To The Word – Day 144

₁Solomone, morwa wa Kgoši Dafida, o ile a tia mmušong wa Israele, gomme Morena Modimo wa gagwe a ba le yena mme a mo dira yo maatla kudu.

₂Kgoši Solomone a laela balaodi ba bahlabani ba ba dikete le ba ba makgolo, le baahlodi ba melato, le dihlogo ka moka tša malapa, le baetapele ka moka, ₃le setšhaba ka moka gore ba ye le yena lefelong la tirelo ntotomeng ye e kgobetšwego kua Gibeone. Ba ya moo ka gobane ke mo go bego go le Tente ya bodulo bja Morena ye Moshe, mohlanka wa Morena, a bego a e dirile kua lešokeng. ₄Polokelo ya Kgwerano yona e be e le kua Jerusalema, e beilwe ka tenteng ye Kgoši Dafida a bego a e hlomile ge a tšo tšea Polokelo kua Kiriate-Jearime. ₅Aletare ya mphiri ye e bego e dirilwe ke Betsaliele, morwa wa Uri, Uri morwa wa Hure, le yona e be e le kua Gibeone ka pele ga Tente ya bodulo bja Morena. Kgoši Solomone le setšhaba ka moka ba kgopela keletšo go Morena fao. ₆Solomone a dira dihlabelo tša go tšhungwa ka moka ka diruiwa tše sekete godimo ga aletare yeo ya mphiri moo Tenteng pele ga Morena.

₇Bošego bjoo Modimo a iponagatša go Solomone gomme a mmotšiša a re: “O nyaka gore ke go fe eng?”

₈Solomone a mo fetola a re: “Ka mehla o be o botegela tate Dafida kudu, gomme bjale o dirile gore ke mo hlatlame bogošing. ₉Hle, Morena Modimo, phethagatša se o se holofeditšego tate. O ntirile kgoši ya setšhaba se sentši bjalo ka lerole la lefase, ₁₀ka gona mphe bohlale le tsebo ye e nyakegago gore ke se buše. Go sego bjalo nka kgona bjang go buša setšhaba se sa gago se segolo?”

₁₁Modimo a fetola Solomone a re: “O kgethile gabotse. Bakeng sa go kgopela lehumo goba thoto goba tlhomphego goba lehu la manaba a gago goba le ge e le bophelo bjo botelele, o kgopetše bohlale le tsebo gore o tle o kgone go buša setšhaba sa ka, se ke go beilego kgoši ya sona. ₁₂Ka gona ke tla go fa bohlale le tsebo. Gomme godimo ga tšeo ke tla go fa lehumo le thoto le tlhomphego, tše go sego kgoši ye e kilego ya ba le tšona goba ye e tlago tsoga e bile le tšona.”

₁₃Solomone a tloga lefelong la tirelo ntotomeng ye e kgobetšwego kua Gibeone, mo go bego go le Tente ya bodulo bja Morena, gomme a gomela Jerusalema. A buša Baisraele a le fao. ₁₄A kgobokanya madira a dikoloi tša ntwa tše makgolo a lesome le a mane le banamedi ba dipere ba dikete tše lesome le tše pedi. A bea banamedi ba dipere Jerusalema le metseng ye e bego e na le dikoloi tša ntwa. ₁₅Mehleng ya pušo ya gagwe silibera le gauta e be e le tše ntši mo Jerusalema bjalo ka maswika, gomme mesedere e le ye mentši bjalo ka mego ya nagengtlase. ₁₆Dipere tša Solomone di be di rekwa Mutsri le Silisia ke bagwebi ba kgoši, mme di tlišwa Israele. ₁₇Dikoloi tša ntwa di be di rekwa Egepeta. Bagwebi bao le gona ba be ba rekišetša magoši a Bahete le a Basiria dipere le dikoloi tša ntwa, ba rekiša koloi ya ntwa dipapetlana tša silibera tše makgolo a a selelago, gomme pere e le dipapetlana tše lekgolo le masome a mahlano.

