To The Word – Day 168

₂“Ekwang se ke se bolelago,

lena dihlalefi,

ntlhwaeleng tsebe, lena ditsebi.

₃Mantšu a senkwa ka tsebe,

bjalo ka ge dijo di kwelelwa ka leleme.

₄A re ikgetheleng se se lokilego,

re tsebeng se e lego tshwanelo.

₅Gobane Jobo o re:

‘Nna ga ke ne molato,

Modimo ke yena a ntlhokišago toka.

₆Ke dirwa wa maaka,

kganthe ke nepile,

ke gobaditšwe wa go se alafege,

etšwe ke se ka dira sebe.’

₇“Kgane o gona motho wa go etša Jobo,

wa go gegea bangwe sesolo bjalo ka ge a enwa meetse,

₈wa go šika le badiratšempe,

wa go sepela le bakgopo?

₉O re ga go hole motho selo go leka go kgahla Modimo.

₁₀“Ntheeletšeng, lena banna ba go kwešiša!

Modimo a ka se dire se sekgopo,

Ramaatlaohle a ka se dire phošo.

₁₁O otlela batho tše ba di dirilego,

o ba swara ka mo go ba swanelago.

₁₂Ruri, Modimo ga a dire phošo,

Ramaatlaohle ga a kgopamiše toka.

₁₃Kgane ke mang yo a mmeilego Mohlokomedi wa lefase?

Ke mang yo a mmeilego Mmuši wa lefase lohle?

₁₄Ge Modimo a ka amoga batho moya wa gagwe,

a o bušetša go yena mong,

₁₅bohle ba ka hwa ka bjako,

ba boela mobung.

₁₆“Ge o na le kwešišo, o ntheeletše;

se ke go botšago sona o se hlwaele tsebe.

₁₇Kgane mohloi wa toka e ka ba mmuši?

Na Moloki, yena Ramaatla,

wena o ka mmona molato,

₁₈yena yo a ka rego go kgoši: ‘Lefeelana towe!’

goba a re go bakgomana: ‘Bakgopo ke lena!’

₁₉yena yo a sa rerelego bahlomphegi,

a sa bebego bahumi go feta badiidi,

ka ge bohle ba hlodilwe ke yena?

₂₀Ba hwa ka bjako, bošegogare.

Bahlomphegi bao ba re go hwa batimelele;

gape Modimo o tloša mogateledi gabonolo.

₂₁O lebelela mesepelo ya motho,

o mmala magato.

₂₂Ga go leswiswi le leso mo badiratšempe ba ka khutago gona.

₂₃Modimo ga a beele motho nako ya go tlo mo ahlola kgorong.

₂₄O pšhatlaganya boramaatla ntle le go nyakišiša,

a bea ba bangwe legatong la bona.

₂₅Ka ge a tseba tše ba di dirago,

o a ba wiša mme a ba pšhatlaganya bošego.

₂₆O ba otlela bokgopo bja bona batho ka moka ba lebeletše,

₂₇ka ge ba kgelogile,

ba se na taba le ditaelo tša gagwe.

₂₈Ba dirile gore bahloki ba llele Modimo,

gomme yena a kwa ge bahlaki bao ba mo llela.

_29-30“Fela ge Modimo a ka se dire selo,

ke mang yo a ka mo solago?

Ge a ka iphihla,

o tla bonwa ke mang?

O bea mohlokamodimo mmuši wa setšhaba ka moka,

ya ba moreo go sona.

₃₁“Ge motho a ka botša Modimo a re:

‘Ke lahleditšwe, nka se sa dira sebe;

₃₂nthute se ke sa se tsebego;

ge eba ke dirile sebe,

nka se sa boeletša’ –

₃₃na wena o bona nke Modimo o swanetše go otla

motho yo mobjalo?

Ka ge e le wena o ganago

se se dirwago ke Modimo,

ke wena o swanetšego go kgetha,

e sego nna.

Bolela se Modimo a swanetšego go se dira.

₃₄“Fela ba ba kwešišago le ba bohlale ba ba nkwago ba tla re:

₃₅‘Jobo o boledišwa ke go se tsebe,

polelo tša gagwe ga di re selo.’

