To The Word – Day 16

₁Šea maina a barwa ba Jakobo bao ba ilego ba ya le yena Egepeta, yo mongwe le yo mongwe le lapa la gagwe: ₂Rubene, Simeone, Lefi, Juda, ₃Isakara, Sebulone, Benjamene, ₄Dane, Naftali, Gade le Asere. ₅Batho ka moka ba leloko la Jakobo ka madi e be e le ba masome a a šupago; Josefa, morwagwe, yena o be a šetše a le Egepeta. ₆Josefa le bomorwarragwe ka moka le batho ka moka ba mehleng yeo ba ile ba hwa. ₇Fela Baisraele, ditlogolo tša Jakobo, ba ba le thari ba ata kudu, ba ba le maatla gagolo mme ba enela, ba tlala naga ya Egepeta.

₈Ka morago ga lebaka gwa bewa kgoši ye mpsha Egepeta ye e bego e sa tsebe selo ka Josefa. ₉Ya re go batho ba yona: “Bonang! Baisraele ba ba ata kudu, ba ba le maatla go re feta. ₁₀Ge ntwa e ka tsoga ba ka ema le manaba, ba lwa le rena mme ba tšhaba nageng ye. A re logeng maano gore ba se hlwe ba ata go ya pele.” ₁₁Ka fao Baegepeta ba beela Baisraele bahlapetši ba go ba šomiša sekgoba, gore ba ba fetše maatla ka go ba diriša mešomo ye boima. Baisraele ba agela kgoši metse ye megolo ya polokelo ya Pitome le Ramsese. ₁₂Eupša ge Baegepeta ba gatelela Baisraele kudu, ya ba moo Baisraele ba atago go fetišiša, ba tlala naga moo e lego gore Baegepeta ba ile ba thoma go tlalelwa. ₁₃Ba napa ba gapeletša Baisraele bokgoba ka sehlogo; ₁₄ba ba galakišetša bophelo ka go ba gapeletša mediro ye boima ya maraga le ditena le mediro ka moka ya mašemong ka sehlogo se segolo.

₁₅Bjale kgoši ya Egepeta ya bolela le babelegiši ba basadi ba Baheberu; leina la yo mongwe e be e le Shifra, la yo mongwe e le Pua. ₁₆A re go bona: “Le hlokomeleng ge le belegiša basadi ba Baheberu; ge le hwetša leseana e le mošemane le le bolaye, fela ge le hwetša e le mosetsana le le lese le phele.” ₁₇Fela babelegiši ba be ba boifa Modimo mme ba se ke ba dira ka moo kgoši a ba laetšego, eupša ba lesa bašemane ba phela. ₁₈Ka gona kgoši a bitša babelegiši a re go bona: “Le direlang taba ye? Le reng le lesa bašemane ba phela?”

₁₉Bona ba fetola kgoši ba re: “Basadi ba Baheberu ga ba swane le basadi ba Baegepeta; ba Baheberu ba belega sesolo, mme pele mmelegiši a fihla go bona ba be ba šetše ba belege.” _20-21Ka ge babelegiši ba be ba boifa Modimo, Modimo a ba fa bana. Gomme Baisraele ba fela ba ata ba eba le maatla kudu.

₂₂Ke moo kgoši a laetšego setšhaba sa gagwe ka moka a re: “Mošemanyana yo mongwe le yo mongwe wa Moheberu yo a belegwago le mo lahlele ka nokeng ya Naele, fela banenyana le ba lese ba phele.”

₁Monna yo mongwe wa kgoro ya Lefi o ile a nyala mosadi kgorong ya gabo ya Lefi. ₂Gomme mosadi yoo a belega morwa; ge a bona leseana le tloga le kgahliša, a le uta dikgwedi tše tharo. ₃Mola a sa hlwe a kgona go ka mo uta, a tšea sešegwana sa mahlaka a se botela ka borokhu le moti gore meetse a se ke a tsena. A robatša leseana ka sešegwaneng, a le bea ka gare ga lehlakanoka lešing la noka ya Naele. ₄Kgaetšedi ya leseana ya hlapetša e le kgojana go bona se se ka le hlagelago.

