To The Word – Day 141

₁Sathane o kile a tsogela setšhaba sa Israele maatla gomme a hlohleletša Dafida gore a bale setšhaba. ₂Dafida a laela Joaba le balaodi ba bangwe a re: “Sepelang le yo bala Baisraele ka moka go tloga Beresheba go ba go yo fihla Dane, gomme le tle le mpegele gore ke tsebe gore ke ba bakae.”

₃Joaba a mo fetola a re: “A Morena a atiše setšhaba sa Israele galekgolo! Kgoši, mong wa ka, ka moka ke bahlanka ba gago. Ke ka lebaka lang o nyaka go dira taba yeo mme wa obiša setšhaba molato?” ₄Eupša kgoši a gapeletša Joaba gore a phethe taelo yeo ya gagwe. Joaba a tšwa a sepela le naga ka moka ya Israele, mme ka morago a boela Jerusalema. ₅A begela Kgoši Dafida palo ya banna ba e ka bago bahlabani: Baisraele ba dikete tše makgolo a lesome le le le tee, le Bajuda ba dikete tše makgolo a mane le tše masome a a šupago. ₆Ka ge Joaba a be a tenwa ke taelo yeo ya kgoši o ile a se ke a bala banna ba kgoro ya Lefi le ya Benjamene.

₇Modimo a selekwa ke seo se dirilwego, ka gona a otla Baisraele. ₈Dafida a re go Modimo: “Ke dirile sebe se segolo ka taba ye! Hle, ntshwarele. Ke dirile taba ya botlatla.”

₉Ke moo Morena a itšego go Gade, moprofeta wa Dafida: ₁₀“Sepela o yo botša Dafida gore a ikgethele e tee tabeng tše tharo tše ke tlago mmotša tšona. Ke tla dira se a tlago se kgetha.”

₁₁Gade a ya go Dafida, a mmotša se Morena a se boletšego, a ba a mmotšiša a re: “O kgetha eng mo go tše tharo tše: ₁₂mengwaga ye meraro ya tlala, goba dikgwedi tše tharo o tšhaba manaba a gago a a go hlomerego a nyaka go go bolaya, goba matšatši a mararo ao ka ona o tlago hlaselwa ka tšhoša ya Morena, le bolwetši bja leuba nageng ya gago, mola morongwa wa gagwe yena a le gare a lobiša gohle nageng ya Israele? Bjale gopodišiša taba tše, gomme o mpotše gore ke fetole yo a nthomilego ke reng.”

₁₃Dafida a fetola Gade a re: “Ke mo tlalelong ye kgolo! Eupša ga ke nyake go otlwa ke batho. A Morena e be yena yo a nkotlago, ka gobane o na le kgaugelo.”

₁₄Ka gona Morena a romela bolwetši bja leuba setšhabeng sa Israele, gomme gwa hwa batho ba dikete tše masome a a šupago. ₁₅Ka morago a roma morongwa gore a yo fediša Jerusalema, eupša ya re a sa bolaya batho ba Jerusalema Morena a di bona gomme a kwela batho bohloko, a re go yena: “Ema! Go lekane!” Morongwa yoo o be a eme seboeng sa Arauna, Mojebuse.

₁₆Dafida a lebelela godimo, a bona morongwa yoo a eme moyeng a swere tšhoša ka letsogo a šupile Jerusalema ka yona. Ke moka Dafida le baetapele ba setšhaba ba itahlela fase ka difahlego ba apere tša go ilela. ₁₇Dafida a rapela Modimo a re: “Ke nna yo ke dirilego sebe. Ke nna yo ke phošitšego. Ke nna yo ke laetšego gore setšhaba se balwe. Batho ba bona ba dirile eng? Morena wa ka, hle, otla nna le lapa la ka, o se ke wa otla setšhaba se sa gago ka bolwetši bjo bja leuba.”

₁₈Morongwa wa Morena a botša Gade gore a laele Dafida gore a ye a agele Morena aletare seboeng sa Arauna. ₁₉Dafida a ya moo seboeng bjalo ka ge Gade a be a mmoditše a laetšwe ke Morena. ₂₀Moo seboeng Arauna o be a fola mabele. Ge a retologa a bona morongwa, gomme barwa ba gagwe ba bane ba ba bego ba na le yena ba utama. ₂₁Kgoši Dafida a tla go Arauna; Arauna ge a gadima a mmona. A tloga seboeng a yo obamela Dafida. ₂₂Dafida a re go yena: “Nthekišetše seboa sa gago gore ke tle ke kgone go agela Morena aletare go sona gomme ke fediše bolwetši bja leuba. Ke tla go lefa theko ya sona.”

