To The Word – Day 15

₁Nna, Paulose, moapostola yo ke sego ka bewa ke motho wa nama, le gona go sego motho yo a kilego a rongwa go tlo mpea, eupša ke beilwego ke Jesu Kriste le Modimo, Tatagwe, yo a mo tsošitšego bahung, ₂nna le badumedi bohle ba ba nago le nna mo, re dumediša diphuthego tša Galatia re re:

₃Nke Modimo, Tatagorena, le Morena Jesu Kriste ba le gaugele, ba le fe khutšo.

₄Kriste o ikgafile ka lebaka la dibe tša rena, gore a tle a re lokolle mehleng yeno ye mebe, a phethe thato ya Modimo, Tatagorena. ₅A go tumišwe Modimo go ya go ile! Amene.

₆Ke a kgotsa ge le phakišetša go furalela yo a le biditšego ka kgaugelo ya Kriste, mme le amogela Ebangedi e šele. ₇Gabotse Ebangedi e šele ga e gona, e no ba gore go na le batho ba ba le ferekanyago ba leka go fetola Ebangedi ya Kriste. ₈Fela ge motho a ka le begela Ebangedi ye e fapanago le ye re le begetšego yona, le ge e ka ba rena, le ge e ka ba morongwa wa go tšwa legodimong, a rogakwe! ₉Bjalo ka ge re kile ra le botša, le gonabjale ke sa boeletša ke re: Ge motho a ka le begela Ebangedi ye e fapanago le ye le e amogetšego, a rogakwe!

₁₀Na ge ke realo ke kwagala nke ke gabile go ithatiša batho goba Modimo? Kgane nke ke rata go kgahla batho? Ge nkabe ke sa le wa go kgahla batho, nkabe ke se mohlanka wa Kriste.

₁₁Banabešo, ke a le botša Ebangedi ye ke le begelago yona ye ga e tšwe bathong. ₁₂Ga se ka e fiwa ke motho, ga se ka e rutwa, ke e utolletšwe ke Jesu Kriste.

₁₃Le šetše le kwele tša mola ke sa kgothaletše tumelo ya Sejuda, ka mo ke bego ke hlomara phuthego ya Modimo gampe ke leka go e fediša. ₁₄Mabapi le go phetha tša tumelo ya Sejuda ke be ke phala Bajuda ba bantši ba dithaka tša ka, ka gobane ke be ke hufegela ditlwaedi tše re di filwego ke borakgolokhukhu ba rena.

₁₅Modimo yo a nkgethilego ge ke belegwa o mpiditše ka kgaugelo ya gagwe gore ke mo direle. Ya re ge a seno kgahlwa ₁₆ke go nkutollela Morwagwe gore ke tle ke begele baditšhaba Taba ye Botse ya gagwe, ka se kgopele motho maele, ₁₇le go ya Jerusalema go yo boledišana le bale e bilego baapostola pele ga ka ka se ye. Se ke se dirilego ke go ya Arabia ka ba ka boela Damaskose. ₁₈E rile ge go fetile mengwaga ye meraro ka ya Jerusalema go tsebišiša Kefase, gomme ka dula naye beke tše pedi. ₁₉Baapostola ba bangwe bona ga se ka ba bona, ntle le Jakobose, morwarragoMorena.

₂₀Tše ke di ngwalago tše ke nnete, gomme Modimo o a tseba gore ga ke bolele maaka.

₂₁Go tloga moo ke ile ka ya dileteng tša Siria le tša Tsilitsia. ₂₂Diphuthego tša Bakriste tša Judea di be di sa ntsebe sefahlego. ₂₃Ba be ba no kwa ge go thwe: “Monna yola pele a bego a re hlomara bjale ke yena a begelago batho yona tumelo yela a kilego a leka go e fediša.” ₂₄Gomme ba tumiša Modimo ka lebaka la ka.

