To The Word – Day 152

₁Ka ngwaga wa pele wa ge Korese wa Persia e le kgoši, Morena o ile a phetha se a bego a se boletše ka moprofeta Jeremia. A tutuetša Korese gore a begele batho ba mmušo wa gagwe ka moka le ka mangwalo a re:

₅Ke moo mantona a dikgorwana tša kgoro ya Juda le ya Benjamene, baprista le Balefi, le yo mongwe le yo mongwe yoo Modimo a bego a mo tutueditše, a ilego a itokišetša go yo aga Tempele ya Morena Jerusalema. ₆Batho ka moka ba ba bego ba dula kgauswi le bona ba ba tiiša maatla ka go ba fa dibjana tša silibera, gauta, mefago, diruiwa, dilo tše dingwe tše bohlokwa, le dikabelo tša Tempele.

₇Korese a ba neela dibjana tšela Kgoši Nebukadnesare a bego a di tšere ka Tempeleng kua Jerusalema a di beile ka tempeleng ya medimo ya gagwe. ₈A di nea Mitredate, ramatlotlo wa mošate, yo a ilego a ngwala lenaneo la tšona, gomme a le neela Sheshbatsare, mmušiši wa naga ya Juda. _9-10Dilo tšeo šedi:

₁₁Dibjana ka moka tša gauta le tša silibera tšeo Sheshbatsare a ilego a di tšea ge a tloga Babilone le mathopša a mangwe ba eya Jerusalema e be e le 5 400.

₁Mathopša a mantši a Juda a ile a tloga nageng ya Babilonia a boela Jerusalema le nageng ya Juda ka moka, yo mongwe le yo mongwe a ya motseng wa gabo. Kgoši Nebukadnesare wa Babilonia o be a ile a ba thopela gona Babilonia. ₂Ge ba boa baetapele ba bona e be e le Serubabele, Jeshua, Nehemia, Seraya, Reelaya, Mordekai, Bilshane, Mispare, Bigbai, Rehume le Baana.

Lenaneo la dikgorwana tša Israele gotee le bontši bja batho ba tšona bao ba ilego ba boa bothopša šele:

_21-35Batho bao borakgolokhukhu ba bona ba bego ba dula metseng ye e latelago pele ba thopša le bona ba ile ba boa:

_36-39Le ke lenaneo la dikgorwana tša baprista tše di ilego tša boa bothopša:

_40-42Dikgorwana tša Balefi tše di ilego tša boa bothopša šedi:

_43-54Tše ke dikgorwana tša bašomi ba ka Tempeleng tšeo di ilego tša boa bothopša:

_55-57Dikgorwana tša bahlanka ba Solomone tše di ilego tša boa bothopša šedi:

₅₈Ditlogolo ka moka tša bašomi ba ka Tempeleng le tša bahlanka ba Solomone tšeo di ilego tša boa bothopša e be e le tše makgolo a mararo le masome a senyane le metšo ye mebedi.

_59-60Go be go na le batho ba makgolo a a selelago le masome a mahlano a metšo ye mebedi bao e bego e le ba kgorwana ya Delaya, ya Tobia, le ya Nekoda ba ba bego ba tlogile motseng wa Tele-Melage le wa Tele-Harsha le wa Kerube le wa Adane le wa Imere; eupša ba be ba se ne bohlatse bja gore ke ditlogolo tša Baisraele.

_61-62Ba dikgorwana tše di latelago tša baprista ba ile ba hloka maina a borakgolokhukhu ba bona lenaneong le le ngwadilwego la malapa: Habaya, Kotse le Barsilai. Rakgolokhukhu wa kgorwana ya baprista ya Barsilai o be a nyetše mosadi wa go tšwa kgorwaneng ya Barsilai wa Gileade, gomme a bitšwa ka leina la kgorwana ya boratswalagwe. Ka ge ba be ba sa kgone go laetša gore borakgolokhukhu ba bona ke bomang, ba ile ba se ke ba amogelwa bopristeng. ₆₃Mmušiši wa Bajuda o ile a ba botša gore ba se ke ba ja dijo tše di abetšwego Modimo, go fihlela go eba le moprista yo a ka šomišago Urime le Tumime.

₆₈Ge mathopša a fihla Jerusalema, mola Tempele ya Morena e bego e le gona, baetapele ba bangwe ba dikgorwana ba ile ba ntšha dikabelo tša boithaopo go thuša gore Tempele e agwe ka lefsa gona mola e bego e agilwe pele. ₆₉Ba ile ba ntšhetša modiro woo ka moo ba bego ba kgona ka gona, gomme gauta ya ba ya dikilokramo tše makgolo a mahlano a metšo ye lesome le ye mebedi, silibera ya ba ya dikilokramo tše dikete tše pedi le makgolo a seswai le masome a a šupago a metšo ye mehlano, diaparo tša baprista ya ba tše lekgolo.

₇₀Baprista le Balefi le ba bangwe ba setšhaba ba dula Jerusalema le tikologong ya motse woo; baopedi le baleti ba masoro a Tempele le bašomi ba ka Tempeleng ba dula metseng ya kgauswi; Baisraele ba bangwe ka moka bona ba dula metseng yeo borakgolokhukhu ba bona ba bego ba dula go yona.

