To The Word – Day 150

₁Ge monyanya o fedile, batho ka moka ba Israele ba ba bego ba tlile monyanyeng ba ya metseng ya Juda ba kgereša dikokwane tša maswika tša borapedi, ba rema dikota tša borapedi, ba phušola dintotoma tšeo go tšona go bego go khunamelwa medimo ya diswantšho, ba kgereša le dialetare tša medimo yeo. Le nageng ya Efraime le ya Manase ba dira bjalo. Ge ba sentše dilo tšeo ka moka bohle ba boela gae.

₂Kgoši Hiskia a fa baprista le Balefi mediro ya bona ka mo yo mongwe le yo mongwe go bego go mo lebane. Ye mengwe ya mediro yeo e be e le go dira dihlabelo tša go tšhungwa ka moka le dihlabelo tša kagišano, go hlokomela mediro ya ka Tempeleng, le go tumiša le go leboga ka dikarolong tše di fapanego tša Tempele. ₃Mehlapeng ya gagwe a ntšha diruiwa tša dihlabelo tša go tšhungwa ka moka mosong wo mongwe le wo mongwe, le mantšiboeng a mangwe le a mangwe, le tše di bego di hlabja ka Sabatha le ka Monyanya wa Lebalana le ka menyanya ye mengwe ye e nyakwago ke melao ya Morena.

₄Godimo ga moo kgoši a botša batho ba Jerusalema gore ba tliše dihlabelo le dikabelo tše ba bego ba swanetše go di fa baprista le Balefi, gore nako ka moka ba tle ba hlokomele tšeo di nyakwago ke melao ya Morena. ₅Ge taba yeo e seno begwa, setšhaba sa Israele sa tliša dimpho tše ntši tša mabele a mabotsebotse, beine ye e di phalago ka moka, makhura a mohlware a makaonekaone, todi ye bosebose, le tše dingwe tše di bunnwego ka mašemong, gomme ba tliša le dikarolo tša lesome tše ntši tša tšohle tše ba nago natšo. ₆Batho ka moka ba ba bego ba dula metseng ya Juda ba tliša dikarolo tša lesome tša dikgomo tša bona le dihuswane tša bona, ba tliša le dimpho tše dingwe tše ntši tše ba ilego ba di abela Morena Modimo wa bona. ₇Dimpho tšeo tša thoma go tlišwa kgweding ya boraro, mme tša bokanywa mekgobokgobo dikgwedi tše nne tše di latelanago. ₈Ge Kgoši Hiskia le bahlankedi ba gagwe ba bona bontši bja dimpho tšeo di ntšhitšwego, ba tumiša Morena le setšhaba sa gagwe sa Israele. ₉Kgoši a botšiša baprista le Balefi ka dimpho tšeo, ₁₀gomme Moprista yo Mogolo, Asaria, setlogolo sa Tsadoko, a re go yena: “Go tloga mola setšhaba se thomago go tliša dimpho tša sona Tempeleng, re ja re khora ebile re šadiša tše ntši. Re na le tšona ka bontši ka gobane Morena o šegofaditše setšhaba sa gagwe.”

₁₁Kgoši a laela gore ba lokiše phapoši tša go bolokela ka Tempeleng, ₁₂gomme ba bea dimpho ka moka le dikarolo tša lesome ka moo ka botshephegi. Molefi yo mongwe yo leina la gagwe e bego e le Konania a bewa mohlokomedi wa dimpho tšeo, gomme Shimi, morwarragwe, a bewa letsogo la gagwe. ₁₃Balefi ba bangwe ba kgethwa gore ba hlokomele dimpho tšeo ba laolwa ke Konania le Shimi. Bona e be e le Jehiele, Asasia, Nahate, Asahele, Jerimote, Josabade, Eliele, Jismakia, Mahate le Benaya. Tšeo ka moka tša dirwa ka taelo ya Kgoši Hiskia le Moprista yo Mogolo, Asaria. ₁₄Kore, morwa wa Jimna, Molefi yo e bego e le moleti lesorong la ka bohlabela la Tempele, o be a hlokometše dimpho tše di bego di abelwa Morena, a di abaganya. ₁₅Metseng ye mengwe mo go bego go dula baprista o be a thušwa ke Balefi ba ba latelago: Edene, Minyamine, Jeshua, Shemaya, Amaria le Shekania. Ba be ba abela Balefi ka moka dijo ka botshephegi go ya ka moo mediro ya bona e bego e le ka gona, ₁₆e sego go ya ka dikgorwana. Ba abela le banna ka moka ba mengwaga ye masome a mararo goba ya go feta fao ba ba bego ba na le mediro ya tšatši le lengwe le le lengwe ka Tempeleng go ya ka maemo a bona. ₁₇Baprista ba be ba ngwadišitšwe go ya ka dikgorwana tša bona, gomme Balefi ba mengwaga ye masome a mabedi goba go feta fao bona ba ngwadišitšwe ka dihlopha tša mešomo. ₁₈Ka moka ga bona ba be ba ngwadišitšwe gotee le bafepša ba bona – basadi, barwa le barwedi – ka gobane go be go nyakega gore ba dule ba itokišeditše go phetha mešomo ya bona ye mekgethwa. ₁₉Le baprista, ditlogolo tša Arone, ba ba bego ba dula kgauswi le phulo ya metse ye ba bego ba e filwe, ba be ba hlokometšwe. Motseng wo mongwe le wo mongwe go be go na le banna ba ba beilwego gore ba abele banna ka moka dijo mo malapeng a baprista le Balefi ka moka ba ba bego ba ngwadišitšwe ka dikgorwana tša bona.