₂₃Arauna a re: “Se tšee, kgoši, mong wa ka, gomme o dire se o se nyakago ka sona. Dikgomo šedi tše o kago dira dihlabelo tša go tšhungwa ka moka ka tšona, le selei sa go fola sese se o kago dira dikgong ka sona, le mabele a o kago dira kabelo ya dijo ka ona šea. Tšohle tše ke go fa tšona.”

₂₄Kgoši a mo fetola a re: “Aowaa, ke tla go lefa theko ya tšona. Nka se direle Morena sehlabelo ka dilo tša gago ke se ka di reka ka selo.” ₂₅Gomme a reka seboa go Arauna ka dipapetlana tša gauta tše makgolo a a selelago. ₂₆A agela Morena aletare fao gomme a dira dihlabelo tša go tšhungwa ka moka le tša kagišano. A rapela, gomme Morena a mo araba ka go romela mollo o etšwa legodimong wa tšhuma dihlabelo tšeo moo aletareng.

₂₇Morena a botša morongwa yola gore a boetše tšhoša ya gagwe segatleng, gomme morongwa a e boetša. ₂₈Dafida a bona ka seo gore Morena o kwele thapelo ya gagwe, ka gona a fela a dira dihlabelo aletareng seboeng sa Arauna. ₂₉Tente ya bodulo bja Morena ye Moshe a bego a e dirile kua lešokeng le aletare ya dihlabelo di be di sa le lefelong la tirelo ntotomeng kua Gibeone ka nako yeo; ₃₀eupša Dafida o be a sa kgone go ya gona go yo khunamela Morena, ka gobane o be a boifa tšhoša ya morongwa wa Morena.

₁Ka gona Dafida a re: “Mo ke mo go tlago ba Tempele ya Morena Modimo. Ye ke aletare ye setšhaba sa Israele se tlago dira dihlabelo godimo ga yona.”

₂Kgoši Dafida a laela bafaladi ka moka bao ba bego ba dula nageng ya Israele gore ba kgobokane, gomme a ba fa mošomo. Ba bangwe ba bona ba betla maswika a go tlo aga Tempele. ₃A tliša tshipi ye ntši ya go tlo dira dikokotela le ditswalelo tša masoro le dikgwega, le mphiri wo montši wo o bego o ka se elwe. ₄Le gona go be go na le dikota tša mosedere tše motho a bego a ka se di bale, ka gobane batho ba Tirose le ba Sidone ba be ba di tlišetša Dafida ka bontši. ₅Dafida ka pelong a re: “Tempele ye morwa wa ka, Solomone, a tlago e agela Morena e swanetše go ba ye botsebotse mme e tume lefaseng ka moka. Eupša e sa le yo mofsa gomme ga a ne temogo, ka gona a e be nna ke mo nyakelago tša go e aga.” Ka fao Dafida a kgobokanya dikago tše ntši pele ga ge a ehwa.

₆A roma motseta gore a bitše Solomone, morwagwe, gomme a mo laela gore a agele Morena Modimo wa Israele tempele. ₇Dafida a re go yena: “Morwa wa ka, ke be ke nyakile go aga tempele gore ke hlomphe Morena Modimo wa ka. ₈Eupša Morena a mpotša gore ke bolaile batho ba bantši, le gore ke lwele dintwa tše kgolo. Ka gona, ka lebaka la madi a mantši a ke a tšholotšego a se ke a rata gore nna ke mo agele tempele. ₉A re go nna: ‘O tla ba le morwa yo e tlago ba motho wa khutšo, ka gobane ke tla dira gore a phele ka khutšo le manaba a gagwe ka moka a a mo potapotilego. Leina la gagwe e tla ba Solomone, ka gobane pušong ya gagwe ke tla dira gore Israele e be le khutšo le boiketlo. ₁₀Yena o tla nkagela tempele. E tla ba morwa wa ka, gomme nna ka ba tatagwe. Ba lešika la gagwe ba tla buša Israele go ya go ile.’ ”