₁Kgweding ya bošupa setšhaba sa Israele se be se dutše metseng ya sona. Ke moka sa phuthegela Jerusalema, ₂gomme Jeshua, morwa wa Jotsadaka, le baprista ba bangwe, le Serubabele, morwa wa Sealtiele, gotee le meloko yabo, ba aga aletare ya Modimo wa Israele ka lefsa, gore ba tle ba tšhumele dihlabelo godimo ga yona go ya ka ditaelo tšela di ngwadilwego ka melaong ya Moshe, monna wa Modimo. ₃Le ge mathopša a a boilego a be a boifa batho ba ba bego ba dula moo nageng, a ile a aga aletare ka lefsa gona mola e bego e agilwe pele. Ka morago ga moo ba thoma gape go dira dihlabelo tša go tšhungwa ka moka tša mehleng tša mesong le tša mantšiboa godimo ga yona. ₄Ba bina Monyanya wa Mešaša go ya ka mo go ngwadilwego ka gona; letšatši le lengwe le le lengwe ba dira dihlabelo tše di nyakegago letšatšing leo; ₅gomme godimo ga moo ba dira dihlabelo tša go tšhungwa ka moka le tša Monyanya wa Lebalana le tša menyanya ye mengwe ka moka ya ka mehla ye go yona go bego go khunamelwa Morena. Ba mo abela le dikabelo ka moka tšeo di bego di abelwa yena ka boithaopo. ₆Le ge batho ba be ba sešo ba thoma go aga Tempele ka lefsa, ba ile ba thoma go tšhumela Morena dihlabelo ka letšatši la pele la kgwedi ya bošupa.

₇Setšhaba se ile sa lefa babetli ba maswika le ba dikota ka tšhelete, sa ba sa romela dijo le dino le makhura a mohlware motseng wa Tirose le wa Sidone gore batho ba gona ba thothe dikota tša mesedere Lebanone, ba di tliše Jopa ka go di phaphamatša ka lewatleng. Tšeo ka moka di be di dirwa ka tumelelo ya Korese, kgoši ya Persia. ₈Gomme ka kgwedi ya bobedi ya ngwaga wo ba boetšego mola Tempele e bego e le gona kua Jerusalema, ba thoma modiro. Serubabele le Jeshua le batho ba gabobona ka moka le baprista le Balefi, gabotsebotse mathopša ka moka ao a bego a boetše Jerusalema, ba thoma modiro woo. Balefi ka moka, go tloga ka ba mengwaga ye masome a mabedi le ya go feta fao, ba bewa bahlokomedi ba modiro wa go aga Tempele ka lefsa. ₉Jeshua, Molefi, barwa ba gagwe le meloko, le Kadmiele le barwa ba gagwe, ba kgorwana ya Hodabia, le bona e ile ya ba bahlokomedi ba modiro wa go aga Tempele ka lefsa. Ba be ba thušwa ke Balefi ba kgorwana ya Henadade.

₁₀E rile ge baagi ba feditše motheo wa Tempele, baprista ba ema maemong a bona ba apere diaparo tša bona, ba swere diphala, gomme Balefi ba kgorwana ya Asafo bona ba ema fao ka diletšo tša masenkana. Ba reta Morena go ya ka ditaelo tša Kgoši Dafida. ₁₁Ba be ba tumiša Morena ka dikopelo ba mo leboga ba re:

₁Manaba a batho ba Juda le ba Benjamene a ile a kwa gore batho bale ba boilego bothopša ba aga Tempele ya Morena Modimo wa Israele ka lefsa. ₂Ke moka ba ya go Serubabele le go mantona a dikgorwana, ba re: “A re le agišeng Tempele. Re khunamela yena Modimo yo le lena le mo khunamelago, gomme e sa le re mo direla dihlabelo go tloga ka nako yela Esarhadone, kgoši ya Asiria, a re romela gore re tle re dule mo.”

₃Serubabele le Jeshua le mantona a dikgorwana ba re go bona: “Ga re nyake go agela Morena Modimo wa rena Tempele le lena. Re tla e aga ka borena, bjalo ka ge Korese, kgoši ya Persia, a re laetše.”

₄Ke moo batho bao ba bego ba dula nageng yeo ba lekilego go nola Bajuda moko le go ba tšhoša gore ba se ke ba aga Tempele. ₅Le gona ba fa bahlankedi ba mmušo wa Persia tsogolekobong gore ba thibele moago woo. Ba tšwela pele le go dira seo nakong ka moka ya pušo ya Korese, go fihlela ge go buša Dariose.

₆Mathomong a pušo ya Kgoši Zerksese manaba a batho ba ba bego ba dutše nageng ya Juda le Jerusalema a ile a tliša lengwalo la go re ba na le molato.

₇Ya re gape ge go buša Artazerksese, kgoši ya Persia, Bishelamo le Mitredate le Tabeele, gotee le ba ba kwanego le bona, ba ngwalela kgoši lengwalo. Lona le be le ngwadilwe ka Searamo, gomme la swanela go fetolelwa lelemeng la gabo kgoši ge le balwa.