₂₀Gohle nageng ya Juda, Kgoši Hiskia a dira tše di lokilego le tše di kgahlago Morena Modimo wa gagwe, gomme a mmotegela. ₂₁O ile a atlega ka gobane tšohle tše a ilego a di direla Tempele, le tše a ilego a di dira ka go phetha melao le ditaelo tša Morena o be a di dira gore a phethe thato ya Modimo, le gona a di dira ka pelo ya gagwe ka moka.

₁Ka morago ga ditiragalo tšeo tša go botegela Morena tša Kgoši Hiskia, Sanheribe, kgoši ya Asiria, a hlasela Juda. A dikanetša metse ya merako gomme a laela madira a gagwe gore a šwahle merako. ₂Ge Hiskia a bona gore Sanheribe o ikemišeditše le go hlasela Jerusalema, _3-4yena le bahlankedi le balaodi ba gagwe ba eletšana gore ba šibe methopo ka ntle ga motse, gore ge Baasiria ba batamela Jerusalema ba tle ba hloke meetse. Banna bao ba kwana le yena, ba kgobokanya batho ba bantši gomme ba šiba methopo ka moka le mekero ya tikologong ya Jerusalema. ₅Kgoši a tiišetša dibo tša motse ka go lokiša morako, ka go godiša ditora tša tlhapetšo, le ka go aga morako wa ka ntle. A ba a tiiša dibo tše di bego di agilwe mo naga e bego e lekelelantšwe motseng wa Dafida. Le gona a laela gore go dirwe matsolo a mantši le dikotse. ₆A bea balaodi ba madira gore ba laole banna ba motse, gomme a laela banna bao gore ba kgobokane lepatlelong la lesorong la motse. A ba tutuetša a re: ₇“Le beng le sebete, le tie mme le se ke la boifa kgoši ya Asiria goba madira a mantši a a nago le ona. Yo a emego le rena o feta ba ba emego le yena ka maatla. ₈Yena o na le maatla a motho, eupša rena re na le Morena Modimo wa rena go re thuša le go hlabana dintwa tša rena.” Batho ba tiišwa maatla ke mantšu ao a kgoši.

₉Ka morago ga lebaka, ge Sanheribe le madira a gagwe ba sa le Lakishe, a roma batseta go Hiskia le go batho ka moka ba Juda ba ba bego ba na le yena Jerusalema, gore ba yo ba botša ba re: ₁₀“Nna, Sanheribe, kgoši ya Asiria, ke botšiša gore ke eng se le se tshephilego ge le fela le dutše mo Jerusalema mola motse woo o dikaneditšwe. ₁₁Hiskia o le botša gore Morena Modimo wa lena o tla le phološa diatleng tša rena, eupša Hiskia o a le lahletša mme o tla dira gore le hwe ka tlala le lenyora. ₁₂Ke yena yo a phušotšego dintotoma tšeo go tšona go bego go khunamelwa Morena, a kgereša le dialetare tša gagwe, mme ka morago a botša batho ba Juda le ba Jerusalema gore ba khuname pele ga aletare e tee, le gore ba tšhume seorelo go yona fela. ₁₃A ga le tsebe se nna le borakgolokhukhu ba ka re se dirilego ditšhaba tše dingwe? Na medimo ya ditšhaba tšeo e kile ya phološa dinaga tša tšona go kgoši ya Asiria? ₁₄Ke ofe wa medimo yeo ka moka ya ditšhaba tšeo borakgolokhukhu ba ka ba di fedišitšego o kilego wa phološa setšhaba sa wona diatleng tša rena? Bjale ke eng se se le dirago gore le gopole gore Modimo wa lena o ka le phološa? ₁₅Ka gona Hiskia a se ke a le fora goba a le lahletša ka mokgwa woo. Le se ke la mo kgolwa! Ga go le modimo o tee wa setšhaba se sengwe wo o kilego wa kgona go phološa setšhaba sa wona diatleng tša ka, goba diatleng tša borakgolokhukhu ba ka. Ka gona Modimo woo wa lena ruri o ka se le phološe!”

₁₆Batseta ba Asiria ba ba ba tšwela pele le go roga Morena Modimo le Hiskia, mohlanka wa Morena. ₁₇Lengwalo le kgoši ya Asiria e bego e le ngwadile le be le nyatša Morena Modimo wa Israele. Lona le be le re: “Medimo ya ditšhaba tše dingwe ga se ya ka ya phološa ditšhaba tša yona diatleng tša ka, gomme le wona Modimo wa Hiskia o ka se phološe batho ba wona diatleng tša ka.” ₁₈Batseta bao ba goa mantšu ao ka Seheberu gore ba tšhoše batho ba Jerusalema bao ba bego ba nametše morako wa motse, ba ba nole moko gore ba tle ba thope motse ntle le bothata. ₁₉Ba bolela ka Modimo wa Jerusalema ka wona mokgwa woo ba bego ba bolela ka medimo ya ditšhaba tše dingwe, medimo ya diswantšho ye e bego e dirilwe ke batho.