₃₆A Jobo a lekwe gasehlogo,

ka gobane o fetola bjalo ka yo kgopo.

₃₇Sebe sa gagwe o se oketša ka go gwaba;

o nganga ka mokgwa wo pele ga rena,

a duletše go roga Modimo.”

₂“Na o bona nke ga o foše, Jobo,

ge o re o lokile pele ga Modimo,

₃ge o botšiša Modimo o re:

‘Na go nkholang,

ke tla boelwa ke eng ge ke sa dire sebe?’

₄Nna ke tlile go go fetola,

wena le bagwera ba gago.

₅“Lebelela leratadima,

o bone gore maru a phagame bjang ka godimo ga gago!

₆Ge o dira sebe,

na o se senyetša Modimo?

Kgane ge o tshela molao leboelela,

seo se a mo ama?

₇Ge o dira sa go loka,

gona o mo holang?

Ke eng se sebotse se o mo direlago sona?

₈Gape bokgopo bja gago bo senyetša fela mothokawena,

le go loka ga gago go hola yena fela.

₉“Batho ge ba tlaišwa kudu ba a lla;

ba llela go hlakodišwa go mogateledi yo maatla.

₁₀Ga go be le yo a botšišago a re:

‘Modimo, Mmopi wa rena, o kae,

yena wa go re kgothatša ge re le mathateng,

₁₁yo a re filego bohlale bja go feta bja diphoofolo tša naga,

bja go feta bja dinonyana tše di fofago?’

₁₂Ke ka fao e rego ge ba llela Modimo a se ba fetole,

ka ge e le batho ba babe ba go ikgantšha.

₁₃Gape Modimo ga a theeletše sello sa sehlodimare,

Ramaatlaohle ga a šetše sello se sebjalo.

₁₄“Bjale wena a ka go theeletša bjang o re ga o mmone,

o re taba ya gago e mo go yena,

mme wena o emetše yena fela,

₁₅goba ge o re Modimo ga a otle motho a galefile,

ga a na taba ge motho a mo tsogela maatla?

₁₆Etse go balabala go ka se go hole ka selo, Jobo;

o fafatla bjalo o se na se o se tsebago.”

₂“Se mphelele pelo,

ntheeletše gosenene ke go sedimoše,

ke go botše tše dingwe legatong la Modimo,

₃ke go bontšhe ka tsebo ya ka ye e nabilego gore Mmopi wa ka o lokile.

₄Ruri, ga go sa maaka se ke tlilego go botša sona;

tseba gore o bolela le monna yo bohlalehlale.

₅“Le ge Modimo e le yo maatlamaatla,

ga a hlokomologe motho;

ke senatla sa go kwešiša sengwe le sengwe.

₆Ga a lese bakgopo ba phela,

kganthe badiidi bona o ba dira ka toka.

₇O hlokomela baloki,

a ba dudiša le dikgoši,

ba buša galelele.

Fela ge ba thoma go ikgogomoša,

₈ba kgokwa ka diketane,

ba golegwa ka ditlaišo,

₉ya ba gona a ba bontšhago dibe le dikarogo,

e lego boikgogomošo bja bona.

₁₀O ba dira gore ba mo theeletše

ge a ba eletša gore ba tlogele bobe.

₁₁Ge ba ka mo theeletša,

ba mo direla,

ba tla phela bophelo bja boiketlo le katlego.

₁₂Eupša ge ba ka se mo theeletše,

gona ba tla hwa lehu la lerumo,

ba hwa ba sa tsebe selo.

₁₃“Bahlokamodimo bona ba na le letsoto;

le ge Modimo a ba otla,

ga ba ithapeletše go yena.

₁₄Ba hwa e sa le ba bafsa,

ba hwa lehu la dihlong.

₁₅Modimo o hlakodiša bahlaki mehlakong ya bona,

o šomiša ditlaišego gore ba mo theeletše.

₁₆ “Le wena o tla go ntšha ditlaišegong,

a go bea polokegong;

bojelong bja gago go tla kgobelelwa dijo tše bose.

₁₇Eupša bjale o ahlolwa o otlwa bjalo ka bakgopo,

o otlwa ka mmetela.