₁Ka morago ga mengwaga ye lesome le ye mene ka boela Jerusalema ke na le Barnabase, ka tšea le Titose. ₂Ka ya gona ka ge Modimo a be a nkutolletše gore ke ye. Ka fihla ka boledišana le baetapele ba nnoši ka ba hlalošetša Ebangedi ye ke e begelago baditšhaba. Ke be ke sa nyake gore modiro wa ka wa gonabjale goba wa mehleng ye e fetilego e be lefeela. ₃Le Titose yo a bego a na le nna, le ge e le Mogerike, ga se a ka a gapeletšwa go bolla, ₄le ge ba bangwe ba be ba nyaka gore a bolle. Bona bao ba ile ba tsena mo sehlopheng sa rena ka go khukhuna, ba itira nke ke badumedi gore e tle e be dihlodi tša go bona ge eba bolokologi bja rena ke bja go ba batee le Kriste Jesu. Ba be ba nyaka go re dira makgoba a melao ya Moshe; ₅fela le gatee ra se dumele, ka ge re be re nyaka gore le dule le na le nnete ya Ebangedi.

₆Fela bao ba bego ba tsebja e le baetapele – le ge seo go nna e se selo, gobane Modimo ga a ahlole motho go ya ka tebelelo ya mahlo – bona baetapele bao ba be ba kgotsofetše ka Ebangedi ye ke bego ke e ruta. ₇Ba lemogile gore Modimo o mphile modiro wa go begela baditšhaba Ebangedi, go no swana le ge a file Petrose modiro wa go begela Bajuda Ebangedi. ₈Gobane yena Modimo yo a filego Petrose maatla a go ba moapostola wa Bajuda, nna o mphile maatla a go ba moapostola wa baditšhaba. ₉E rile ge ba lemoga gore modiro wo ke o filwe ke Modimo, Jakobose le Kefase le Johanese, bona ba ba bego ba bonala e le baetapele, ba fana diatla le nna le Barnabase e le sešupo sa gore re badirišani. Ra kwana gore nna le Barnabase re tla ya go baditšhaba, bona ba tla ya go Bajuda. ₁₀Se ba re kgopetšego sona e bile gore re se lebale bahloki, e lego yona taba ye e bego e mpolaiša pelo.

₁₁E rile ge Petrose a fihla Antiokia nna ka mo sola pepeneneng, ka gobane o be a dira phošo ye e lego molaleng. ₁₂Pele ga ge go fihla balatedi ba Jakobose, Petrose o be a eja le badumedi ba go tšwa baditšhabeng. Fela e rile ge banna bao ba fihlile a hunyela a ipea lekata, ka go tšhaba Bajuda. ₁₃Badumedi ba bangwe ba Bajuda le bona ba mo ekiša ba dira tša boikaketši, ešita le Barnabase a gogolwa ke boikaketši bja bona. ₁₄Nna ge ke bona gore ga ba dire ka mo go lebanego go ya ka nnete ya Ebangedi, ka botša Petrose mo pele ga bona ka moka ka re: “Ge wena o lego Mojuda o sa phethe Sejuda, o phetha seditšhaba, o ka gapeletša bjang badumedi ba baditšhaba gore ba phethe Sejuda?”