₂₀Ke moo Kgoši Hiskia le moprofeta Jesaya, morwa wa Amotse, ba rapetšego Modimo ba mo llela gore a ba thuše. ₂₁Morena a roma morongwa yo a ilego a bolaya bahlabani ka moka le balaodi le baetapele ba madira a Asiria. Ka gona Kgoši Sanheribe a boela Asiria a lewa ke dihlong. Ka letšatši le lengwe ge a tsena ka tempeleng ya modimo wa gagwe, barwa ba gagwe ba bangwe ba mmolaya ka ditšhoša tša bona.

₂₂Ka tsela yeo Morena a hlakodiša Kgoši Hiskia le batho ba Jerusalema diatleng tša Sanheribe, kgoši ya Asiria, le manabeng a mangwe a bona. A dira gore batho ba phele ka khutšo le dinaga ka moka tše di bapilego nabo. ₂₃Batho ba bantši ba tlišetša Morena dikabelo Jerusalema, le Hiskia ba mo tlišetša dimpho tše bohlokwa, gomme go tloga ka yona nako yeo ditšhaba ka moka tša hlompha Hiskia.

₂₄Mehleng yeo Kgoši Hiskia a babja a ba a nyako hlokafala. A rapela, mme Morena a bolela le yena, a mo fa sešupo sa semaka sa gore o tla fola. ₂₅Eupša Hiskia a thoma go ikgogomoša, ka gona a se ke a leboga Morena ka lebaka la taba yela ye botse a mo diretšego yona; gomme seo sa dira gore Morena a galefele yena le batho ba Juda le ba Jerusalema. ₂₆Eupša mafelelong Hiskia le batho ba Jerusalema ba ikokobetša, ka fao Morena a se ke a ba otla ge Hiskia a sa phela.

₂₇Kgoši Hiskia o ile a huma kudu, gomme yo mongwe le yo mongwe a mo hlompha. A ikagela diphapoši tša go bolokela gauta, silibera, maswikana a bohlokwa, dinoko, dikotse le dilwanalwana tše dingwe tša go kganyogega. ₂₈Godimo ga moo, o be a agetšwe diphapoši tša go bolokela mabele, beine le makhura a mohlware, a agetšwe le mašaka a dikgomo le a dihuswane. ₂₉O ile a ikagela le metse, a rua le dihuswane le dikgomo tše ntši, gobane Modimo o be a mo file thoto ye ntšintši. ₃₀Kgoši Hiskia ke yena yo a ilego a thiba moela wa ka godimo wa mothopo wa Gihone, a epa mokero, a sepediša meetse ka wona, a a theošetša bodikela motseng wa Dafida. Hiskia o ile a atlega go tšohle tše a di dirago, ₃₁eupša mola baemedi ba Babilonia ba tlile go botšiša ka ga semaka sela se bego se diregile nageng, Modimo o ile a mo lesa gore a inaganele, e le fela go mo leka gore a tsebe tše di lego ka pelong ya gagwe.

₃₂Tše dingwe tše Kgoši Hiskia a di dirilego, le go botegela Morena ga gagwe, di ngwadilwe mo pukung ya Pono ya moprofeta Jesaya, morwa wa Amotse, le mo go Ditaba tša magoši a Juda le a Israele. ₃₃Hiskia a ithobalela le botatagwe gomme a bolokwa morotogeng wa go ya mabitleng a mošate. Batho ka moka ba Juda le ba Jerusalema ba mo hlompha lehung la gagwe. Morwa wa gagwe, Manase, a mo hlatlama bogošing.

₁Manase o be a na le mengwaga ye lesome le metšo ye mebedi ge e eba kgoši ya Juda, gomme a buša a le Jerusalema mengwaga ye masome a a fetšago seatla le metšo ye e fetšago seatla. ₂Manase a latela mekgwa ya bohlola ya ditšhaba tše Morena a bego a di rakile nageng ge setšhaba sa gagwe se goroga. ₃A tsošološa dintotoma tšela go tšona go bego go khunamelwa medimo ya diswantšho tšela Hiskia, tatagwe, a bego a di phušotše. A aga dialetare tše go tšona go bego go khunamelwa Baale, a ba a betla dikota tša borapedi, le gona a obamela dinaledi a di hlankela. ₄A aga dialetare tša medimo e šele ka Tempeleng Jerusalema, motse wola Morena a bego a itše ke moo a tlago khunamelwa gona go ya go ile. ₅Ka dikgorong ka pedi tša Tempele a aga dialetare tšeo go tšona go bego go khunamelwa dinaledi. ₆A dira dihlabelo ka barwa ba gagwe ka moeding wa Hinomo. A šomišana le baloi le didupe, a ba a dirišana le dinoge le ba malopo. A dira dibe kudu pele ga Morena, a mo rumola. ₇A hloma seswantšhobetlwa ka Tempeleng, felo mola Modimo a itšego go Dafida le go Solomone, morwa wa gagwe: “Mo Jerusalema, gona ka mo Tempeleng ye, ke felo fa ke go kgethilego nageng ka moka ya dikgoro tše lesome le tše pedi tša Israele gore ke mo ke tlago khunamelwa gona go ya go ile. ₈Gomme ge setšhaba sa Israele se ka phetha ditaelo tša ka ka moka ka potego, sa phetha le melao ka moka le ditaelo tše Moshe, mohlanka wa ka, a ba filego tšona, gona nka se ba lese ba lelekwa nageng ye ke e abetšego borakgolokhukhu ba bona.” ₉Manase a diriša batho ba Juda le ba Jerusalema dibe tše kgolo le go feta le tšela tša ditšhaba tše Morena a ilego a di fediša nageng yeo ge setšhaba sa gagwe se tsena go yona.

