wa aparela yo mongwe wa bona, Amasai, yo ka morago e ilego ya ba moetapele wa “Ba Masome a Mararo”, gomme a goelela a re:

Dafida a ba amogela gomme a ba dira balaodi ba madira a gagwe.

₁₉Bahlabani ba bangwe ba go tšwa kgorong ya Manase ba ile ba itliša go Dafida ge a be a etla le Bafilista go tlo lwa le Kgoši Saulo. Eupša o ile a se ke a thuša Bafilista, ka gobane dikgoši tša bona di be di rile go rerišana tša mo gomisetša Tsikelage, ka ge di be di boifa gore a ka ba eka go Saulo, mong wa gagwe. ₂₀Bahlabani ba ba tšwago kgorong ya Manase ba ba ilego ba itliša go Dafida ge a boa, šeba: Adnage, Josabade, Jediaele, Mikaele, Josabade, Elihu le Tsiletai. Ka moka ga bona mo kgorong ya Manase ba be ba laola dikgao tša banna ba sekete. ₂₁Ba ile ba thuša Dafida e le balaodi ba madira a gagwe, ka gobane ka moka ga bona e be e le bagale ba bagolo. Ka morago ya ba balaodi madireng a Israele. ₂₂Letšatši le lengwe le le lengwe go be go itliša banna go Dafida, ka gona madira a gagwe ya ba a mantšintši.

_23-37Mola Dafida a le Hebrone bahlabani ba bantši ba ba itlhametšego ntwa ba ile ba tla go yena go mmea kgoši legatong la Saulo, go ya ka taelo ya Morena. Palo ya bona e be e le ka mokgwa wo:

₃₈Bahlabani bao ka moka ba ile ba ya Hebrone ba beakanyeditšwe ntwa, ba bile ba tshwetše mare diatleng gore ba yo bea Dafida kgoši ya Israele ka moka. Baisraele ba bangwe ka moka le bona ba be ba na le morero o tee woo wa go mmea kgoši. ₃₉Ba ile ba tšea matšatši a mararo moo ba na le Dafida, ba eja, ba enwa tše ba gabobona ba bego ba ba file tšona. _40-41Meloko ya bobona e ile ya tla e etšwa le kua kgole kgorong ya Isakara, le ya Sebulone, le ya Naftali e tliša dijo ka bontši ka dipokolo, dikamela, dimeila le dipholo, e le bupi, diphaphathi tša makwapi a mago le tša makwapi a diterebe, beine, le makhura a mohlware, le dikgomo le dihuswane gore ba tle ba hlabe, gobane Baisraele ba be ba thabile.

₁Kgoši Dafida o ile a rerišana le balaodi ka moka ba ba bego ba laola dikgao tša banna ba sekete le tša banna ba lekgolo. ₂Ke moka a re go setšhaba ka moka sa Israele: “Ge eba le dumela le gona e le thato ya Morena Modimo wa rena, a re romeng batseta bathong ba bangwe ba gaborena ba ba lego nageng ka moka ya Israele, le go baprista le go Balefi metseng ya bona, gomme ba ba botše gore ba kgobokane mo le rena. ₃Ke gona re tlago ya ra tšea Polokelo ya Kgwerano ya Modimo wa rena, yeo re bego re sa tshwenyege ka yona mola Saulo e sa le kgoši.” ₄Setšhaba sa kgahlwa ke kgopolo yeo gomme sa e dumela.

₅Ka gona Dafida a rapa pitšo ya setšhaba ka moka sa Israele, go tloga mollwaneng wa Egepeta go fihla sefateng sa Hamate, gore go tle go yo tšewa Polokelo ya Kgwerano kua Kiriate-Jearime e tlišwe Jerusalema. ₆Dafida le setšhaba ba ya motseng wa Baala, ke go re Kiriate-Jearime, nageng ya Juda, go yo tšea Polokelo ya Kgwerano ya Modimo, yeo e bego e abetšwe Morena yoo setulo sa gagwe sa bogoši se lego ka godimo ga bakerubi. ₇Ba ntšha Polokelo yeo ya Kgwerano ngwakong wa Abinadaba ba e nametša koloi ye mpsha. Usa le Agio ba be ba hlahla koloi, ₈mola Dafida le setšhaba ka moka ba bina ka mafolofolo a magolo go godiša Modimo. Ba be ba opela ba bile ba letša diletšo tša dikgapa, diharepa, meropa, masenkana le diphala.