₁₅Rena re Bajuda ka tlhago, ga re badiradibe ba go tšwa boditšhabeng. ₁₆Le ge go le bjalo, se re se tsebago ke gore motho o lokafatšwa fela ka go dumela go Jesu Kriste, e sego ka go phetha tše di laelwago ke melao ya Moshe. Le rena re dumetše go Kriste Jesu gore re tle re lokafatšwe ka tumelo ya rena go Kriste, e sego ka go phetha tše di laelwago ke melao ya Moshe. Gobane ga go motho yo a lokafatšwago ka go phetha tše di laelwago ke melao yeo. ₁₇Bjale ge rena re nyakago go lokafatšwa ka go dumela go Kriste re ka hwetšwa re le badiradibe bjalo ka baditšhaba, na e ka se be gore Kriste o kgothaletša batho go dira sebe? Le gatee! ₁₈Ge nka tsošološa melao ya Moshe yela ke rilego ga se yona, gona ke tla be ke bontšha gore ke a e tshela. ₁₉Ge go iwa ka melao ya Moshe, nna ke hwile – ke bolailwe ke yona – e le gore ke tle ke phelele Modimo. Ke bolailwe le Kriste sefapanong, ₂₀gomme ge ke phela ga e sa le nna yo a phelago, eupša ke Kriste yo a phelago mo go nna. Bophelo bjo ke bo phelago bjale ke bo phela ka go dumela go Morwa wa Modimo yo a nthatilego gomme a ikgafa ka lebaka la ka. ₂₁Ga se gore kgaugelo ya Modimo ga se selo. Ge eba motho o lokafatšwa ka melao ya Moshe, gona ke gore Kriste o hwetše lefeela.

₁Hee, lena Bagalatia ba ditlaela! Le loilwe ke mang, lena ba le hlalošeditšwego gabotse tša Jesu Kriste, go no swana le ge nke o bapotšwe sefapanong le mo lebeletše?

₂Taba e tee ye ke nyakago go le botšiša yona še: Na e ka ba Moya wo Mokgethwa le o amogetše ka go phetha tše di laelwago ke melao ya Moshe, goba ka go kwa Ebangedi mme la e dumela? ₃Na ruri le ka napa la dio tlaela ka mokgwa wo? Etse le thomile ka go hlohleletšwa ke Moya, gomme bjale le reng le nyaka go feleletša ka tša nama? ₄Kgane tše dintši tše di le hlagetšego di le hlageletše lefeela? Ruri, ga go bjalo! ₅Na e ka ba ge Modimo a le fa Moya wo Mokgethwa a bile a dira mehlolo mo go lena ke ka lebaka la ge le phetha tše di laelwago ke melao ya Moshe, goba ke ka lebaka la ge le ekwa Ebangedi mme le e dumela?

₆Le go Abrahama go bile bjalo. Bjalo ka ge Mangwalo a Makgethwa a bolela, “o ile a dumela go Modimo, gomme ka lebaka la tumelo ya gagwe Modimo a mmona e le moloki.” ₇Ka gona, tsebang ge, gore ba ba nago le tumelo ke bona ditlogolo tša Abrahama. ₈Mangwalo a Makgethwa a boletše e sa le pele gore Modimo o tla lokafatša baditšhaba ka tumelo. Ke ka moo ona Mangwalo a Makgethwa a boditšego Abrahama Ebangedi e sa le pele, a re: “Ditšhaba tšohle di tla šegofatšwa ka wena.” ₉Ka gona, ba ba dumelago ke bona ba ba šegofatšwago gotee le Abrahama yo a dumetšego.

₁₀Bohle ba ba ikantšego go phetha melao ya Moshe ba phela ba rogakilwe. Gobane Mangwalo a Makgethwa a re: “Go rogakwe mang le mang yo a sa phegelelego go phetha tšohle tše di ngwadilwego ka pukung ya melao ya Moshe.” ₁₁Bjale ge, go bonala gabotse gore ga go motho yo a ka lokafatšwago ke Modimo ka melao ya Moshe, gobane Mangwalo a Makgethwa a re: “Yo a lokafaditšwego ke Modimo ka tumelo o tla phela.” ₁₂Melao ya Moshe ga e šome ka tumelo, gobane Mangwalo a Makgethwa a re: “Yo a phethago tše di laelwago ke melao ya Moshe o tla phela ka tšona.”