₁₀Le ge Morena a ile a bolela le Manase le setšhaba sa gagwe, ba ile ba se ke ba theetša. ₁₁Ka gona Morena a dira gore balaodi ba madira a Asiria ba hlasele Juda. Ba swara Manase, ba mo hlaba ka dikgwega, ba mo tlema ka diketane tša mphiri, gomme ba mo iša Babilone. ₁₂Moo tlaišegong yeo a ikokobetša kudu pele ga Morena Modimo wa gagwe le wa borakgolokhukhu ba gagwe, mme a mo kgopela gore a mo thuše. ₁₃Modimo a kwa thapelo ya Manase mme a e araba ka go mmoetša Jerusalema le ka go dira gore a buše gape. Taba yeo ya kgodiša Manase gore Morena ke Modimo.

₁₄Ka morago ga moo Manase a agela motse wa Dafida morako wa ka ntle ka bodikela bja mothopo wa Gihone ka moeding, go ya Lesorong la Dihlapi, go dikologa karolo ya motse ye e bitšwago Ofele. A iša morako woo godimo kudu. A bea balaodi ba madira metseng ka moka ya Juda ye e ageleditšwego ka merako. ₁₅A tloša medimo e šele ka Tempeleng le seswantšhobetlwa se a bego a se beile ka go yona, le dialetare tša medimo ya diswantšho tše di bego di le mmotong wo go wona go bego go le Tempele, le mafelong a mangwe mo Jerusalema; a lahla dilo tše ka moka ka ntle ga motse. ₁₆A ba a lokiša aletare ya Morena, gomme a dira dihlabelo tša kagišano le tša tebogo godimo ga yona. A laela batho ka moka ba Juda gore ba khunamele Morena Modimo wa Israele. ₁₇Le ge batho ba ile ba no fela ba dira dihlabelo mafelong a mangwe a tirelo, ba be ba di direla Morena fela.

₁₈Tše dingwe tše Manase a di dirilego, le thapelo ye a rapetšego Modimo wa gagwe ka yona, le melaetša ya baprofeta ba ba boletšego le yena ka leina la Morena Modimo wa Israele, ka moka di ngwadilwe mo go Ditaba tša magoši a Israele. ₁₉Thapelo ya kgoši le ka moo Modimo a ilego a e kwa ka gona le dibe ka moka tše a ilego a di dira pele ga ge a sokologa – go se botege ga gagwe, le moo a bego a kgobetše dintotoma tšeo go tšona go bego go khunamelwa medimo ya diswantšho, a hlomile le dikota tša borapedi le medimo ya diswantšho – ka moka di ngwadilwe mo go Ditaba tša baprofeta. ₂₀Manase a ithobalela le botatagwe gomme a bolokwa ka ngwakong wa mošate, mme morwa wa gagwe, Amone, a mo hlatlama bogošing.

₂₁Amone o be a na le mengwaga ye masome a mabedi a metšo ye mebedi ge e eba kgoši ya Juda, gomme a buša a le Jerusalema mengwaga ye mebedi. ₂₂Bjalo ka Manase, tatagwe, a dira dibe pele ga Morena, gomme a dira dihlabelo a di direla medimo ya diswantšho ye tatagwe a bego a e dirile, a ba a e obamela. ₂₃Eupša yena a se ke a swana le tatagwe, a se ke a ikokobetša pele ga Morena; a dira dibe le go feta le yena tatagwe.

₂₄Bahlankedi ba Amone ba mo logela maanomabe gomme ba mmolaela ka ngwakong wa mošate. ₂₅Batho ba Juda ba bolaya babolai ba Amone ka moka, gomme ba bea morwa wa gagwe, Josia, kgoši.

₁Josia o be a na le mengwaga ye seswai ge e eba kgoši ya Juda, mme a buša a le Jerusalema mengwaga ye masome a mararo a motšo o tee. ₂A dira tše di kgahlago Morena; a latela mohlala wa rakgolokhukhu wa gagwe, Kgoši Dafida, a se ke a aroga ditseleng tša gagwe.