₅Morwedi wa kgoši a theogela nokeng go yo hlapa, mola bahlokomedi ba gagwe ba makgarebe ba itshepelela khwiting ya noka. Ge a re gadi a bona sešegwana ka gare ga lehlakanoka, gomme a roma mohlankedi wa gagwe wa mosetsana go yo mo tšeela sona. ₆Morwedi wa kgoši a se khurumolla, a hwetša lesea, lesogana le itelela! A le kwela bohloko a re: “Etse ruri yo ke yo mongwe wa bana ba Baheberu!”

₇Ke moo kgaetšedi ya lesea a kgopetšego morwedi wa kgoši a re: “A nka se ye ke go biletša mosadi wa motswetši wa Moheberu gore a tle a go antšhetše lesea le?”

₈Morwedi wa kgoši a re go yena: “Sepela, hle!” Ke gona mosetsana a tlogilego a yo bitša yola mmagolesea. ₉Morwedi wa kgoši a botša mosadi yoo a re: “Tšea lesea le o nkantšhetše lona, mme nna ke tla go lefa.” Ka fao mosadi yoo a tšea lesea a le antšha. ₁₀Ge ngwana a tshwele, a mo iša go morwedi wa kgoši, yena a mo dira morwa wa gagwe. Gomme morwedi wa kgoši a mo rea leina la Moshe ka ge a be a re: “Ke ka gobane ke mo ntšhitše meetseng.”

₁₁Mola Moshe a godile, o ile a tšwa a ya go batho ba gabo mme a bona ka moo ba bego ba gapeletšwa mešomo ye boima ka gona. A bona Moegepeta a itia Moheberu wa gabo o šoro. ₁₂A gaša mahlo thoko tšohle, mme ge a bona a sa bonwe ke motho, a bolaya Moegepeta, a mo epela lešabašabeng.

₁₃Ge a eya gape ka letšatši le le latelago, a makala a hwetša banna ba babedi ba Baheberu ba elwa. A re go yoo a nago le phošo: “A o itielang Moheberu wa geno?”

₁₄Mme yoo a mo fetola a re: “Ke mang a go beilego mmuši le moahlodi wa rena? A o ikemišeditše go mpolaya bjalo ka ge o bolaile Moegepeta?” Ke moo Moshe a tšhogilego mme a kgotsa a re: “Kganthe taba yela e a tsebja!”

_15-16Ya re ge kgoši a ekwa taba ye, a nyaka gore Moshe a bolawe, eupša Moshe a tšhaba a yo dula nageng ya Midiane.

Moprista wa Midiane o be a na le barwedi ba ba šupago. Ka letšatši le lengwe ge Moshe a dutše sedibeng, barwedi ba moprista ba tla fao go gelela meetse le go tlatša magopo gore ba noše dihuswane tša tatagobona. ₁₇Fela badiši ba bangwe ba tla ba ba raka; eupša Moshe a emelela, a ba thuša, a noša dihuswane tša bona. ₁₈Ge ba boela go Reuele, tatagobona, yena a ba botšiša a re: “Go tlile bjang gore le goroše e sa le ka pela lehono?”

₁₉Bona ba mo fetola ba re: “Moegepeta yo mongwe o re namoletše diatleng tša badiši, a ba a re gelelela meetse a noša dihuswane.”

₂₀Tatagobona a ba botšiša a re: “A bjale o kae? Le be le reng le mo tlogela? Sepelang le yo mmitša, le tle le mo fe tša go ja.”

₂₁Moshe a dumela go dula ka ga Jetro, gomme yena a mo nyadiša Tsipora, morwedi wa gagwe. ₂₂Tsipora a belegela Moshe morwa, gomme Moshe a mo rea leina la Gershome, ka gobane a be a re: “Ke nna mofaladi nageng e šele.”

₂₃Ka morago ga mengwaga kgoši ya Egepeta ya hwa. Baisraele bona ba fela ba tsetla bokgobeng, ba lla sello se bohloko ba tsoma thušo. Sello sa bona sa rotogela go Modimo. ₂₄Modimo a kwa metsetlo ya bona, mme a gopola kgwerano ya gagwe le Abrahama le Isaka le Jakobo. ₂₅A bona bokgoba bja Baisraele mme a ba šokela.