₁₃Kriste o re lokolotše thogakong ya go tla le melao yeo ka go ba morogakwa yena mong bakeng sa rena; gobane Mangwalo a Makgethwa a re: “Go rogakwe mang le mang yo a fegilwego koteng.” ₁₄Seo Kriste Jesu o se diretše gore tšhegofatšo ye Modimo a e filego Abrahama e tle e fiwe le baditšhaba ka yena, gore ka tumelo re tle re amogele Moya wo Mokgethwa wo re o holofeditšwego.

₁₅Banabešo, ke nyaka go le swantšhetša ka se se tlwaelegilego, gore ge lengwalo la bohwa le tiišeditšwe go ka se be le yo a le hlanamišago goba a le tlaleletšago. ₁₆Modimo o holofeditše Abrahama le setlogolo sa gagwe. Mangwalo a Makgethwa ga a re “le ditlogolo” mo nkego ke tše dintši, etšwe e le se setee fela, mme go thwe “le setlogolo sa gago”, e lego Kriste. ₁₇Ke ra gore Modimo o dirile kgwerano le Abrahama, mme a holofetša e sa le pele gore o tla e phetha. Melao ya Moshe ye e ilego ya bewa ka morago ga mengwaga ye makgolo a mane le masome a mararo e ka se kgone go hlanamiša kgwerano yeo ya phumola kholofetšo ya Modimo. ₁₈Gobane ge bohwa bo ka be bo etla ka melao ya Moshe, gona bo ka be bo sa tle ka kholofetšo. Eupša e be e le ka lebaka la kholofetšo ge Modimo, ka kgaugelo ya gagwe, a efa Abrahama bohwa bjoo.

₁₉Bjale melao ya Moshe ke ya go dirang? Ke ya go tlaleletša kgwerano go bontšha se e lego phošo, e beetšwe go ba gona go fihlela ge go etla setlogolo sa Abrahama, yo e lego yena yo a holofeditšwego. E tlišitšwe ke barongwa ba na le mmaditsela. ₂₀Eupša taba e ama motho o tee fela, mmaditsela ga a nyakege, gomme Modimo yena o tee.

₂₁Kgane seo se ra gore melao ya Moshe e ganana le dikholofetšo tša Modimo? Aowa, le gatee! Gobane ge batho ba ka be ba filwe molao wa go phediša, gona ba ka be ba lokafatšwa ka go o phetha. ₂₂Eupša Mangwalo a Makgethwa a re lefase lohle le golegilwe ke sebe, gore badumedi ba fiwe tše ba di holofeditšwego ka go dumela go Jesu Kriste.

₂₃Mola nako ya go dumela e sešo ya tla, melao ya Moshe e be e re tswaleletše re le dibofša, gwa ba gwa tla nako ya go utollwa ga tša tumelo. ₂₄Ka gona, melao yeo ya ba mohlokomedi wa rena go fihlela ge Kriste a etla, gore re tle re lokafatšwe ka tumelo. ₂₅Bjale ka gore tumelo e tlile, melao yeo ga e sa le mohlokomedi wa rena.

₂₆Ke ka go dumela go Kriste Jesu ge bohle le le bana ba Modimo. ₂₇Le kolobeditšwe la ba ba tee le Kriste, gomme bjale le phele bjalo ka yena. ₂₈Ka gona Bajuda le baditšhaba ga ba fapane, makgoba le balokologi ga ba fapane, banna le basadi ga ba fapane; bohle le selo se tee ka go ba ba tee le Kriste Jesu. ₂₉Gomme ge le le ba Kriste ke gona ge le le ditlogolo tša Abrahama, gomme le tla fiwa tše Modimo a le holofeditšego tšona le le bajalefa ba gagwe.

₁Ke ra gore mojalefa ge e sa le ngwana ga a fapane le lekgoba ka selo, etšwe e le yena mong wa tšohle. ₂O sa laolwa ke bahlokomedi le ba go mo laolela dithoto go fihlela ge go fihla nako ye e beilwego ke tatagwe. ₃Gomme le rena mola re sešo ra gola mo go tša moya re be re laolwa ke meoya ye e bušago lefase. ₄Fela ya re ge go fihla nako ye e beilwego, Modimo a roma Morwagwe, wa go belegwa ke mosadi, a bušwa ke molao wa Bajuda ge a seno tswalwa, ₅gore a tle a rekolle ba go bušwa ke wona molao woo gore re tle re dirwe bana ba Modimo.