₁Kgoši Solomone o ile a fetša ka gore o tla aga Tempele yeo Morena a bego a tla khunamelwa go yona, le go ikagela mošate. ₂A ntšha banna ba dikete tše masome a a šupago gore ba rwale dikago, le ba dikete tše masome a seswai gore ba betle maswika dithabeng. Ka moka ga bona ba be ba okametšwe ke banna ba dikete tše tharo le makgolo a a selelago.

₃Solomone a roma batseta go Kgoši Hiramo wa Tirose gore ba yo mmotša ba re: “Dirišana le nna bjalo ka ge o be o dirišana le tate, Kgoši Dafida, mola o mo rekišetša dikota tša mosedere gore a ikagele mošate. ₄Ke aga tempele go hlompha Morena Modimo wa ka. E tla ba felo mo gokgethwa moo go tlago tšhumelwa seorelo sa go nkga bose, moo go tlago dula go beakantšwe dinkgwa tše kgethwa, le moo go tlago dirwa dihlabelo tša go tšhungwa ka moka mosong wo mongwe le wo mongwe le mantšiboeng a mangwe le a mangwe, le ka Disabatha, ka Menyanya ya Lebalana, le ka matšatši a menyanya ye mengwe ya Morena Modimo wa rena. Tšeo ka moka ke tše Morena a laetšego Baisraele gore ba di dire go ya go ile. ₅Tempele ye ke tlago e aga e tla ba ye kgolo, ka gobane Modimo wa rena ke yo mogologolo go feta medimo ka moka. ₆Gabotsebotse ga go yo a ka agelago Modimo tempele, ka gobane le bjona bogolo le bophara bja magodimo ga bo mo lekane. Bjale nna ke mang yo nka agelago Morena tempele, ge e se fela go aga lefelwana la go mo tšhumela seorelo? ₇Bjale nthomele monna yo e lego sethakga sa go tloka, sa go šoma ka gauta, ka silibera, ka mphiri, ka tshipi, le ka lešela la bohubedu bja go retela, le la bohubedu bja madi, le la botala bja legodimo. O tla šoma le bakgoni ba Juda le ba Jerusalema bao tate, Dafida, a ba kgethilego. ₈Ke tseba ka moo banna ba gago ba kgonago go rema mehlare ka gona, ka fao nthomele dikota tša thaba ya Lebanone tša mosedere, tša mophaene, le tša mojunipere. Banna ba ka ba tla thušana le ba gago ₉go nthemela dikota tše ntšintši, ka gore tempele ye ke nyakago go e aga e tla ba ye kgolo ye botsebotse. ₁₀Ke tla go romela mekotla ye dikete tše masome a mane le tše nne ya mabele, le garase ye kaalo, le dilitara tša beine tše dikete tše makgolo a mane le tše masome a mane, le tše kaalo tša makhura a mohlware, tšeo ka moka e le dijo tša banna ba gago bao ba remago dikota ba di kgobokanya.”

₁₁Kgoši Hiramo a fetola Solomone ka lengwalo a re: “Ka gobane Morena o rata setšhaba sa gagwe, o go dirile kgoši ya sona. ₁₂A go retwe Morena Modimo wa Israele, Mohlodi wa legodimo le lefase! O file Kgoši Dafida morwa yo bohlale, yo a nago le kwešišo le tsebo, yo a tlago agela Morena tempele, a ba a ikagela mošate. ₁₃Ke go romela mokgoni wa mediro ya diatla yo bohlale wa sethakga yo leina la gagwe e lego Huramo. ₁₄Mmagwe e be e le wa kgoro ya Dane, gomme tatagwe e le motho wa Tirose. Ke sekgwari sa go šoma ka gauta, ka silibera, ka mphiri, ka tshipi, ka maswika le ka dikota. O kgona go šoma ka lešela la bohubedu bja moretele le la botala bja legodimo, le la bohubedu bja madi, le ka lešela le boletiana. O kgona go tloka ka mekgwa ye e fapanego, le go dira mokgabišo wo mongwe le wo mongwe wo a botšwago gore a o dire. A a šome le bakgoni ba gago le bao ba bego ba šomela mong wa ka, Kgoši Dafida, tatago. ₁₅Bjale hle, re romele mabele, garase, beine le makhura a mohlware, dilo tšela o re holofeditšego tšona. ₁₆Ge e le rena re tla rema mesedere ye o e nyakago dithabeng tša Lebanone, ra tlemaganya dikota tšeo, ra di phaphamatša lewatleng go yo fihla Jopa. Go tloga moo o ka di iša Jerusalema.”