₃Ka ngwaga wa seswai wa ge Josia e le kgoši, e sa le lesogana, a thoma go fišegela go tseba Modimo wa rakgolokhukhu wa gagwe, Kgoši Dafida. Ka morago ga mengwaga ye mene a thoma go phušola dintotoma tšeo go tšona go bego go khunamelwa medimo ya diswantšho, a rema le dikota tša borapedi le medimo ye mengwe ka moka ya diswantšho Juda le Jerusalema. ₄A laela gore dialetare tša Baale di kgerešwe, le dialetare tša seorelo tše di bego di le godimo ga dialetare tša Baale di pšhatlwe. Dikota tša borapedi le medimo ye mengwe ka moka ya diswantšho le tšona tša šilaganywa, mme lerole la tšona la gašanywa mabitleng a batho ba ba bego ba di direla dihlabelo. ₅A tšhuma mašapo a baprista ba medimo ya diswantšho godimo ga dialetare tšela ba bego ba khunamela medimo yeo go tšona. Ka go dira tšeo ka moka a hlwekiša Juda le Jerusalema. ₆A dira sona seo metseng ka moka ya naga ya Manase le ya Efraime le ya Simeone, le go yo fihla Naftali le maropeng a a lego kgauswi le metse yeo. ₇Nageng ka moka ya Mmušo wa ka Leboa a kgereša dialetare, a rema le dikota tša borapedi, a šila medimo ya diswantšho, a pšhatlaganya le dialetare tšohle tša seorelo. Ke moka a boela Jerusalema.

₈Ngwageng wa lesome le metšo ye seswai wa pušo ya Kgoši Josia, ge kgoši a sa hlwekiša naga le Tempele, o ile a roma banna ba ba latelago gore ba yo lokiša Tempele ya Morena Modimo wa gagwe: Shafane, morwa wa Atsalia, Maasea, ramotse wa Jerusalema, le Joage, morwa wa Joahase, mohlankedi yo mogolo. ₉Ba neela Hilkia, Moprista yo Mogolo, tšhelete ye baleti ba masoro ba Balefi ba bego ba e kgobokeditše ka Tempeleng. E be e e etšwa go batho ba Efraime le ba Manase le go batho ba bangwe ka moka ba Mmušo wa ka Leboa, le go batho ba Juda, le ba Benjamene, le ba Jerusalema. ₁₀Tšhelete yeo ka morago e ile ya neelwa banna ba ba bego ba hlokometše go lokiša Tempele, gomme bona ba e neela ₁₁babetli le baagi gore ba reke matlapa le dikota tša mahlomo, ba lokiše meago ye magoši a Juda a bego a e lesitše ya onala. ₁₂Banna ba ba bego ba dira modiro woo ba be ba botega. Ba be ba hlokometšwe ke Balefi ba: Jahate le Obadia, ba kgorwana ya Merari, le Sakaria le Meshulamo, ba kgorwana ya Kehate. Balefi bao ka moka e be e le diletši tša dikgwari. ₁₃Balefi ba bangwe ba be ba hlokometše batho ba go thotha dikago, ba hlokometše le bašomi medirong ye e fapanego, mme ba bangwe ba swara dipuku, ba bangwe e le baleti, bangwe e le bahlankedi.

₁₄Ge tšhelete yela e ntšhwa ka phapošing ya polokelo, Hilkia a hwetša puku ya melao ya Morena, melao ye Modimo a bego a ile a e fa setšhaba ka Moshe. ₁₅Hilkia a re go Shafane: “Ke hweditše puku ya melao ka mo Tempeleng!” A neela Shafane puku yeo, ₁₆gomme Shafane a e iša go kgoši. A mmegela a re: “Rena bahlankedi ba gago re dira tšohle tše o re laetšego tšona. ₁₇Re tšere tšhelete yela e bego e le ka Tempeleng gomme re e neetše bahlokomedi le bašomi.” ₁₈A napa a tsebiša kgoši a re: “Hilkia o nneetše puku še.” Gomme a e balela kgoši.

₁₉Ge kgoši a ekwa puku yeo e balwa, a gagola diaparo tša gagwe a huduegile moyeng, ₂₀gomme a laela Hilkia le Ahikamo, morwa wa Shafane, le Abdone, morwa wa Mika, le Shafane, mongwaledi wa kgoro, le Asaya, mohlankedi wa kgoši, a re: ₂₁“Sepelang le yo mpotšišetša Morena, le botšišetšeng le batho ba ba sa šetšego mo Israele le Juda. Le nyakišišeng ka ga dithuto tša puku ye. Morena o re galefetše ka gobane borakgolokhukhu ba rena ga se ba phetha ditaelo tša gagwe, le gona ga se ba dira tše di ngwadilwego ka mo pukung ye.”