₁₈O se goketšwe ke mahumo,

goba wa kgelošwa ke bontši bja tsogolekobong.

₁₉O ka se intšhe mahlokong ka sello

le ge o ka leka ka maatla ohle a gago.

₂₀O se dume gore bošego bo tle,

nako yeo ditšhaba di tlago hwa ka yona.

₂₁O itote gore o se kgelogele bokgopong,

gobane ditlhokofatšo tše tša gago

ke tša go go thibela gore o se arogele go bjona.

₂₂“Se lebale bogolo bja maatla a Modimo.

Morutiši, moswananaye ke mang?

₂₃Ke mang yo a ka mmotšago gore a dire eng,

goba a re go yena: ‘O fošitše’?

₂₄O se lebale go reta ditiro tša gagwe tše batho ba di opetšego ka mehla.

₂₅Batho bohle ba a di bona,

le ge ba di bonela kgole.

₂₆Bogolo bja gagwe ke phetatlhaologanyo,

le botala bja gagwe ga bo latišišege.

₂₇“Ke yena a tšeago meetse lewatleng,

a fetošago pula kgodi.

₂₈O tloromiša pula ya go tšwa marung,

gomme ya nela batho ka medupi.

₂₉Ke mang yo a tsebago go thiba ga maru,

le go ratha ga ditladi leratadimeng,

kua go dulago Modimo?

₃₀O pekenya legadima gohle leratadimeng;

o khurumetša madiba a lewatle.

₃₁Ke gona ka mo a fepago batho,

a ba fago dijo tše dintši.

₃₂O swara legadima ka diatla,

a le laela go ratha mo a nyakago.

₃₃Modumo o bega pula ya matlakadibe,

le dikgomo di dupelela gore e etla.”

₁“E a ntšhoša,

mme pelo ya ka e thebatheba ka maatla.

₂Ekwang mokidimetšo wa lentšu la Modimo;

theeletšang mopopodumo wa molomo wa gagwe!

₃O o kwagatša gohle leratadimeng,

legadima la gagwe le gadima gohle lefaseng,

₄gwa latela modumo wo o kidimetšago,

Modimo a popoduma ka lentšu la bogoši,

legadima lona le le gare le pekenya.

₅Ge Modimo a popoduma,

go direga dimakatšo;

o dira dikgolo tše re sa di kwešišego.

₆O laela lehlwa gore le we lefaseng,

le dipula tša matlorotloro gore di ne.

₇O kgaotša mediro ya batho,

gore bohle ba lemoge ya gagwe.

₈Diphoofolo di ya ka dirobeng tša tšona,

tša iphihla gona ka moo matšabeng a tšona.

₉Ledimo le hlaga le etšwa ka borwa,

botšididi bja tlišwa ke diphefo tša ka leboa.

₁₀Modimo a hema,

o kgahliša meetse,

ona a fetoga ya ba leswika.

₁₁O hupiša maru meetse,

legadima la gagwe la phatlala marung.

₁₂Ke yena Mmilošamaru,

maru, maphethataelo tša gagwe gohle lefaseng.

₁₃O a šomiša go otla batho,

goba go neša pula lefaseng,

goba go bontšha lerato la gagwe.

₁₄“Iketle, Jobo, o theeletše;

o ele dimakatšo tša Modimo hloko.

₁₅Kgane o tseba ka mo Modimo a laolago maru,

goba ka mo a gadimišago legadima la go tšwa go ona?

₁₆Na o tseba mophaphamalo wa maru,

wona mohlolo wa bothakgathakga bja Modimo?

₁₇Wena o kgomarelwago ke diaparo ka sethitho

ge phefo ya ka borwa e tšhuma naga,

₁₈na o ka ala leratadima bjalo ka Modimo,

lona le thatafetšego boka seipone sa tshipi?

₁₉Re botše se re ka se botšago Modimo, ge;

re ka se phegišane naye re sa tsebe taba.

₂₀Na se ke se bolelago ke sa go begelwa Modimo?

Kgane Modimo o swanetše go begelwa ge motho a bolela?

₂₁“Go na le nako ye seedi se timelelago ka marung;

ka morago go tle phefo ya go tšea maru.