₉Ge ba fihla seboeng sa Kidone, dipholo tša thetšwa, gomme Usa a otlolla letsogo a swareletša Polokelo ya Kgwerano. ₁₀Gatee fela Morena a galefela Usa gomme a mmolaela go kgwatha Polokelo yeo. A hwela moo pele ga Modimo, ₁₁ka gona lefelo leo la bitšwa Peretse-Usa go tloga tšatši leo. Dafida a ferekana ka gobane Morena o be a otlile Usa a galefile.

₁₂Dafida a boifa Modimo mme a re: “A bjale nka tliša bjang Polokelo ya Kgwerano go nna?” ₁₃Ka gona Dafida a se ke a e iša Jerusalema. A e arošetša lapeng la monna yo mongwe yo leina la gagwe e bego e le Obede-Edomo, wa motse wa Gathe. ₁₄E ile ya dula moo dikgwedi tše tharo, gomme Morena a šegofatša lapa la Obede-Edomo le tšohle tše a bego e na le tšona.

₁Kgoši Hiramo wa Tirose a roma batseta gore ba yo kwana le Dafida; a mo romela dikota tša mosedere le babetli gotee le babetli ba matlapa gore a ikagele ntlo, ₂ka gona Dafida a lemoga gore Morena o mo tiišeditše bogošing bja Israele, le gore o atlegiša mmušo wa gagwe ka lebaka la setšhaba sa Morena sa Israele.

₃Moo Jerusalema Dafida o ile a nyala basadi ba bangwe gape, gomme a ba le barwa le barwedi ba bangwe. ₄Gona moo a belegelwa bana ba ba latelago: Shamua, Shobabe, Nathane, Solomone, ₅Jibehara, Elishua, Elpelete, ₆Noga, Nefege, Jafia, ₇Elishama, Beeliada le Elifelete.

₈Ge Bafilista ba ekwa gore Dafida bjale o tloditšwe ya ba kgoši ya naga ka moka ya Israele, madira a bona ohle a tšwa go yo mo tsoma. Dafida a kwa taba yeo mme a tloga a yo gahlana le bona. ₉Bafilista ba fihla molaleng wa Barafa gomme ba ipeakanyetša ntwa moo. ₁₀Dafida a botšiša Modimo a re: “A ke hlasele Bafilista? A o tla ba gafela diatleng tša ka?”

Morena a mo fetola a re: “Ee, ba hlasele! Ke tla ba gafela diatleng tša gago!”

₁₁Bafilista ba ya Baale-Peratsime gomme Dafida a ba fenya moo. A re: “Modimo o gogotše manaba a ka ka seatla sa ka bjalo ka lefula.” Ka gona felo fao go bitšwa Baale-Peratsime. ₁₂Ge Bafilista ba tšhaba ba ile ba tlogela medimo ya bona ya diswantšho, gomme Dafida a laela gore e tšhungwe.

₁₃Bafilista ba boela molaleng mme ba ipeakanyetša ntwa gape. ₁₄Gapegape Dafida a botšiša Modimo, gomme yena a mo fetola a re: “O se ke wa ba hlasela o le mo, fela o ba potologe mme o itokišetše go ba hlasela o le kua mehlareng ya mekgokgopha. ₁₅Ge o ekwa mešito godimo ga mehlare, gona o hlasele, ka gobane ke tla be ke sepela pele ga gago go yo fenya madira a Bafilista.” ₁₆Dafida a dira se Modimo a mo laetšego sona, gomme a rakediša Bafilista go tloga Gibeone go ba go yo fihla Gesere. ₁₇Go tuma ga Dafida gwa tsebega nageng ye nngwe le ye nngwe, gomme Morena a dira gore ditšhaba tšohle di mmoife.