₂₂Ka taelo ya kgoši, Hilkia le bao ba bangwe ba ya ba botšiša Hulda, moprofeta wa mosadi, yo a bego a dula karolong ye mpsha ya Jerusalema. Monna wa gagwe, Shalume, morwa wa Tikba, setlogolo sa Hasra, o be a hlokometše diaparo tša ka Tempeleng. Ba botša Hulda se se diregilego, ₂₃gomme yena a ba botša gore ba boele go kgoši ba mmotše gore Morena Modimo wa Israele ₂₄o re: “Ke tlile go tlišetša Jerusalema le batho ba motse woo mahlomola, e lego dithogako ka moka tše di ngwadilwego ka pukung ye e baletšwego kgoši. ₂₅Ba mphuraletše gomme ba direla medimo ye mengwe dihlabelo, gore ba nthumole ka tšohle tše ba di dirago. Ke tukela Jerusalema bogale, gomme bogale bjoo bo ka se fele. ₂₆Ge e le kgoši yena, le mmotše gore Morena Modimo wa Israele o re: ‘O kwele tše di ngwadilwego ka pukung, ₂₇gomme wa ba le pelo ye boleta mme wa ikokobetša pele ga ka, wa gagola diaparo tša gago, wa lla ge o ekwa ka moo ke rego ke tla otla Jerusalema le batho ba motse woo ka gona. Ke kwele thapelo ya gago, ₂₈gomme mahlomola a ke tlago a tlišetša Jerusalema a ka se tle pele o ithobalela le botatago. Ke tla dira gore o ithobalele ka khutšo.’ ”

Banna bale ba boela go Kgoši Josia ba mmotša taba tšeo.

₂₉Kgoši Josia a kgobokanya baetapele ka moka ba Juda le ba Jerusalema, ₃₀gomme ba ya Tempeleng mmogo ba na le baprista le Balefi le batho bohle ba Juda le ba Jerusalema, ba bagolo le ba bannyane. Kgoši a ba balela puku ka moka ya kgwerano ye e bego e hweditšwe ka Tempeleng. ₃₁A ema mo go bego go ema magoši gomme a tsošološa kgwerano pele ga Morena gore o tla mo theetša, a phetha le melao le ditaelo tša gagwe ka pelo ya gagwe ka moka le ka moya wa gagwe ka moka, le gore o tla phetha tše kgwerano e di nyakago, bjalo ka ge go ngwadilwe ka pukung yeo. ₃₂A eniša yo mongwe le yo mongwe Jerusalema le nageng ya Benjamene gore o tla phetha kgwerano. Ka gona batho ba Jerusalema ba phetha tše kgwerano ye ba e dirilego le Modimo wa borakgolokhukhu ba bona e di nyakago. ₃₃Kgoši Josia a fediša dilo tšohle tša bohlola tše di bego di le nageng ya Israele, mme a laela gore batho ka moka ba Israele ba khunamele Morena Modimo wa borakgolokhukhu ba bona. Gomme ge a sa phela ba ile ba no fela ba theetša Morena.

₁Kgoši Josia o ile a keteka Monyanya wa Paseka Jerusalema go hlompha Morena; ka letšatši la lesome le metšo ye mene la kgwedi ya mathomo ba hlaba diruiwa tša monyanya woo. ₂A abela baprista mediro ye ba bego ba swanetše go e phetha ka Tempeleng, gomme a ba tutuetša gore ba e phethe gabotse. ₃Balefi, batho ba go ruta Baisraele, bona ba ba bego ba abetšwe Morena, a ba laela a re: “Tsenyang Polokelo ye kgethwa ya Kgwerano ka Tempeleng ye Kgoši Solomone, morwa wa Dafida, a e agilego. Le se sa e rwalarwala, eupša le hlankele Morena Modimo wa lena le setšhaba sa gagwe sa Israele. ₄Le emeng maemong a lena ka Tempeleng ka dikgorwana, go ya ka mediro ye le e abetšwego ke Kgoši Dafida le morwa wa gagwe, Kgoši Solomone, ₅gomme le ipeakanye ka mokgwa wo e lego gore dikgorwana tša lena di tla kgona go šielana ka go thuša malapa a setšhaba sa Israele. ₆Le hlabe dikwanyana le dipudi tša Paseka. Le itlhwekišeng gomme le lokišeng dihlabelo, gore Baisraele ba gabolena ba tle ba phethe ditaelo tše Morena a ba filego tšona ka Moshe.”

₇Kgoši Josia a ntšha dikgapana le dipudi tše dikete tše masome a mararo mehlapeng ya gagwe, gore ka tšona go direlwe bohle ba ba bego ba le gona dihlabelo tša Paseka. A ntšha le dikgomo tše dikete tše tharo gore setšhaba se di hlabe ka Paseka. ₈Bahlankedi ba gagwe le bona ba ithaopa ba ntšhetša setšhaba le baprista le Balefi diruiwa. Gomme bahlankedi ba ba bego ba hlokometše Tempele, Hilkia, Sakaria le Jehiele, ba fa baprista dihuswane tše dikete tše pedi le makgolo a a selelago, le dikgomo tše makgolo a mararo gore e be tša dihlabelo tša Paseka. ₉Baetapele ba Balefi, Konania, gammogo le Shemaya le Netanele, bomorwarragwe, le Hashabia le Jeiele le Josabade ba ntšha dihuswane tše dikete tše tlhano le dikgomo tše makgolo a mahlano gore Balefi ba dire dihlabelo tša Paseka ka tšona.