₁₇Kgoši Solomone o ile a bala bafaladi ka moka ba ba bego ba dula nageng ya Israele, bjalo ka ge Dafida, tatagwe, a ile a ba bala. Go be go na le bafaladi ba dikete tše lekgolo le tše masome a mahlano le tše tharo le makgolo a a selelago mo Israele. ₁₈A ntšha ba dikete tše masome a a šupago gore ba rwale dikago, ba dikete tše masome a seswai gore ba betle maswika dithabeng, gomme a ba beela baokamedi ba dikete tše tharo le makgolo a selelago.

₁Kgoši Dafida, tatagoSolomone, o be a šetše a beakantše lefelo la Tempele. Lefelo leo le be le le mo Jerusalema, thabeng ya Moria, moo Morena a bego a kile a iponagatša go yena seboeng sa Arauna, Mojebuse. Kgoši Solomone a thoma moago ₂kgweding ya bobedi ya ngwaga wa bone wa ge e le kgoši. ₃Dikelo tše Kgoši Solomone a ilego a aga Tempele ka tšona šedi: Botelele e be e le dimetara tše 27,6, bophara e le dimetara tše 9,2 go ya ka meelo ye metala. ₄Phapoši ya matsenong e be e le ya bophara ka moka bja Tempele, e le dimetara tše 9,2, gomme bogodimo e le dimetara tše 55,2. Bokagare bja phapoši yeo bo be bo manegilwe ka gauta ye e sego ya tswakwa. ₅Phapoši ye kgolo e be e manegilwe ka diphaphathi tša mosedere, mme tšona di manegilwe ka gauta ye botsebotse ye go yona go bego go tlokilwe mehlare ya mepalema le diketane. ₆Kgoši a kgabiša Tempele ka maswikana a bohlokwa a mabotse le ka gauta ye e tšwago nageng ya Parbaime. ₇A šomiša gauta go manega maboto a Tempele, mahlomo, direpodi le mamati. Mo mabotong bašomi ba tloka diswantšho tša bakerubi. ₈Phapoši ya ka gare ye e bego e bitšwa Felo mo Gokgethwakgethwa e be e le ya botelele bja dimetara tše 9,2, le bophara bja dimetara tše 9,2, bjo e bego e le bophara bja Tempele. Go ile gwa šomišwa gauta ya dikilokramo tše dikete tše lesome le tše seswai tša gauta go manega maboto a Felo mo Gokgethwakgethwa; ₉gwa šomišwa gauta ya dikramo tše makgolo a mahlano le masome a a šupago go dira dikokotela, gomme maboto a diphapoši tša ka godimo le ona a be a manegilwe ka gauta.

₁₀Le gona kgoši a laela bašomi ba gagwe gore ba bope diswantšhobopša tša bakerubi ba babedi ka tshipi, ba ba manege ka gauta, gomme ba ba bee ka Felong mo Gokgethwakgethwa _11-13moo ba ilego ba emišwa ba bapetše ba lebeletše mojako. Mokerubi yo mongwe le yo mongwe o be a na le diphego tše pedi, lefego le tee e le la botelele bja dimetara tše 2,3. Mafego ao a be a phurologile gomme a kgwathana gare ga phapoši mme a fihla mabotong ka mathokong a mabedi a phapoši, a phurologile go putla bophara bja phapoši bja dimetara tše 9,2. ₁₄Seširo sa Felo mo Gokgethwakgethwa se be se dirilwe ka lešela la mmala wa botala bja legodimo, le la bohubedu bja go retela, le la bohubedu bja madi, le ka lešela le boletiana, gomme godimo ga seširo seo go na le merokelelo ya diswantšho tša bakerubi.