₈Mmušiši Rehume le mongwaledi wa selete, Shimshai, le bona ba ngwalela Artazerksese lengwalo le le latelago mabapi le Jerusalema:

₂₃Ge Rehume le Shimshai le ba ba dirišanago le bona ba seno balelwa lengwalo leo la go tšwa go Artazerksese, ba itlhaganela ba ya Jerusalema gomme ba gapeletša Bajuda ka marumo gore ba lese go tsoša motse.

₂₄Modiro wa go tsošološa Tempele o ile wa leswa, wa dula o le bjalo go fihlela ka ngwaga wa bobedi wa pušo ya Dariose, kgoši ya Persia.

₁Mehleng yeo baprofeta ba bangwe, Hagai le Sakaria, morwa wa Ido, ba ile ba thoma go porofeta Bajuda bao ba bego ba dula nageng ya Juda le Jerusalema ka leina la Modimo wa Israele. ₂Ge Serubabele, morwa wa Sealtiele, le Jeshua, morwa wa Jotsadaka, ba ekwa tše di bolelwago, ba ile ba tšwela pele le go aga Tempele ya Jerusalema ka lefsa, gomme baprofeta bao ba babedi ba ba thuša.

₃Ke moka Tatenai, mmušiši wa Yufratese-Bodikela, le Shetare-Bosnai, le bahlankedi ba bangwe bjalo ka bona ba ya Jerusalema ba ba botšiša ba re: “Ke mang yo a le laetšego gore le age Tempele ye le be le e feleletše ka go e kgabiša ka dikota?” ₄Ba ba botšiša le maina a banna ka moka bao ba bego ba ba agiša Tempele. ₅Eupša Modimo o be a lebeletše baetapele ba Bajuda ka botho, ka gona bahlankedi bao ba Bapersia ba kwana gore ba se ke ba ba thibela go fihlela ba ngwalela Dariose gomme a ba fetola. ₆Pego ye ba ilego ba e ngwalela kgoši e be e re:

₁Ka gona Kgoši Dariose a laela gore go nyakišišwe ka dipukung tša mošate tšeo di bego di lotilwe motseng wa Babilone. ₂Eupša e ile ya ba motseng wa Ekbatana wo o bego o ageleditšwe ka morako, seleteng sa Media, mo go ilego gwa hwetšwa lengwalo leo go lona go bego go ngwadilwe ditaba tše di latelago:

₆Ke moo Dariose a ba fetotšego ka lengwalo a re:

₁₃Mmušiši Tatenai le Shetare-Bosnai le bahlankedi ba bangwe bjalo ka bona ba dira ka moo kgoši a laetšego ka gona. ₁₄Baetapele ba Bajuda ba tšwela pele gabotse le moago wa Tempele, ba ntše ba tutuetšwa ke moprofeta Hagai le moprofeta Sakaria. Ba phetha Tempele ka moo ba bego ba laetšwe ke Modimo wa Baisraele le ke Dariose le Korese le Artazerksese, magoši a Persia. ₁₅Ba fetša Tempele ka letšatši la boraro la kgwedi ya Adara, ka ngwaga wa boselela wa ge Kgoši Dariose a buša. ₁₆Setšhaba sa Baisraele – baprista le Balefi le ba bangwe bohle bao ba bego ba boile bothopša – ba napa ba bula Tempele ka lethabo. ₁₇Ge e bulwa ba ile ba dira dihlabelo ka dipoo tše lekgolo le dikgapa tše makgolo a mabedi le dikwanyana tše makgolo a mane; ba dira le dihlabelo tša tshwarelo ya dibe ka diphooko tše lesome le tše pedi. Kgoro ye nngwe le ye nngwe ya Israele ya emelwa ke phooko. ₁₈Le gona ba ile ba beakanya baprista le Balefi gore ba yo swara ditirelo tša ka Tempeleng ya Jerusalema, go ya ka ditaelo tše di lego ka pukung ya Moshe.

₁₉Batho bao ba bego ba boile bothopša ba ile ba bina Monyanya wa Paseka ka letšatši la lesome le metšo ye mene la kgwedi ya pele ya ngwaga wo o latelago. ₂₀Baprista le Balefi ka moka ba be ba itlhwekišitše gomme bjale ba hlweketše tirelo. Balefi ba hlabela batho bohle bao ba bego ba boile bothopša dikwanyana tša Paseka, ba hlabela le baprista, le bona ba itlhabela tšona. ₂₁Dihlabelo tšeo di ile tša lewa ke Baisraele ka moka bao ba bego ba boile bothopša, le bohle bao ba bego ba ikgaogantše le mekgwa ye mebe ya baditšhaba bao ba bego ba dula moo nageng, mme ba tlile go khunamela Morena Modimo wa Israele. ₂₂Ba ile ba bina Monyanya wa Dinkgwa tše di se nago komelo matšatši a a šupago ka lethabo. Ba be ba thabile ka gore Morena o be a dirile gore kgoši ya Asiria e ba sekegele pelo, e ba thuše mo mošomong wa bona wa go tsošološa Tempele ya Modimo wa Israele.