₁₀Ge tšohle di lokišeditšwe Paseka, baprista le Balefi ba ema maemong a bona, bjalo ka ge kgoši a be a ba laetše. ₁₁Ge dikgapana le dipudi di hlabilwe, Balefi ba di bua, gomme ba neela baprista madi a tšona. Baprista ba foka madi ao aletareng. ₁₂Ke moka ba abela setšhaba diruiwa tša dihlabelo tša go tšhungwa ka moka, ka dihlopha tša malapa, gore ba tle ba dire dihlabelo ka tšona go ya ka ditaelo tše di ngwadilwego melaong ya Moshe. Le dikgomo ba di dira bjalo; ₁₃Balefi ba beša dihlabelo tša Paseka mollong, go ya ka ditaelo, gomme ba apea dihlabelo tše kgethwa ka dipitša le dipitšana le meruswi, gomme ba fa setšhaba dinama tšeo ka potlako. ₁₄Ka morago ga fao Balefi ba ikapeela dinama, ba apeela le baprista, ditlogolo tša Arone, ka gobane baprista ba be ba tšhuma dihlabelo tša go tšhungwa ka moka, ba tšhuma le makhura a dihlabelo tšeo, ba be ba šoma mošomo woo go fihlela bošego. ₁₅Baopedi ba kgorwana ya Balefi ya Asafo ba be ba eme maemong a bona go ya ka ditaelo tša Kgoši Dafida, le tša Asafo, le tša Hemane, le tša Jedutune, moprofeta wa kgoši. Baleti ba masoro a Tempele ba ile ba se ke ba tloga modirong wa bona, ka gobane Balefi ba bangwe ba ile ba ba lokišetša Paseka. ₁₆Ka gona tirelo yohle ya Morena ya phethwa, e lego go keteka Monyanya wa Paseka le go dira dihlabelo tša go tšhungwa ka moka aletareng, ka moo Kgoši Josia a bego a laetše ka gona. ₁₇Batho ka moka ba Israele ba ba bego ba le gona ba keteka Paseka le Monyanya wa Dinkgwa tše di se nago komelo matšatši a a šupago. ₁₈Go tloga mehleng ya moprofeta Samuele Paseka e be e se ya ka ya ketekwa ka mokgwa woo. Dikgošing tša pele go be go se kgoši ye e bego e kile ya keteka Paseka go swana le ye e ilego ya ketekwa ke Kgoši Josia le baprista le Balefi le batho ba Juda, le ba Israele ka moka ba ba bego ba le gona, le ba Jerusalema. ₁₉Paseka yeo ba ile ba e keteka ngwageng wa lesome le metšo ye seswai wa pušo ya Josia.

₂₀Ka morago ga ge Kgoši Josia a lokišitše Tempele, Kgoši Neko wa Egepeta a tšwa dira go yo lwa le badudi ba Karkemishe, nokeng ya Yufratese. Josia le yena a mo tšwela dira, ₂₁eupša Neko a roma batseta go yena gore ba mmotše ba re: “Ntwa ye ke e lwago ga e ame wena, kgoši ya Juda. Lehono ga se ka tlela go lwa le wena, eupša ke tletše go lwa le manaba a ka, gomme Modimo o mpoditše gore ke akgofe. Modimo o eme le nna, ka gona o se ke wa nthibela; go sego bjalo o tla go bolaya.” ₂₂Eupša Josia o be a ikemišeditše go lwa. A gana go kwa se Modimo a bego a se bolela ka Kgoši Neko, ka gona a apara diaparo tša gore a se ke a tsebja, gomme a yo lwa le yena molaleng wa Megido.

₂₃Ge go lwewa boramesebe ba Baegepeta ba hlaba Kgoši Josia ka metsi. Yena a laela bahlanka ba gagwe a re: “Ntlošeng mo; ke gobetše kudu!” ₂₄Ba mo kuka koloing ya gagwe ya ntwa, ba mmea ka koloing ye nngwe ye a bego a na le yona fao, gomme ba mo iša Jerusalema. Fao a hwa mme a bolokwa mabitleng a botatagwe. Batho ka moka ba Juda le ba Jerusalema ba mo ilela.

₂₅Moprofeta Jeremia a hlamela Kgoši Josia kopelo ya sello. Ya ba setlwaedi sa baopedi ba banna le ba basadi mo Israele go opela kopelo yeo ge ba mo llela. Kopelo yeo e ngwadilwe Pukung ya dikopelo tša Dillo.

₂₆Tše dingwe tše Josia a di dirilego – go botegela Morena ga gagwe, go phetha melao ya Morena, ₂₇le ditaba tša gagwe go tloga mathomong a pušo ya gagwe go iša mafelelong – ka moka di ngwadilwe mo go Ditaba tša magoši a Israele le a Juda.