₁₅Kgoši o ile a dira dikokwane tše pedi, ye nngwe le ye nngwe ya ba ya botelele bja dimetara tše 16,1, gomme a di hloma pele ga Tempele. Ye nngwe le ye nngwe e be e na le hlogwana ya botelele bja dimetara tše 2,3. ₁₆Karolo ya ka godimodimo ya dikokwane e be e kgabišitšwe ka diswantšho tša diketane tše di logagantšwego, le diswantšho tša digarenate tše lekgolo tša mphiri di kgomareditšwe moo diketaneng. ₁₇Dikokwane tšeo di be di hlomilwe ka mathoko a mojako wa Tempele; ya ka thoko ya ka borwa e ile ya rewa leina la Jakine, gomme ya ka leboa ya rewa la Boase.

₁Kgoši Solomone o ile a laela gore go dirwe aletare ya mphiri ya botelele le bophara bja dimetara tše 9,2, le bogodimo bja dimetara tše 4,6. ₂A bopa le legopo la nthetelego ka mphiri wo o tološitšwego la dimetara tše 2,3 go iša fase, le boahlamo bja dimetara tše 4,6, le bontikodiko bja dimetara tše 13,8. ₃Go dikologa karolo ya fase ka moka ya legopo go be go na le melokoloko ye mebedi ya dikgabišo. Dikgabišo tšeo e be e le tša sebopego sa dikgomo tše di bopilwego e le selo se tee le legopo. Disentimetareng tše dingwe le tše dingwe tše masome a mane le metšo ye e selelago go be go na le dikgomo tše lesome le tše pedi. ₄Legopo leo le be le rwelwe ke dikgomo tše lesome le tše pedi tša mphiri tše di bego di lebeletše ka mathoko ohle, tše tharo di lebeletše leboa, tše tharo bodikela, tše tharo borwa, tše tharo bohlabela. ₅Mathoko a legopo e be e le a bokoto bja dimilimetara tše masome a a šupago le tše nne. Morumo wa lona o be o swana le morumo wa nkgo, o ahlametše ka ntle bjalo ka matlakala a letšoba. Legopo leo le be le swara meetse a dilitara tše dikete tše masome a a selelago le metšo ye e selelago. ₆Ba dira le dibjana tše lesome, tše tlhano ya ba tša ka thoko ya ka borwa bja Tempele, mme tše tlhano ya ba tša ka leboa la yona. Dibjana tšeo e be e tla tla e eba tša go tšokoletša ditho tša diruiwa tše di bego di tla tšhungwa e le dihlabelo. Meetse a ka legopong le legolo e be e le ao baprista ba hlapago ka ona.

_7-8Ba dira dihlomamabone tše lesome tša gauta go ya ka moo di bego di fela di dirwa ka gona, le ditafola tše lesome, gomme ba di bea ka phapošing ye kgolo ya Tempele, ba bea dihlomamabone tše tlhano le tafola tše tlhano ka thoko ye nngwe le ye nngwe. Ba dira le meruswi ye lekgolo ya gauta.

₉Ba dira kgoro ya ka gare ya baprista, le kgoro ya ka ntle. Mamati a mejako ya gare ga dikgoro tšeo a be a manegilwe ka mphiri. ₁₀Legopo le ile la bewa ka borwabohlabela bja Tempele.

_11-16Huramo a dira le dipitša, digarafo le meruswi. A fetša mediro ye e latelago ye a ilego a e direla Kgoši Solomone Tempeleng:

₁₇Kgoši a laela gore ka moka ga tšona di bopše gare ga Sukote le Tsereda ka moeding wa Jordane, moo mobu e bego e le wo montši. ₁₈Go ile gwa dirwa dilo tše ntšintši mo e lego gore go ile gwa se ke gwa ba le yo a elago boima bja mphiri wo o ilego wa šomišwa.