₆Go laetša gore ke lena bana ba Modimo, Modimo o romile Moya wa Morwagwe ka dipelong tša rena, wona wa go goelela wa re: “Aba, Tate!” ₇Ka gona, ga o sa le lekgoba, o morwa, gomme ka ge o le morwa wa Modimo, Modimo o go dirile mojalefa wa gagwe.

₈Kgale mola le be le sa tsebe Modimo le be le khunamela dilo tše ka botšona e sego medimo. ₉Gomme bjale ka gore le tseba Modimo – goba, a ke re bjale ka gore Modimo o a le tseba – le reng le nyaka go boela meoyeng yela ya go fokola ya go se be le mohola ya go buša lefase? Le reng le nyaka go e khunamela gape? ₁₀Go na le matšatši a le a hlomphago, le dikgwedi, le dihla tša meletlo, le mengwaga. ₁₁Ke boifa gore nka no ba ke itapišeditše lefeela ka lena.

₁₂Banabešo, ke a le kgopela, hle, ebang bjalo ka nna. Gape le nna ke bjalo ka lena. Ga se la mphošetša ka selo. ₁₃Le tla gopola gore ke bolwetši bjo bo ilego bja mpha sebaka sa go le begela Ebangedi la mathomo. ₁₄Fela le ge bolwetši bja ka e ile ya ba moleko mo go lena, moleko wa gore le nnyatše goba le ntšhišingwe, ga se la dira bjalo. Sa lena e bile go nkamogela ka mokgwa wo le bego le ka amogela morongwa wa Modimo, ka mokgwa wo le bego le ka amogela Kriste Jesu. ₁₅Bjale lethabo lela la lena le feletše kae? Gape nna nka le hlatsela gore ge go be go kgonegile le ka be le ile la ikgonya mahlo la mpha ona. ₁₆Kgane ke le fetogetše lenaba ge ke le botša nnete?

₁₇Batho bao le ge nke ba tshwenyegile ka lena, maikemišetšo a bona ona ga se a loka. Se ba se gabilego ke go le aroganya le nna, gore le theeletše bona. ₁₈Go tshwenyega ka motho go lokile ge eba maikemišetšo a lokile, gomme seo ke nnete ka mehla, e sego fela ge ke na le lena. ₁₉Lena bana ba ka, ke sa buša ke le kwela bohloko bja go swana le lešoko la mosadi ge a belega, go fihlela ge le swana le Kriste. ₂₀Ke duma ge nkabe ke na le lena gonabjale, gore ke bolele le lena ka boleta. Ke eme hlogo ka taba ya lena.

₂₁Nke le mpotše lena le nyakago go bušwa ke molao wa Moshe: Na le a kwa gore molao wa Moshe o reng? ₂₂O re Abrahama o be a na le barwa ba babedi, yo mongwe a belegwe ke mosadi wa lekgoba, yo mongwe a belegwe ke mosadi wa molokologi. ₂₃Yo wa go belegwa ke mosadi wa lekgoba o be a tswetšwe ka mokgwa wo go tswalwago motho mang le mang; eupša wa go tswalwa ke mosadi wa molokologi yena o be a tswetšwe ka kholofetšo ya Modimo. ₂₄Ditaba tše e dio ba seswantšho. Basadi bao ba babedi ba emetše dikgwerano tše pedi. Mosadi yo bana ba gagwe ba tswalelwago bokgobeng ke Hagare, gomme o emetše kgwerano ye e dirilwego thabeng ya Sinai. ₂₅Sinai ke thaba ya kua Arabia, gomme ke seswantšho sa motse wa gonabjale wa Jerusalema wo o lego bokgobeng gotee le batho ba wona. ₂₆Ge e le Jerusalema ya legodimong yona e lokologile gomme ke mmagorena. ₂₇Gomme Mangwalo a Makgethwa a re:

₂₈Bjale ge, lena banabešo, ke lena bana ba Modimo ka kholofetšo, bjalo ka Isaka. ₂₉Ka nako yela morwa wa go tswalwa bjalo ka motho mang le mang o ile a hlakiša wa go tswalwa ka kholofetšo ya Modimo, gomme le bjale go sa le ka mokgwa woo. ₃₀Fela Mangwalo a Makgethwa ona a reng? A re: “Raka mosadi wa lekgoba le ngwana wa gagwe; gobane morwa wa lekgoba a ka se je bohwa le morwa wa molokologi.” ₃₁Gomme rena, banabešo, ga re bana ba mosadi wa lekgoba, re bana ba mosadi wa molokologi.

₁Kriste o re lokolotše, gomme re lokologile ka mmannete. Ka gona emang le tiile, le se dumele go boela bokgobeng.

₂Theeletšang! Nna, Paulose, ke le botša gore ge le ka bolla, Kriste a ka se le hole ka selo. ₃Ke sa gatelela taba ya gore motho mang le mang yo a dumelago go bolla o tlemegile go phetha melao yohle ya Moshe. ₄Lena ba le nyakago go lokafatšwa ka go phetha melao ya Moshe, le ikgaotše mo go Kriste. Ga le sa kgahla Modimo. ₅Ge e le rena re holofetše gore re tla lokafatšwa ke Modimo; gomme seo ke sona se re se letetšego ka maatla a Moya wo Mokgethwa wo o šomago ka tumelo ya rena. ₆Gobane ge re le ba tee le Kriste, go bolla goba go se bolle ga go bohlokwa; se se lego bohlokwa ke tumelo ye e iponatšago ka lerato.

₇Etse le be le swere gabotse bjang! Bjale ke mang wa go le tlogediša nnete? ₈O le kgonne bjang? Nnete ga se la e tlogedišwa ke Modimo yo a le bitšago. ₉Gape go thwe: “Komelwana ye nyenyane e bediša hlama yohle.” ₁₀Go phela re le ba tee le Morena ga rena go ntira gore ke holofele gore le ka se be le maikemišetšo ao a arogilego nneteng, le gore moferekanyi yoo wa lena, ana ke mang ana ke mang, o tla otlwa ke Modimo.

₁₁Bjale, banabešo, ge eba nna ke sa botša batho gore go bolla go a nyakega, e reng e le gona ke sa hlomarwa? Gape ge go ka be go le bjalo, go ruta batho ga ka ka tša sefapano sa Kriste go ka be go sa kgopiše motho. ₁₂Nke nkabe babolli bao ba le ferekanyago ba bile ba iphagola.

₁₃Ge e le lena, banabešo, le bileditšwe tokologo. Fela le se dumelele gore tokologo ye e le diriše dibe. Sa lena a e be go direlana ka lerato. ₁₄Gobane melao yohle ya Moshe e akaretšwa ka molao o tee wo o rego: “O rate bangwekawena bjalo ka ge o ithata.” ₁₅Fela ge le gobatšana ebile le rathaganyana, gona le itote, ka gore le ka fetšana taa.

₁₆Gomme nna ke re: Phelang ka mokgwa wo le hlahlwago ke Moya, gomme le ka se lakwe ke ditumo tša nama. ₁₇Gobane tše di nyakwago ke nama ya rena di ganana le tše di nyakwago ke Moya, le tše di nyakwago ke Moya di ganana le tše di nyakwago ke nama ya rena. Dilo tše di a ganana, gomme di le šitiša go dira se le se nyakago. ₁₈Ge le hlahlwa ke Moya, gona ga le bušwe ke melao ya Moshe.