₁Ka letšatši le lengwe Moshe o be a dišitše dihuswane tša ratswalagwe Jetro, moprista wa Midiane. O be a fudišetša mohlape go ya bosobela lešokeng, a ba a fihla Horebe, thabeng ya Modimo. ₂Gona moo morongwa wa Morena a iponagatša go yena ka kgabo ya mollo e lauma e etšwa gare ga mošwana. Ya re ge a lebelediša, a tlabega a bona mošwana o tuka mollo eupša o sa swe. ₃Moshe a re: “Anke ke batamele ke bontšhiše semaka se: E reng mošwana o sa swe?”

₄Ge Modimo a bona Moshe a batamela, a mmitša a le gare ga mošwana a re: “Moshe, Moshe!”

Moshe a araba a re: “Ke nna e!”

₅Modimo a re: “O se ke wa batamela mo. Rola dieta tša gago gobane mo o emego gona ke felo mo gokgethwa. ₆Ke nna Modimo wa borakgolokhukhu ba gago, Modimo wa Abrahama le Isaka le Jakobo.” Moshe a ipipa sefahlego ka gobane o be a tšhaba go lebelela Modimo.

₇Ke moo Modimo a boletšego a re: “Ke bone gabotse ka moo setšhaba sa ka se tlaišwago ka gona kua Egepeta; ke kwele ba golola ba llela go hlakodišwa diatleng tša bahlapetši ba go ba šomiša sekgoba. Ke tseba mohlako wa bona ka moka. ₈Ke fologetše go tlo ba hlakodiša diatleng tša Baegepeta le go ba ntšha Egepeta go ba iša nageng ye e nonnego ye e nabilego. Ke naga ya mokhora le monono yeo bjale e dulwago ke Bakanana le Bahete le Baamore le Baperise le Bahibe le Bajebuse. ₉Ke kwele sello sa setšhaba sa ka, gomme ke bona ka moo Baegepeta ba ba gatelelago ka gona. ₁₀Bjale ge, ke go roma go kgoši ya Egepeta gore o tle o ete setšhaba sa ka pele o se ntšhe nageng yeo.”

₁₁Moshe a botšiša Modimo a re: “Ke nna mang nka yago go kgoši le gona ka ntšha Baisraele Egepeta?”

₁₂Modimo a mo fetola a re: “Ke tla ba le wena. E tla re ge o ntšhitše Baisraele nageng ya Egepeta, la tla la nkhunamela mo thabeng ye, ke moo o tlago lemoga gore o be o rongwa ke nna.”

₁₃Moshe a mo araba a re: “Ge ke fihla go Baisraele ke ba botša ke re: ‘Modimo wa borakgolokhukhu ba lena o nthomile go lena,’ ba tla mpotšiša ba re: ‘Leina la gagwe ke mang?’ Ke ba botše ke reng?”

₁₄Modimo a re: “Ke nna yo ke lego yena.” A tiišetša a re: “O ba botše o re: ‘KE NNA o nthomile go lena.’ ₁₅O tsebiše Baisraele gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke go romile go bona. Le ke leina la ka go ya go sa felego; ba meloko ka moka ya ka moso ba tla mpitša ka lona leina le. ₁₆Eya o rape pitšo ya bagolo ba Baisraele o ba botše gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke iponagaditše go wena, gomme ke go laetše gore o ba botše o re: ‘Ke be ke le etše hloko, gomme ka bona tše Baegepeta ba le dirago tšona. ₁₇Ke ikemišeditše go le ntšha Egepeta, nageng ye le tlaišwago go yona, ka le iša nageng ya mokhora le monono, nageng ya Bakanana, Bahete, Baamore, Baperise, Bahibe le Bajebuse.’

₁₈“Setšhaba sa ka se tla theeletša se o se bolelago. O ye le bagolo ba Baisraele go kgoši ya Egepeta, le fihle le mmotše le re: ‘Morena, Modimo wa Baheberu, o gahlane le rena; ka gona, re dumelele re sepele leeto la matšatši a mararo re tšwele lešokeng re yo direla Morena Modimo wa rena dihlabelo.’ ₁₉Fela nna ke a tseba gore kgoši ya Egepeta e ka se le dumelele go ya, ka ntle le ge e ka gapeletšwa. ₂₀Ka gona ke tla otlolla letsogo la ka, ka otla Egepeta ka mehlolo ye ke tlago e dira moo. Ka morago ga fao kgoši ya Egepeta e tla le lesa la sepela.