₁Dafida o ile a ikagela mengwako motseng wa Dafida. A ba a lokiša lefelo la Polokelo ya Kgwerano ya Modimo, gomme a hloma tente fao gore Polokelo e tle e bewe ka go yona. ₂Ke moka a re: “Ke Balefi fela ba ba swanetšego go rwala Polokelo ya Kgwerano, ka gobane ke bona ba Morena a ba kgethilego gore ba e rwale, le gona ba mo hlankele go ya go ile.” ₃Ka gona Dafida a bothela setšhaba ka moka sa Israele Jerusalema gore go tle go tlišwe Polokelo ya Kgwerano lefelong le a e lokišeditšego lona. ₄Ka morago a bitša ditlogolo tša Arone le Balefi. ₅Ba kgorwana ya Kehate gwa tla Uriele a ukametše banna ba lekgolo le masome a mabedi ba kgorwana ya gabo; ₆ba kgorwana ya Merari gwa tla Asaya a ukametše banna ba makgolo a mabedi le masome a mabedi; ₇ba kgorwana ya Gershone gwa tla Joele a ukametše banna ba lekgolo le masome a mararo; ₈ba kgorwana ya Elitsafane gwa tla Shemaya a ukametše banna ba makgolo a mabedi; ₉ba kgorwana ya Hebrone gwa tla Eliele a ukametše banna ba masome a seswai, ₁₀gomme ba kgorwana ya Usiele gwa tla Aminadaba a ukametše banna ba lekgolo le ba lesome le ba babedi.

₁₁Dafida a bitša moprista Tsadoko le moprista Abiatare le Balefi ba: Uriele, Asaya, Joele, Shemaya, Eliele le Aminadaba. ₁₂A re go bona: “Ke lena baetapele ba dikgorwana tša Balefi. Itlhwekišeng le Balefi ba gabolena, gore le tle le kgone go goroša Polokelo ya Kgwerano ya Morena Modimo wa Israele lefelong le ke e lokišeditšego lona. ₁₃Ka ge le se la e rwala la mathomo, Morena Modimo wa rena o ile a re otlela go se mo direle ka moo re bego re swanetše go phetha ka gona.”

₁₄Ke moka baprista le Balefi ba itlhwekiša gore ba tle ba yo tšea Polokelo ya Kgwerano ya Morena Modimo wa Israele. ₁₅Balefi ba e rwala ka dikota magetleng, ka moo Morena a bego a laetše ka Moshe.

₁₆Dafida a laela baetapele ba Balefi gore ba bee Balefi ba bangwe baopedi ba go opela dikoša tša lethabo ba di letša ka diletšo tša diharepa, dikgapa le masenkana. _17-21Ba kgetha banna ba ba latelago dikgorwaneng tša bao ba bego ba hlokometše moopelo gore ba letše diletšo tša masenkana a mphiri: Hemane, morwa wa Joele, Asafo, morwa wa Berekia, wa leloko la gabo, le Ethane, morwa wa Kushaya, wa kgorwana ya Merari. Ba bea Balefi ba ba latelago gore e be sehlopha sa bobedi gore ba ba thuše ka go letša dikgapa tša medumo ye mesesane: Sakaria, Jaasiele, Shemiramote, Jeiele, Uni, Eliaba, Maasea le Benaya. Ba bea Balefi ba ba latelago gore ba letše dikgapa tša medumo ye mekoto: Matitia, Elifelehu, Miknea, Asasia, le baleti ba masoro a Tempele, e lego Obede-Edomo le Jeiele.

₂₂Kenania o ile a bewa gore a hlokomele baopedi ba Balefi ka ge e be e le seopedi. _23-24Berekia le Elkana gotee le Obede-Edomo le Jehia bona ba bewa gore e be baleti ba Polokelo ya Kgwerano. Baprista ba ba latelago ba bewa baletši ba diphala pele ga Polokelo ya Kgwerano: Shebania, Joshafate, Netanele, Amasai, Sakaria, Benaya le Eliesere.

₂₅Ka gona Kgoši Dafida le baetapele ba Israele le balaodi ba madira ba ya ngwakong wa Obede-Edomo ba tšea Polokelo ya Kgwerano ba thabile. ₂₆Ba dira sehlabelo ka dipoo tše di šupago le dikgapa tše di šupago ka ge Modimo a thušitše Balefi ba ba bego ba rwele Polokelo ya Kgwerano ya Morena. ₂₇Dafida o be a apere seaparo sa lešela le boletiana; baopedi le Kenania, moetapele wa bona, le Balefi ba ba bego ba rwele Polokelo le bona ba be ba apere bjalo. Dafida yena o be a apere le seaparo se sekgethwa. ₂₈Ka gona Baisraele ka moka ba rotoga ka megobo ya lethabo, go letšwa diletšo tša diphalafala, diphala, masenkana, diharepa le dikgapa.

₂₉Ge Polokelo e gorošwa motseng, Migale, morwedi wa Saulo, a lebelela ka lefasetere mme a bona Kgoši Dafida a bina a taboga, gomme a mo nyatša kudu.