₁₉Tše di dirwago ka go hlohleletšwa ke nama di pepeneneng: ke bogwebakathobalano, le bootswa, le bofebe, ₂₀le go khunamela medingwana, le boloi, le lehloyo, le phapano, le tseba, le kgalefo, le bojato, le tshele, le dihlophana, ₂₁le mona, le botagwa, le bohlola, le tše di swanago le tšeo. Ke a le botša, bjalo ka ge ke ile ka le botša pele, ke re ba ba dirago tše dibjalo ba ka se be le bophelo bjo bo sa felego.

₂₂Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, ₂₃le boleta, le boitshwaro. Tša mohuta woo ga go molao wo o di ganago. ₂₄Gomme ba e lego ba Kriste Jesu ba bolaile nama ya bona gotee le dikganyogo le ditumo tša yona. ₂₅Ge eba re phedišwa ke Moya, gona le go laolwa re swanetše go laolwa ke wona. ₂₆Re se ke ra ikgogomoša goba ra rumolana goba ra tsebafelana.

₁Banabešo, ge motho a ka swarwa a dira sebe, lena le hlahlwago ke Moya le mo kgale ka moya wo boleta, gomme motho a itote, gore le yena a se lekege. ₂Le rwadišaneng mathata a lena, gomme ka tsela yeo le tla be le phetha molao wa Kriste. ₃Ge motho a ipona e le selo, mola e se selo, o a iphora. ₄A mongwe le mongwe a itlhahlobe maitshwaro. Ge e le a go loka ke mo a kago ikgantšha ka tše yena mong a di dirilego, a sa di bapetše le tše di dirilwego ke yo mongwe. ₅Gobane mongwe le mongwe o swanetše go ithwalela a gagwe mathata.

₆Yo a rutwago tša tumelo a fele a ngwathiša moruti wa gagwe go tšohle tše dibotse tše a nago le tšona.

₇Le se ke la iphora; Modimo ga a kodutlwe. Se motho a se bjalago ke sona se a tlago se buna. ₈Yo a bjalago tše di kgahlago ditumo tša gagwe tša nama, se a tlago se buna ke lehu le le sa felego; yo a bjalago tše di kgahlago Moya, se a tlago se buna ke bophelo bjo bo sa felego. ₉Re se ke ra lapa go dira tše di lokilego, gobane ge re ka se lape re tla tla re buna ka nako ya gona. ₁₀Ka gona, ge re na le sebaka re direleng batho bohle tše di lokilego, gagolo bao e lego ba tumelo ya rena.

₁₁Bonang gore nna ka seatla sa ka ke le ngwalela ka ditlhaka tše dikgolo bjang. ₁₂Batho bao ba lekago go le gapeletša go bolla ke bona ba ba nyakago go kgantšha mebele ya bona. Seo ba dio se direla gore ba se ke ba hlomarelwa sefapano sa Kriste. ₁₃Ešita le bona bao ba bollago ga se gore ba phetha melao ya Moshe; ba dio nyaka gore le re go bolla ba tle ba kgantšhe gore le obametše setlwaedi se sa go swaya mmele. ₁₄Nnaena nka se ikgantšhe ka selo, ge e se ka sefapano sa Morena wa rena Jesu Kriste, gobane ka sona sefapano se ga ke sa na taba le lefase, le lona lefase ga le sa na taba le nna. ₁₅Go bolla goba go se bolle ga se selo, se segolo ke go bopša lefsa. ₁₆Anke bao ba phelago ba phetha molao wo ba be le khutšo ba be ba gaugelwe – bona e lego Baisraele ba Modimo.

₁₇Ka moso go se sa ba le yo a ntshwenyago, ka gobane mabadi a ke nago le ona mo mmeleng wa ka ke leswao la gore ke nna wa Jesu.

₁₈Banabešo, anke Morena wa rena, Jesu Kriste, a le gaugele. Amene.