₂₁“Ke tla dira gore Baisraele ba hwetše botho go Baegepeta, gore e tle e re ge setšhaba sa ka se huduga, se se tloge se le fela.

₂₂“Mosadi yo mongwe le yo mongwe wa Moisraele o tla ya go moagišani wa gagwe wa Moegepeta, le go mosadi yo mongwe le yo mongwe wa Moegepeta yo a dulago le yena ka lapeng, a mo kgopela diaparo le dikgabišo tša gauta le tša silibera. Baisraele ba tla di apeša barwa le barwedi ba bona, ya ba ge ba hula Baegepeta.”

₁Moshe a mo fetola a re: “Ge Baisraele ba ka se nkgolwe gomme ba gana go kwa tše ke ba botšago, ke tla reng ge ba ka re Morena ga se a iponagatša go nna?”

₂Morena a botšiša Moshe a re: “Ka seatleng o swereng?”

Moshe a mo fetola a re: “Ke swere lepara.”

₃Morena a re: “Le lahlele fase.” Ge Moshe a lahlela lepara lela fase, la fetoga noga, mme a tsaroga. ₄Ke moka Morena a laela Moshe a re: “Otlolla letsogo o e sware ka mosela.” Moshe a hlaeletša letsogo a e swara, mme noga ya fetoga lepara. ₅Morena a re: “O dire sona se go Baisraele go ba kgodiša gore Morena, Modimo wa borakgolokhukhu ba bona, Modimo wa Abrahama le Isaka le Jakobo, o iponagaditše go wena.”

₆Morena a bolela le Moshe gape a re: “Anke o tsenye seatla ka seaparong kgareng.” Moshe a se tsenya, mme ge a se ntšha, a tšhoga se pherile se kgamathetše dipue tše tšhweu nke ke lehlwa. ₇Ke mo Morena a itšego go Moshe: “Bušetša seatla ka seaparong kgareng.” A se bušetša, gomme ge a se ntšha gape, a makala se fodile se swana le mmele ka moka. ₈Morena a re: “Ge ba ile ba se ke ba go kgolwa, goba ba se ke ba ušwa pelo ke mohlolo wa pele, wo wa bobedi wona o tla ba kgotsofatša. ₉Ge ba ka fela ba sa go kgolwe le ge o ba diretše mehlolo ye mebedi ye, gomme ba se ke ba kwa seo o se bolelago, o ge meetse nokeng ya Naele o a kgaphetše fa go omilego. Meetse a tla fetoga madi fao.”

₁₀Moshe a re: “Aowaowa, Mong wa ka, nka se ye. Ga se nke ka ba seboledi, le gonabjale ge o bolela le nna, mohlanka wa gago, ga se ka fetoga seboledi. Ke lešaedi la polelo, ke a gakanega ka itoma diteme.”

₁₁Morena a re go Moshe: “Ke mang yo a fago motho molomo? Ke mang a dirago motho semuma goba sefoa? Ke mang a mo fago sefahlego goba a mo foufatša? A ga se nna, yena Morena? ₁₂Bjale sepela; ke tla go thuša go bolela, le gona ke tla go botša se o swanetšego go se bolela.”

₁₃Eupša Moshe a mo fetola a re: “Aowa hle, Mong wa ka, roma yo mongwe, e sego nna.”

₁₄Morena a tukela Moshe bogale a re: “A ke re o na le morwarrago Arone, wa Molefi? Ke tseba gore yena o kgona polelo gabotse. Le gonabjale ge ke bolela šole o šetše a le tseleng go go gahlanetša, mme o tla thaba ge a go bona. ₁₅O boledišane naye o mmotše gore a bolele a reng. Nna ke tla le thuša go bolela, ka ba ka le laetša gore le dire eng. ₁₆Arone yena o tla go bolelela le setšhaba. E tla ba yena motseta wa gago, gomme wena o tla ba bjalo ka Modimo go yena, wa mmotša gore a bolele eng. ₁₇Tšea lepara le o le sware; ka lona o tla dira mehlolo.”