₁₁Dafida a tšwela pele a re: “Bjale, ngwanaka, a Morena Modimo wa gago a be le wena gomme a phethe kholofetšo ya gagwe, mme a go atlegiše o mo agele tempele. ₁₂Hle, a Morena Modimo wa gago a go fe tlhaologanyo le bohlale gore o tle o buše Israele ka go phetha melao ya gagwe. ₁₃Ge o ka botegela go phetha melao le ditaelo tše Morena a di filego Baisraele ka Moshe, o tla atlega. O be le sebete, o tie, gomme o se ke wa boifa goba wa nolega moko. ₁₄Ge e le mabapi le Tempele gona, ke itapišitše ka kgobokanya gauta ya dikilokramo tše dimilione tše tharo le silibera ya dikilokramo tše dimilione tše masome a mararo gore di tle di šomišwe ge go agwa Tempele. Ntle le moo, go sa na le mphiri le tshipi ye ntši ye e ka se elwego. Le gona ke na le dikota le maswika, eupša o swanetše go di oketša. ₁₅O na le bašomi ba bantši: banna ba ba kago šoma kua meepong ya maswika, babetli ba maswika le ba dikota, le banna ba bantši ba ba kgonago dilo tša mehutahuta bao ba ka šomago ka ₁₆gauta, silibera, mphiri le tshipi. Bjale thoma modiro, gomme Morena a be le wena.”

₁₇Dafida a laela baetapele ka moka ba Israele gore ba thuše Solomone. ₁₈A re: “Morena Modimo wa lena o bile le lena gomme o dirile gore le be le khutšo ka gohle. O gafetše ditšhaba tše di bego di dula mo nageng ye diatleng tša ka, gomme bjale ditšhaba tšeo di fentšwe ke Morena le ke lena, setšhaba sa gagwe. ₁₉Bjale le ineeleng go Morena Modimo wa lena ka dipelo tša lena ka moka le ka moya wa lena ka moka. Thomang go aga ngwako wo mokgethwa wa Morena Modimo, gore le tle le tsenye Polokelo ya Kgwerano ya Morena gotee le dibjana tše dingwe tše kgethwa ka gare ga ngwako woo le tlago o agela go khunamela Morena ka go wona.”

₁Ge Dafida a šetše a tšofetše kudu, o ile a bea morwa wa gagwe, Solomone, kgoši ya Israele.

₂Kgoši Dafida a kgobokanya baetapele ka moka ba Baisraele le baprista le Balefi. ₃A bala Balefi ka moka ba banna ba mengwaga ye masome a mararo le go feta fao. Ka moka ga bona ya ba ba dikete tše masome a mararo le tše seswai. ₄Kgoši a bea ba dikete tše masome a mabedi le tše nne bahlokomedi ba mediro ya Tempele, ba dikete tše di selelago bangwaledi le baahlodi ba melato, ₅ba dikete tše nne baleti ba masoro, le ba dikete tše nne batumiši ba Morena ba go letša diletšo tše kgoši a bego a di nyaketše morero woo.

₆Dafida a arola Balefi dihlopha tše tharo go ya ka dikgorwana tša bona tše di latelago: ya Gershone, ya Kehate, le ya Merari.

₇Gershone o be a na le barwa ba babedi, e lego Ladane le Shimi. ₈Ladane a ba le barwa ba bararo, e lego Jehiele, Setamo le Joele, ₉ba e ilego ya ba mantona a dikgorwana tše di tšwilego go Ladane. Shimi o ile a ba le barwa ba bararo, e lego Shelomite, Hasiele le Harane. _10-11Shimi o be a na le barwa ba bane. Bona šeba ka go hlatlamana ga bona: Jahate, Sisa, Jeushe le Beria. Jeushe le Beria ba ile ba se ke ba ba le ditlogolo tše ntši, ka fao ba balwa gore ke kgorwana e tee.

₁₂Kehate o be a na le barwa ba bane, e lego Amramo, Jitsara, Hebrone le Usiele. ₁₃Barwa ba Amramo e bile Arone le Moshe. Arone le ditlogolo tša gagwe ba ile ba hlaolelwa gore ba tle ba dire modiro wa ka Felo mo Gokgethwakgethwa go ya go ile, gore ba tšhume seorelo tirelong ya Morena, gore ba mo hlankele, le gore ba šegofatše batho ka leina la gagwe go iša ka go sa felego. ₁₄Eupša barwa ba Moshe, monna wa Modimo, bona ba be ba balwa le Balefi. ₁₅Moshe o be a na le barwa ba: Gershome le Eliesere. ₁₆Moetapele wa barwa ba Gershome e be e le Shubaele. ₁₇Eliesere o be a na le morwa o tee fela, Rehabia, eupša Rehabia yena a ba le ditlogolo tše ntši gomme ya ba hlogo ya tšona.