₂₂Ka leboa go bonala seetša sa mmala wa gauta;

Modimo o aparetšwe ke letago le le gakgamatšago.

₂₃Ramaatlaohle ga re kgone go mmatamela.

Ke yo maatla kudu,

o re phala bohle ka go loka,

ga a sekamiše toka.

₂₄Ke ka lebaka leo batho ba mo hlomphago,

botsebanyane bona o a ba hlokomologa.”

₁Morena o laola monagano wa kgoši

bjalo ka ge a laola moela wa meetse,

a o lebiša mo a ratago gona.

₂Motho a ka no gopola gore tšohle tše a di dirago di lokile,

kganthe yo a elago maikemišetšo ke Morena.

₃Go phethagatša toka le tshwanelo go kgahla Morena

go phala go mo direla dihlabelo.

₄Ka mehla bakgopo ba a ikgogomoša,

ba a ikgantšha,

gomme seo ke sebe.

₅Dikakanyo tša motho wa seroto di mo tlišetša mokhora,

lepotlapotla lona le boelwa ke bohloki.

₆Humo le hwetšwago ka boradia le nyamelela wa phefo,

le bea motho kotsing ya lehu.

₇Bakgopo ba gogolwa ke šiši ya bona,

ka ge ba gana go dira tše di lokilego.

₈Sekebeka se sepela tsela di manyokenyoke,

mohlokamolato yena o dira tše di lokilego.

₉Go dula nkhutlwaneng ya tlhaka

go phala go dula le mosadi wa go ngamola hlogo.

₁₀Yo kgopo o dula a duma go dira tše mpe;

ga a na botho.

₁₁Go otlwa ga mokodutli e ba go lemoša

mohlokatsebo go tša bophelo.

Go ruta yo bohlale ke go mo okeletša tsebo.

₁₂Modimo, Moloki, o beile lapa la yo kgopo leihlo,

o le fediša molokwanarite.

₁₃Moithibatsebe wa ge go lla modiidi,

le yena ge a lla a ka se kwewe.

₁₄Mpho ya ka sephiring e okobatša kgalefo;

neo ye e fihlilwego ka seaparong e fokotša bogale.

₁₅Ge go dirwa ka toka moloki o a thaba,

kganthe badiratšempe bona ba a tšhoga.

₁₆Yo a se sa dirago tša tlhaologanyo

o tla felela bodulabahu.

₁₇Morataboithabišo o dula a diila;

moratabeine wa go rata le menyaka le yena ga a hume.

₁₈Bakgopo le ba go se tshephege ba welwa ke madimabe,

baloki le batshephegi bona ba a šireletšwa.

₁₉Go iphelela lešokeng go phala go dula le mosadi wa go ngamola hlogo, wa swele.

₂₀Ka lapeng la yo bohlale go letše lehumo le dinkgabose,

lešilo lona le senya tšhelete la šala le le fela.

₂₁Yo a phegelelago go dira ka toka le lerato,

o tla phela ka boiketlo,

o tla swarwa gabotse, a hlomphiwa.

₂₂Molaodi yo bohlale a ka thopa motse wa bagale,

a phušola sebo se ba se tshephilego.

₂₃Yo a itotago ge a bolela o phema mathata.

₂₄Mokodutli ke motho wa mereba le boikgogomošo,

wa go ikgantšha kudu.

₂₅Motho wa sebodu ke moipolai,

ka ge a gana go šoma.

₂₆O hlwela go duma dilo letšatši ka moka;

moloki yena o a fa, ga a timane.

₂₇Morena o šišingwa dihlabelo tša bakgopo,

gagolo ge ba di dira ka maanomabe.

₂₈Hlatse ya maaka e tla kgaotšwa polelong;

bohlatse bja motho yo a theeletšago potšišo gabotse,

bjona bo a amogelwa.

₂₉Moloki o tseba taba tša gagwe,

yo kgopo yena ke tsebanyane fela.

₃₀Morena ga a kgonwe ka bohlale,

goba ka kwešišo,

goba ka maano.

₃₁Pere e ka tlwaeletšwa tšatši la ntwa,

eupša phenyo e tšwa go Morena.