₁₈Moshe o ile a boela go Jetro, ratswalagwe, a re go yena: “Anke o ntumelele ke boele Egepeta ke yo hlola ba gešo le go bona gore na ba sa phela.”

Jetro a re: “Tselatšhweu.”

₁₉Ya re Moshe a sa le Midiane Modimo a re go yena: “Boela Egepeta; bale ba bego ba nyaka go go bolaya ba hwile ka moka.” ₂₀Ka gona Moshe a tšea mosadi le barwa ba gagwe, a ba nametša pokolo, a wela tsela go ya Egepeta a swere lepara lela Modimo a go mo laela go le swara.

₂₁Morena a bolela le Moshe a re: “Bjale ka gore o ya Egepeta, o itokišetše go dira mehlolo yela ka moka ke go filego maatla a go e dira pele ga kgoši. Fela nna ke tla thatafatša pelo ya gagwe, mme o tla gana go lesa setšhaba se sepela. ₂₂Ke moo o swanetšego go tsebiša kgoši gore nna, Morena, ke re: ‘Israele ke morwa wa ka wa leitšibolo. ₂₃Ke go boditše gore o lese morwa wa ka a sepele gore a yo nkhunamele, eupša wena o ganne. Bjale ke tlilo bolaya morwago wa leitšibolo.’ ”

₂₄Ya re ge ba le tseleng, felo mo go robalwago gona, Morena a gahlana le Moshe gomme a nyaka go mmolaya. ₂₅Ke moo Tsipora, mogatšaMoshe, a topilego legakabje a ripa ntlhana ya morotwana wa morwagwe; a tšea ntlhana yeo a kgwatha maoto a Moshe ka yona. Tsipora a re go Moshe: “O mogatšake wa madi.” ₂₆Ge a realo o be a era lebollo leo. Ka gona Morena a lesa Moshe.

₂₇Morena o be a rile go Arone: “Sepelela lešokeng o gahlanetše Moshe.” Ke moo Arone a tšwetšego go gahlanetša Moshe thabeng ya Modimo. E rile ge a gahlana naye, a mo atla. ₂₈Moshe a laodišetša Arone ditaba ka moka tše Morena a mo laetšego tšona ge a mo roma; a mmotša le ka mehlolo yela ka moka Morena a bego a mo laetše go e dira. ₂₉Moshe le Arone ba sepela ba ya Egepeta, gomme ba rapa pitšo ya bagolo ba Baisraele. ₃₀Arone a ba laodišetša tšohle tše Morena a di laetšego Moshe, yena a dira mehlolo yela pele ga setšhaba. ₃₁Ba ile ba kgolwa, gomme ge ba ekwa gore Morena o be a ba etše hloko mme a bona ka moo ba tlaišwago ka gona, ba obama ba rapela.

₁Ke gona Moshe le Arone ba ilego go kgoši ya Egepeta ba re go yena: “Morena, Modimo wa Baisraele, o re: ‘Lesa setšhaba sa ka se sepele, gore se ye go ntirela monyanya lešokeng.’ ”

₂Kgoši a ba botšiša a re: “Morena ke mang yo nkago ba ka mo theeletša, ka lesa Baisraele ba sepela? Nna Morena ga ke mo tsebe; ka gona nka se lese setšhaba sa Israele se sepela.”

₃Bona ba re: “Modimo wa Baheberu o ikutolotše go rena. Anke o re dumelele re sepele leeto la matšatši a mararo re tšwele lešokeng go yo direla Morena Modimo wa rena dihlabelo, gore a se tlo re otla ka dinkhu goba ka ntwa.”

₄Kgoši ya re go Moshe le Arone: “Le reng le tlogediša batho modiro wa bona? A makgoba ao a boele modirong! ₅Lena batho tenang le šetše le ntšifetše go feta Baegepeta. Gomme bjale le nyaka go ba lesiša mošomo!”