₁₉Kgoši Solomone a laela le gore Tempele e direlwe ditlabakelo tša gauta, e lego aletare le ditafola tša dinkgwa tše di abelwago Modimo; ₂₀dihlomamabone le mabone a gauta ye e sego ya tswakwa ao a bego a swanetše go tuka pele ga Felo mo Gokgethwakgethwa, go ya ka moo go bego go laetšwe ka gona; ₂₁dikgabišo tša matšoba, mabone, le ditlao tše di bego di dirilwe ka gauta ye e hlwekilego kudu; ₂₂ditimamabone, meruswi, dipane tša seorelo, le dibjana tša magala. Tše ka moka di be di dirilwe ka gauta ye e sego ya tswakwa. Mamati a ka ntle a Tempele le a Felo mo Gokgethwakgethwa a be a manegilwe ka gauta.

₁Ge Kgoši Solomone a feditše modiro ka moka Tempeleng, a tšea dilo ka moka tše Kgoši Dafida, tatagwe, a bego a di abetše Morena – silibera, gauta, le dilo tše dingwe, a di bea ka diphapošing tša go bolokela tša Tempele.

₂Kgoši Solomone a bitša bagolo ka moka ba Israele, le baetapele ba dikgoro, le mantona a dikgorwana gore ba kgobokane Jerusalema ba tle ba yo tšea Polokelo ya Kgwerano ya Morena Sione, motseng wa Dafida, ba e tliše Tempeleng. ₃Ka moka ba kgobokana ka nako ya Monyanya wa Mešaša, kgweding ya bošupa. ₄Ge bagolo ka moka ba Israele ba fihla, Balefi ba rwala Polokelo ya Kgwerano ₅ba e iša Tempeleng. Baprista bona ba thothela Tente ya bodulo bja Morena le ditlabakelo tša yona ka moka Tempeleng. ₆Kgoši Solomone le setšhaba ka moka sa Israele ba kgobokana pele ga Polokelo ya Kgwerano, gomme ba dira dihlabelo ka dihuswane le dikgomo tše ntšintši tše di sa balegego. ₇Baprista ba rwala Polokelo ya Kgwerano ba e tsenya ka Tempeleng, mme ba e bea moo e swanetšego go dula gona ka Felo mo Gokgethwakgethwa, ka fase ga mafego a bakerubi. ₈Mafego a tšona a a phurologilego a khupetša Polokelo le mapara a yona a go e rwala. ₉Dintlha tša mapara ao di be di bonala fela ge motho a eme go lebana thwii le Felo mo Gokgethwakgethwa, e sego ge a eme mo gongwe. Mapara ao a sa le moo le lehono. ₁₀Go be go se selo se sengwe ka gare ga Polokelo ya Kgwerano ntle le matlapa ale a mabedi ale Moshe a bego a a beile ka gona kua thabeng ya Sinai, ge Morena a dira kgwerano le setšhaba sa Israele mola se etšwa Egepeta.

_11-14Baprista ba ba bego ba le gona ka moka ba be ba itlhwekišitše, go sa lebelelwe gore ke ba dihlopha dife. Gomme diopedi ka moka tša Balefi, Asafo, Hemane le Jedutune, le ba dikgorwana tša bona, ba be ba apere diaparo tša lešela le boletiana. Balefi ba be ba eme kgauswi le lehlakore la ka bohlabela la aletare ka diletšo tša masenkana le diharepa le dikgapa, ba na le baprista ba lekgolo le masome a mabedi bao ba bego ba letša diphala. Baopedi ba be ba opela mola baletši ba letša diphala, masenkana le diletšo tše dingwe ba kwana gabotse le baopedi. Baopedi bao ba be ba reta Morena mme ba mo tumiša ba re:

Ya re ge baopedi ba thoma go opela, Tempele ya tlala leru la seetša se se fahlago sa letago la Morena, gomme ba šitwa go tšwela pele.