₁Batho ba Juda ba kgetha morwa wa Josia, Joahase, gomme ba mmea kgoši Jerusalema. ₂Joahase o be a na le mengwaga ye masome a mabedi a metšo ye meraro ge e eba kgoši ya Juda, gomme a buša a le Jerusalema dikgwedi tše tharo. ₃Kgoši Neko wa Egepeta a mo amoga bogoši, gomme a laela gore Juda e lobe ka silibera ya dikilokramo tše dikete tše tharo, le gauta ya dikete tše masome a mararo. ₄Neko a bea Eliakime, ngwanaboJoahase, kgoši ya Juda le Jerusalema, gomme a fetoša leina la gagwe a re ke Joyakime. A iša Joahase Egepeta.

₅Joyakime o be a na le mengwaga ye masome a mabedi a metšo ye mehlano ge e eba kgoši ya Juda, gomme a buša a le Jerusalema mengwaga ye lesome le o tee. A dira dibe pele ga Morena Modimo wa gagwe. ₆Kgoši Nebukadnesare wa Babilonia a hlasela naga ya Juda, a thopa Joyakime, gomme a mo iša Babilonia a tlemilwe ka diketane tša mphiri. ₇Nebukadnesare a tšea dibjana tše dingwe tša ka Tempeleng a di iša mošate ga gagwe kua Babilone. ₈Tše dingwe tše Joyakime a di dirilego, gotee le ditlwaedi tša gagwe tša bohlola le tše mpe tše a di dirilego, di ngwadilwe mo go Ditaba tša magoši a Israele le a Juda. Morwa wa gagwe, Joyakine, a mo hlatlama bogošing.

₉Joyakine o be a na le mengwaga ye lesome le ye seswai ge e eba kgoši ya Juda, gomme a buša a le Jerusalema dikgwedi tše tharo le matšatši a lesome. Le yena a dira dibe pele ga Morena. ₁₀Ge seruthwane se fihla, Kgoši Nebukadnesare a thopa Joyakine a mo iša Babilonia gotee le dilo tše bohlokwa tša ka Tempeleng. Ke moka a bea Tsedekia, rangwane wa Joyakine, kgoši ya Juda le Jerusalema.

₁₁Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le o tee. ₁₂A dira dibe pele ga Morena gomme a se ke a ikokobetša ge moprofeta Jeremia a bolela le yena a romilwe ke Morena.

₁₃Tsedekia a tsogela Kgoši Nebukadnesare maatla. Nebukadnesare o be a mo gapeleditše go ena ka leina la Modimo gore o tla mmotegela. Tsedekia o ile a fela a na le molala wo mothata, a ngangabetše, a gana go boela go Morena Modimo wa Israele. ₁₄Baetapele ba Juda le baprista le batho, le bona ba be ba sa botegele Morena, ba latela mekgwa ya bohlola ya ditšhaba tše di bapilego le bona. Gomme ba tšhilafatša Tempele ye Morena a bego a e kgethwafaditše. ₁₅Morena, Modimo wa borakgolokhukhu ba bona, o be a se a ka a kgaotša go romela baprofeta go tlo kgala setšhaba sa gagwe, ka gobane o be a nyaka go se lota le go boloka Tempele. ₁₆Eupša bona ba be ba kwera batseta bao ba Modimo, ba nyatša mantšu a gagwe, ba bile ba sega baprofeta ba gagwe, go fihlela mafelelong Modimo a galefela setšhaba sa gagwe moo e lego gore se ile sa hloka phološo.

₁₇Ka gona Morena a tliša kgoši ya Babilonia gore e tle e ba hlasele. Kgoši yeo ya bolaya masogana a Juda, le gona ka mola Tempeleng. A se ke a šokela motho, masogana goba dikgarebe, batšofadi le dikoka – bohle Modimo a ba gafela diatleng tša yona. ₁₈Kgoši ya Babilonia ya hula Tempele, le polokelo ya Tempele, le mahumo a kgoši le a bahlankedi ba gagwe, gomme ya tšea tšohle ya gomela natšo Babilone. ₁₉A tšhuma Tempele le motse thokgethokge, gotee le mengwako ya kgoši le dithoto ka moka tša motse tše bohlokwa, gomme a kgereša le morako wa wona. ₂₀A thopa mašaledi ka moka a batho a a iša Babilonia, moo ba ilego ba hlankela yena le ditlogolo tša gagwe e le makgoba go fihlela ge go hlongwa mmušo wa Persia. ₂₁Ka tsela yeo gwa phethega se Morena a bego a se boletše ka moprofeta Jeremia mola a re: “Naga e tla dula e le marope mengwaga ye masome a a šupago ya go tlala, gore e tle e lefiwe ka ge e be e sa khutšišwe ka mengwaga ya Sabatha.”

₂₂Ngwageng wa pele wa ge Korese wa Persia e le kgoši, Morena o ile a phetha se a bego a se boletše ka moprofeta Jeremia. A tutuetša Korese gore a begele batho ba mmušo wa gagwe ka moka le ka mangwalo a re:

₂₃“Kgoši Korese wa Persia o a bega o re: ‘Morena, Modimo wa legodimo, o mpeile mmuši wa lefase ka moka gomme o ntaetše gore ke mo agele tempele kua Jerusalema, nageng ya Juda. Bjale, ka moka ga lena bao le lego setšhaba sa Modimo, sepelang gona, gomme Morena Modimo wa lena a be le lena.’ ”