₆Ka lona letšatši leo kgoši a laela bahlapetši ba go ba šomiša sekgoba ba Baegepeta le dintona tša Baisraele a re: ₇“Le se hlwe le efa batho ditlhaka ge ba dira ditena bjalo ka mehleng, eupša batho bona ka bobona ba itopele ditlhaka. ₈Palo ya ditena yona le ba beele ya go lekana le ya pele, ba se fokoletšwe le ka setena se tee! Ke dibodu, ke ka lebaka leo ba felago ba ntlhodia ba re ke ba lese ba yo direla Modimo wa bona dihlabelo! ₉Gapeletšang banna ba go šoma go fetiša, le gona le ba swareleleng gore ba se ke ba ba le sebaka sa go theeletša mabarebare a maaka.”

₁₀Bahlapetši ba go ba šomiša sekgoba le dintona tša Baisraele ba tšwa ba ya go Baisraele ba re: “Kgoši o re a ka se hlwe a le fa ditlhaka. ₁₁Sepelang le yo itopela tšona mo le ka di hwetšago gona, fela modiro wa lena wona o ka se fokotšwe.” ₁₂Ka gona batho ba phatlalala le naga ya Egepeta ba tsoma dikutwana go di diriša bjalo ka ditlhaka. ₁₃Bahlapetši ba go ba šomiša sekgoba ba Baegepeta ba phegelela go ba diriša ditena tše di lekanago le tšela ba bego ba di dira ka letšatši mola ba sa fiwa ditlhaka. ₁₄Ba itia dintona tša Baisraele tše ba bego ba di beile baokamedi ba bašomi, ba fela ba ba botšiša ba re: “Le reng le šitwa go dira ditena bjalo ka pele?”

₁₅Dintona tša ba tša ya go kgoši tša mo llela tša re: “O re direlang ka mokgwa wo, rena bahlanka ba gago? ₁₆Ga re fiwe ditlhaka, eupša re sa laelwa gwa thwe: ‘Dirang ditena!’ Šefa bjale re a otlwa, e le gore molato ke wa batho ba gago.”

₁₇Kgoši ya ba fetola ya re: “Le dibodu, ga le rate go šoma, ke ka lebaka leo le nkgopelago gore ke le lese le yo direla Morena wa lena dihlabelo. ₁₈Tlogang mo le boeleng mošomong! Le ka se ke la fiwa ditlhaka, fela le swanetše go dira ditena tša palo ya mola pele.” ₁₉Dintona tša lemoga gore bjale gona di wetše bothateng ge di botšwa gore di swanetše go dira ditena tša palo ye e lekanago le ya mola pele letšatši ka letšatši.

₂₀Ge ba boa ba gahlana le Moshe le Arone bao ba bego ba ba letetše, ba re go bona: “Morena o bone se le se dirilego mme o tla le otla ka ge le dirile gore kgoši le bakgomana ba yona ba re hloye. Le ba buletše tsela ya go re bolaya.”

₂₁Moshe a napa a itebanya le Modimo gape a re: “Mong wa ka, o reng o hlokofatša setšhaba se? O be o reng o nthomela fa? ₂₂Go tloga mohlang wola ka go ya go kgoši ke romilwe ke wena, kgoši o napile o hlokofatša setšhaba se. Gomme wena, Morena, ga se wa dira selo go hlakodiša setšhaba sa gago!”

₁Ke moo Morena a rilego go Moshe: “Bjale ke gona o tlago bona se ke tlago se dira kgoši. Ke tla mo gapeletša go lesa setšhaba sa ka gore se sepele. Ee, ke tla mo gapeletša go ba raka nageng ya gagwe.”