₁₈Jitsara o be a na le morwa, Shelomite, yena lentona la kgorwana yeo ya Kehate. ₁₉Hebrone a ba le barwa ba bane, e lego Jeria, Amaria, Jahasiele le Jekamamo. ₂₀Usiele o be a na le barwa ba babedi, e lego Mika le Jishia.

₂₁Merari o be a na le barwa ba: Magli le Mushi. Magli a ba le barwa ba: Eleasara le Kishe, ₂₂fela Eleasara yena a hwa a se ne morwa, a na le barwedi fela. Barwedi ba gagwe ba nyalwa ke barwa ba Kishe, rangwane wa bona. ₂₃Mushi o ile a ba le barwa ba bararo, e lego Magli, Edere le Jeremote.

₂₄Tšeo ke tšona ditlogolo tša Lefi ka dikgorwana le dihlogo tša malapa, yo mongwe le yo mongwe wa bona a ngwadišitšwe ka leina la gagwe. Mang le mang wa bona, wa mengwaga ye masome a mabedi le go feta fao, o be a na le se a swanetšego go se dira modirong wa Tempele ya Morena.

₂₅Dafida a re: “Morena Modimo wa Israele o agišitše setšhaba sa gagwe nageng ye, mme yena o tla dula mo Jerusalema go ya go ile. ₂₆Ka gona go ka se hlwe go sa nyakega gore Balefi ba rwale Tente ya bodulo bja Morena le ditlabakelo ka moka tše di šomišwago tirelong.” ₂₇Go ya ka ditaelo tša Dafida tša mafelelo Balefi ka moka ba be ba ngwadišetšwa modiro ge ba na le mengwaga ye masome a mabedi, ₂₈gomme ba fiwa mediro ye: go thuša baprista ba lešika la Arone tirelong ya Tempeleng, go hlokomela dikgoro le diphapoši tša Tempele, le go hlwekišetša dilo tšohle tše kgethwa tirelo; ₂₉go hlokomela dinkgwa tše di abetšwego Morena, bupi bja dikabelo tša bupi, dinkgwana tša diphaphathiana tše di dirilwego ntle le komelo, dikabelo tša go pakwa, le bupi bjo bo hlakantšwego le makhura a mohlware; go ela dihlabelo le dikabelo tša Tempeleng; ₃₀go tumiša le go godiša Morena mesong le mantšiboeng a mangwe le a mangwe, ₃₁le ge dihlabelo tša Morena di tšhungwa ka Sabatha le ka Monyanya wa Lebalana le menyanyeng ye mengwe. Go ile gwa bewa melao ya gore Balefi ba ba swanetšego go dira modiro woo ka dinako tše di beilwego e be ba bakae. Balefi ba fiwa modiro wa go hlankela Morena go ya go ile. ₃₂Ba ile ba fiwa mošomo wa go hlokomela Tente ya bodulo bja Morena le Tempele, le go thuša meloko ya bona, e lego baprista ba lešika la Arone, tirelong ya ka Tempeleng.

₁Ditlogolo tša Arone le tšona di ile tša arolwa dihlopha. Arone o be a na le barwa ba: Nadaba, Abihu, Eleasara le Ithamara. ₂Nadaba le Abihu ba ile ba hlokafala ba se na bana pele tatagobona a hlokafala. Ka gona bomorwarragobona, Eleasara le Ithamara, ya ba baprista. ₃Kgoši Dafida a beakanya ditlogolo tša Arone ka dihlopha go ya ka mediro ya bona, a thušwa ke Tsadoko, setlogolo sa Eleasara, le Ahimeleke, setlogolo sa Ithamara. ₄Ditlogolo tša Eleasara di ile tša arolwa dihlopha tše lesome le tše di selelago, mola tša Ithamara tšona di arolwa tše seswai. Seo se ile sa dirwa ka gobane go be go na le dihlogo tša malapa tše ntši gare ga ditlogolo tša Eleasara. ₅Ka ge go be go na le bahlankedi ba Tempele le baetapele go tša sedumedi gare ga ditlogolo tša Eleasara le tša Ithamara, mediro e be e abaganwa ka go dira matengwa. ₆Ditlogolo tša Eleasara le tša Ithamara di be di šielana ka go dira matengwa. Ka morago di be di ngwadišwa ke Shemaya, morwa wa Netanele, yena mongwaledi wa Molefi. Kgoši le bakgomana ba gagwe le moprista Tsadoko le Ahimeleke, morwa wa Abiatare, le dihlogo tša malapa a baprista le tša malapa a Balefi, ka moka ba be ba eba gona ge ba ngwadišwa.