₂Modimo a re go Moshe: “Ke nna Morena. ₃Ke iponagaditše go Abrahama le Isaka le Jakobo ke le Modimo Ramaatlaohle, fela ga ka itsebiša bona ka leina la ka la Morena. ₄Gape ke dirile kgwerano ya ka le bona, ke ba holofetša naga ya Kanana, naga yeo ba bego ba falaletše go yona. ₅Bjale nna ke kwele metsetlo ya Baisraele bao Baegepeta ba ba dirilego makgoba, gomme ke gopotše kgwerano ya ka. ₆Ka gona botša Baisraele gore ke re go bona: ‘Ke nna Morena; ke tla le ntšha mešomong ye boima, ka le lokolla bokgobeng bja lena go Baegepeta. Ke tla emiša letsogo la ka le le maatla ba welwa ke kotlo ye šoro, gomme lena ka le phološa. ₇Ke tla le dira setšhaba sa ka, mme nna ka ba Modimo wa lena. Le tla tseba gore ke nna Morena Modimo wa lena ge ke le ntšha mešomong ye boima ya Baegepeta. ₈Ke tla le goroša nageng ye ke e enetšego Abrahama le Isaka le Jakobo; ke tla le fa yona ya ba bohwa bja lena. Ke nna Morena.’ ” ₉Moshe o ile a botša Baisraele taba tše, eupša bona ba gana go mo theeletša ka ge ba be ba nolegile moko ka lebaka la bošoro bja bokgoba.

₁₀Morena a napa a re go Moshe: ₁₁“Sepela o botše kgoši ya Egepeta gore a lese Baisraele ba tloge mo nageng ya gagwe.”

₁₂Fela Moshe a mo fetola a re: “E ka re le Baisraele ba sa ntheeletše, kgoši yena a ntheeletša bjang? Nna polelo e a mpalela.”

₁₃Morena o laetše Moshe le Arone go ya go Baisraele le go kgoši ya Egepeta gore ba ete Baisraele pele ba ba ntšhe Egepeta.

₁₄Dihlogo tša malapa a bona ke tše: Rubene, leitšibolo la Jakobo, o bile le barwa ba: Enoko, Palu, Hetserone le Karmi. Bona e bile borakgolokhukhu ba dikgorwana tša Rubene. ₁₅Simeone yena o bile le barwa ba: Jemuele, Jamine, Ohade, Jakine, Tsohare le Shaulo, morwa wa mosadi wa Mokanana. Bona e bile borakgolokhukhu ba dikgorwana tša Simeone. ₁₆Lefi yena o bile le barwa ba: Gershone, Kehate le Merari. Bona e bile borakgolokhukhu ba dikgorwana tša Lefi. Lefi o phetše mengwaga ye 137. ₁₇Gershone o bile le barwa ba: Libni le Shimi, gomme le bona ba bile le magorwanagorwana. ₁₈Kehate o bile le barwa ba: Amramo, Jitsara, Hebrone le Usiele. Kehate o phetše mengwaga ye 133. ₁₉Merari o bile le barwa ba: Magli le Mushi. Tše ke tšona dikgorwana tša Lefi le ditlogolo tša ona.

₂₀Amramo o ile a nyala rakgadiagwe yo a bitšwago Jogobede, gomme yena a mmelegela Arone le Moshe. Amramo o phetše mengwaga ye 137. ₂₁Jitsara o bile le barwa ba: Korage, Nefege le Sikri. ₂₂Usiele le yena o bile le barwa ba: Mishaele, Elitsafane le Sitri.

₂₃Arone o nyetše Elisheba, morwedi wa Aminadaba, kgaetšedi ya Nagshone. Elisheba o mmelegetše Nadaba, Abihu, Eleasara le Ithamara. ₂₄Korage o bile le barwa ba: Asire, Elkana le Abiasafo; bona e bile borakgolokhukhu ba dikgorwana tša Korage. ₂₅Eleasara, morwa wa Arone, yena o ile a nyala morwedi yo mongwe wa Putiele, gomme yena a mmelegela Finease. Ba e bile bona dihlogo tša malapa le dikgorwana tša kgoro ya Lefi.

₂₆Ge e le Moshe le Arone ke bona bao Morena a rilego go bona: “Ntšhang dikgoro tša Baisraele nageng ya Egepeta ka go hlatlamana ga tšona.” ₂₇Gomme Moshe le Arone e bile bona ba go bolela le kgoši ya Egepeta gore a lokolle Baisraele.

₂₈Mola Morena a bolela le Moshe nageng ya Egepeta, ₂₉o ile a re: “Ke nna Morena. Botša kgoši ya Egepeta tšohle tše ke go botšago tšona.”

₃₀Eupša Moshe a mo fetola a re: “Hle, Morena, o a tseba gore nna polelo e a mpalela; kgoši o tla be a ntheetša a ekwa eng?”