_7-18Dihlopha tšeo tša malapa tše masome a mabedi a metšo ye mene di be di latelana ka mokgwa wo ge di abagana mediro:

₁₉Ba be ba šielana ka mokgwa woo ge ba yo phetha mediro ya bona ya ka Tempeleng. Mediro yeo e be e hlomilwe ke rakgolokhukhu wa bona, Arone, ka moo Morena Modimo wa Israele a bego a mo laetše ka gona.

₂₀Tše ke dihlogo tše dingwe tša malapa a lešika la Lefi:

Ao e be e le malapa a Balefi.

₃₁Hlogo ya lapa le lengwe le le lengwe gotee le yo mongwe wa bomorwarragwe ba be ba dira matengwa gore ba bone gore ke mediro efe ye e kgethetšwego bona, go no swana le ka moo meloko ya bobona, e lego baprista ba lešika la Arone, e bego e dira ka gona. Kgoši Dafida le Tsadoko le Ahimeleke le dihlogo tša malapa a baprista le a Balefi ba be ba eba gona ge go dirwa matengwa.

₁Kgoši Dafida le baetapele ba tirelo ba ile ba kgethela dikgorwana tše di latelago ditirelo tša thapelo: Asafo, Hemane le Jedutune. Ba be ba swanetše go bega se Modimo a se nyakago mola ba letša dikgapa, diharepa le masenkana. Le le latelago ke lenaneo la batho ba ba bego ba kgethetšwe ditirelo tša thapelo le modiro wo sehlopha se sengwe le se sengwe se bego se swanetše go o dira:

₂Barwa ba Asafo: Sakure, Josefa, Netania le Asarela. Ba be ba laolwa ke Asafo yo a bego a bega se Modimo a se nyakago nako ye nngwe le ye nngwe ge kgoši a laela.

₃Barwa ba ba selelago ba Jedutune: Gedalia, Tseri, Jesaya, Shimi, Hashabia le Matitia. Ba be ba laolwa ke tatagobona yo a bego a bega se Modimo a se nyakago a letša sekgapa, le gona a reta Morena mme a mo tumiša.

₄Barwa ba Hemane: Bukia, Matania, Usiele, Shubaele, Jerimote, Hanania, Hanani, Eliata, Gidalthi, Romanti-Esere, Joshbekasha, Maloti, Hotire le Mahasiote. ₅Modimo o ile a fa Hemane, moprofeta wa kgoši, barwa bao ba lesome le metšo ye mene le barwedi ba bararo, ka moo a bego a boletše ka gona, gore a tle a dire gore Hemane a be le serithi. ₆Barwa bao ba gagwe ka moka ba be ba letša diharepa le dikgapa le masenkana ge go opelwa tirelong ya Tempele. Ba be ba laolwa ke yena tatagobona. Ge e le Asafo le Jedutune le Hemane bona ba be ba laolwa ke kgoši.

₇Banna ba ba masome a mabedi a metšo ye mene, ka moka e be e le ditsebi tša mediro ya tšona, gomme Balefi ba gabobona e le diopedi tše di rutilwego. Ka moka e be e le banna ba makgolo a mabedi le masome a seswai le metšo ye seswai.

₈Ba be ba dira matengwa gore ba tle ba tsebe gore mang o swanetše go dira modiro ofe, bafsa le batšofadi, batsebi ba mediro le ba ba sa ithutago.

_9-31Banna ba ba makgolo a mabedi le masome a seswai le metšo ye seswai ba be ba arotšwe ka malapa a bona e le dihlopha tše masome a mabedi a metšo ye mene tša banna ba lesome le ba babedi, sehlopha se sengwe le se sengwe se hlokometšwe ke moetapele wa sona. Ba be ba šielana ka modiro ka tsela ye: