To The Word – Day 182

₁Go madimabe baetapele ba setšhaba sa Morena! Ba swana le badiša bao ba phatlalatšago mohlape mme ba o lesa o bolawa. ₂Mabapi le badiša bao modiro wa bona e lego go hlokomela setšhaba sa gagwe, Morena Modimo wa Israele o re: “Ga se la hlokomela mohlape wa ka; le o šwalalantše, le o lelekile. Bjale ke tla le otlela bokgopo bjo le bo dirilego. ₃Ke tla kgoboketša mašaledi a mohlape wa ka dinageng tšohle tše ke o šwalalanyeditšego go tšona, ka o bušetša lešakeng la ona. O tla ata, o tla oketšega. ₄Ke tla o nyakela badiša ba go o hlokomela. O ka se sa boifa goba wa gakanega goba wa timela. Ke realo, nna, Morena.”

₅Morena o re: “Go tla tla nako yeo ka yona ke tlago fa setšhaba sa ka setlogolo sa Dafida se se lokilego gore e be kgoši. Kgoši yeo e tla buša ka bohlale gomme ya dira tše di swanetšego le tše di lokilego nageng ka moka. ₆Mehleng ya pušo ya gagwe batho ba Juda ba tla bolokega, le batho ba Israele ba tla dula ba iketlile. O tla bitšwa ‘Morena Morephološi’.”

₇Morena o re: “Go tla tla nako yeo ka yona batho ba ka se sa enago ka nna, Morena yo ke phelago, yo ke ntšhitšego setšhaba sa Israele nageng ya Egepeta. ₈Eupša ba tla ena ka nna, Morena yo ke phelago, yo ke ba ntšhitšego nageng ya ka leboa le dinageng ka moka moo ke bego ke ba šwalalanyeditše gona. Ke gona ba tlago dula nageng ye ya bona.”

₉Mabapi le baprofeta Jeremia o re:

₁₅“Ka lebaka leo, seo nna, Morena Ramaatlaohle, ke se bolelago mabapi le baprofeta sese: Ke tla ba leša lengana, ka ba ka ba noša meetse a mpholo, ka gobane baprofeta ba Jerusalema ba botša batho mo gohle nageng gore ba kgeloge.

₁₆“Nna, Morena Ramaatlaohle, ke re: Le se ke la theeletša se baprofeta ba se bolelago; ba le holofetša tše di sego gona. Ba bolela ka dipono tše ba inaganelago tšona, e sego tše di boletšwego ke nna. ₁₇Ba fela ba botša bao ba nnyatšago ba re dilo di tla ba lokela, ba botša le bohle ba ba ngangabalelago go dira se ba se ratago, ba re ba ka se welwe ke madimabe.”

₁₈Ke mang gare ga baprofeta ba yo a kilego a ba lekgotleng la Morena a mmona, a ba a kwa tše a di bolelago? Ke re ke mang gare ga bona yo a kilego a ela dipolelo tšeo tša gagwe hloko mme a di theeletša? ₁₉Kgalefo ya gagwe ke ledimo, ke sesasedi se se gaketšego, se se tlago se tšubutla ka godimo ga bakgopo, ₂₀gomme e ka se kgaotše pele a phetha tšohle tše a nyakago go di phetha. Lena seo le tla se lemoga ge nako e fihla.

₂₁“Baprofeta ba ga se ba rongwa ke nna, ba iketše ka bobona ba kitima. Ga se ka ba fa molaetša, eupša ba no bolela ka leina la ka. ₂₂Ge ba ka be ba bile lekgotleng la ka ba ka be ba begetše setšhaba sa ka molaetša wa ka, gomme ba ka be ba se tlogedišitše mekgwa ya sona ye mebe le tše mpe tše se di dirago.

₂₃“Na ke nna Modimo ge ke le kgauswi fela, ga se nna Modimo le ge ke le kgole? ₂₄Na motho a ka khuta mo nka se kego ka mmona? Kgane ga ke mo gohle legodimong le lefaseng? ₂₅Ke kwele tše baprofeta bao ba go bolela maaka ka leina la ka ba di boletšego, ba re nna ke ba file melaetša ya ka ditorong tša bona. ₂₆Na baprofeta bao ba tla feletša kae le go kgahlwa ke go porofeta maaka le go bega boikaketši bja bona? ₂₇Ba gopola gore ditoro tše ba di botšanago di tla dira gore setšhaba sa ka se ntebale, bjalo ka ge borakgolokhukhu ba bona ba ile ba ntebala, ba thoma go khunamela Baale. ₂₈Moprofeta ge a lorile o swanetše go bolela gore ke toro fela, eupša moprofeta yo a kwelego molaetša wa ka o swanetše go o bega ka potego. Mooko ke eng ge o bapetšwa le mabele? Ke realo, nna, Morena. ₂₉Molaetša wa ka o swana le mollo, ke realo, nna, Morena, o bjalo ka noto ye e pšhatlaganyago maswika. ₃₀Nna, Morena, ke re ke tenwa ke baprofeta bao ba bolelago tšeo di bolelwago ke ba bangwe mme ba di bega gore ke wona molaetša wa ka. ₃₁Ebile ke lwa le baprofeta bao ba bolelago tša bona mme ba re di tšwa go nna. Ke realo, nna, Morena. ₃₂Nna, Morena, ke re ke lwa le baprofeta bao ba bolelago ditoro tša maaka. Ba anega ditoro tšeo gomme ba timetša setšhaba sa ka ka maaka le boikgantšho. Nna ga se ka ba roma goba ka ba laela selo, gomme ga ba thuše setšhaba se ka selo. Ke realo, nna, Morena.”

₃₃Morena a re go nna: “Jeremia, ge setšhaba se goba moprofeta goba moprista a go botšiša a re: ‘Molaetša wa Morena o reng?’ wena o mmotše o re: ‘Lena le morwalo wa Morena, gomme yena o tlilo le rola.’ ₃₄Ge yo mongwe wa setšhaba sa ka goba moprofeta goba moprista a ka bolela mantšu a go re: ‘morwalo wa Morena’, ke tla mo otla, yena le ba lapa la gagwe. ₃₅Se ba swanetšego go se dira ke gore mongwe le mongwe a botšiše bagwera le meloko yabo a re: ‘Na Morena o arabile bjang? Na Morena o rileng?’ ₃₆Ka gona ba name ba se sa bolela mantšu a go re: ‘morwalo wa Morena’, ka gobane ge motho a ka a bolela, mantšu ao a gagwe e tla ba morwalo go yena. Setšhaba se fapošitše mantšu a Modimo wa sona, Modimo yo a phelago, Morena Ramaatlaohle. ₃₇Wena Jeremia, botšiša baprofeta o re: ‘Morena o le arabile bjang? Morena o rileng?’ ₃₈Gomme ge ba ka se phethe taelo ya ka, ba no fela ba re ‘morwalo wa Morena’, gona o ba botše gore ₃₉ka nnete ke tla ba topa ka ba lahlela kgole le nna, bona gotee le motse wo ke o filego bona le borakgolokhukhu ba bona. ₄₀Ke tla dira gore ba lewe ke dihlong go ya go ile, kgobogo ya bona e se ke ya tsoga e lebetšwe.”

₁Morena a mpontšha dirotwana tše pedi tša mago di beilwe pele ga Tempele ya gagwe. E be e le ka morago ga ge Nebukadnesare, kgoši ya Babilonia, a seno thopa Joyakine, kgoši ya Juda, morwa wa Joyakime, kua Jerusalema a mo iša Babilone gotee le baetapele ba Juda, le bakgoni ba mediro ya diatla, le barulatshipi. ₂Se sengwe serotwana se be se swere mago a mabotsebotse, a nkego dithakangwaga; se sengwe se be se swere mago a go se tsebalege, a go se jege. ₃Morena a napa a re go nna: “Jeremia, o bonang?”

Nna ka mo fetola ka re: “Mago. A e lego a mabotse ke a mabotse kudu, gomme a go se tsebalege e tloga e le a a sa tsebalegego, le go jega a ka se jege.”

₄Ke moo Morena a rilego go nna: ₅“Nna, Morena Modimo wa Israele, ke bona mathopša a Juda ao ke a tlošitšego mo ka a iša nageng ya Babilonia a swana le mago a a mabotse, gomme ke tla ba yo botho go bona. ₆Ke tla dula ke ba hlokometše ka tla ka ba bušetša mo nageng ye. Ke tla ba phediša, ka se ba fediše; ke tla ba hloma, ka se ba tumole. ₇Ke tla ba lemoša gore ke nna Morena. Ke gona e tlago ba setšhaba sa ka, gomme nna ka ba Modimo wa bona, ka gobane ba tla be ba boetše go nna ka dipelo tša bona ka moka.

₈“Ge e le Kgoši Tsedekia wa Juda le bakgomana ba gagwe le mašaledi a Jerusalema ao a šetšego nageng ye goba a ilego Egepeta – nna, Morena, ke tla ba swara bjalo ka mago a go se tsebalege, a go se jege. ₉Ke tla ba tlišetša masetlapelo a mašoro mo e lego gore ditšhaba ka moka tša lefase di tla tšhoga. Batho ba tla ba kwera, ba ba phara dika, ba ba kodutla, gomme gohle mo ke ba šwalalanyetšago gona leina la bona ya ba motswiri. ₁₀Ke tla ba bolaya ka tšhoša le ka tlala le ka leuba la bolwetši go fihlela go se sa na le o tee wa bona mo nageng ye ke e filego bona le borakgolokhukhu ba bona.”

₁Ka ngwaga wa bone wa ge Joyakime, morwa wa Josia, e le kgoši ya Juda, Jeremia o ile a fiwa molaetša ke Morena mabapi le batho bohle ba Juda. E be e le ka ngwaga wa mathomo wa ge Nebukadnesare e le kgoši ya Babilonia. ₂A botša batho ka moka ba Juda le ba Jerusalema a re: ₃“Mengwageng ye masome a mabedi le metšo ye meraro go tloga ka ngwaga wa lesome le metšo ye meraro wa ge Josia, morwa wa Amone, e le kgoši ya Juda go fihlela le lehono le, Morena o be a bolela le nna, gomme nna ga se nke ke lese go le botša se a se boletšego. Eupša lena ga se la di ela hloko. ₄Le be le sa theeletše le bile le sa šetše, ešita le ge Morena a be a fela a le romela bahlanka ba gagwe, baprofeta. ₅Ba be ba le botša gore le tlogele tsela ya lena ye mpe le dilo tše mpe tše le di dirago, gore le tle le fele le dula mo nageng ye Morena a le fetšego yona sa ruri, lena le borakgolokhukhu ba lena. ₆Ba be ba le botša gore le se ke la ya go medimo e šele la e hlankela, la e khunamela, la seleka Morena ka dilo tše le di dirilego ka diatla, gore a se tlo le hlokofatša. ₇Eupša yena Morena o re ga se la mo theeletša, le mo selekile ka dilo tše le di dirilego ka diatla, mme la ikobela madimabe.

₈“Ka lebaka leo, Morena Ramaatlaohle o re: ‘Ka ge le se la ntheeletša ₉ke yo bitša ditšhaba tšohle kua leboa gotee le mohlanka wa ka, Nebukadnesare, kgoši ya Babilonia. Ke tla ba tliša mo gore ba lwe le badudi ba naga ye, ba be ba lwe le ditšhaba tše di bapilego nabo. Ke tlilo ba fediša taa, mme batho ba tla tšhoga ba gakgamala ge ba di bona. Dinaga tša bona di ka se sa dulwa ke batho. Ke realo, nna, Morena. ₁₀Ke tla fediša mekgolokwane ya bona ya lethabo le tlhalalo, le menyanya ya lenyalo, le go šilwa go ka se sa šilwa, le seedi sa lebone se ka se sa ba gona. ₁₁Naga ye e tla fetoga leganata gomme batho ba tla tšhoga ge ba e bona; ditšhaba tše di e dikologilego di tla hlankela kgoši ya Babilonia mengwaga ye masome a a šupago. ₁₂Ka morago ga moo ke tla otla kgoši ya Babilonia le setšhaba sa gona ka lebaka la sebe sa bona. Ke tla hlokiša naga yeo badudi go ya go ile. ₁₃Ke tla e dira tšohle tše ke boletšego gore ke tla e dira tšona, tšohle tše di ngwadilwego ka pukung ye, tše Jeremia a di porofetetšego ditšhaba tšohle. ₁₄Ke tla itefeletša ka Bababilonia ka lebaka la tše ba di dirilego, gomme ditšhaba tše dintši le magoši a maatla ba tla ba dira makgoba.’ ”

₁₅Morena Modimo wa Israele a re go nna: “Tšea senwelo se sa beine se tletšego kgalefo ya ka, o yo se noša ditšhaba tšohle tše ke go romago go tšona. ₁₆Ge ba se nwele ba tla thekesela, le gona ba tla ba bjalo ka digafi ka lebaka la manaba a ke a romago gore a lwe nabo.”

₁₇Ka gona ka tšea senwelo seo ka seatleng sa Morena, ka yo se noša ditšhaba tšohle tše Morena a bego a nthomile go tšona. ₁₈Jerusalema le metse ya naga ya Juda, gotee le magoši a yona le baetapele ka ba noša sona gore ba fedišwe, gore ba ba di bonago ba tšhoge, ba gakgamale, ba be ba rogake ka maina a metse yeo le magoši le baetapele ba gona – bjalo ka ge go sa le bjalo le lehono.

_19-26Ba bangwe ba ke ilego ka ba noša sona šeba:

Ba mebušo yohle ya lefase ka moka ba ile ba swanela go nwa senwelo seo. Mafelelong se tla nwewa ke kgoši ya Sheshake.

₂₇Ke ge Morena a re go nna: “Botša ditšhaba gore nna, Morena Ramaatlaohle, Modimo wa Israele, ke ba laela gore ba nwe, ba tagwe, ba be ba hlatše; ba tla wela fase mme ba palelwa ke go tsoga, ka lebaka la manaba a ke a romago gore a lwe nabo. ₂₈Gomme ge ba ka gana go tšea senwelo seo ka seatleng sa gago ba se nwa, gona o ba botše gore Morena Ramaatlaohle o re le tla ba la se nwa. ₂₉Motse wo e lego wa ka ke thoma go o tlišetša masetlapelo. Kgane bona ba gopola gore ba ka se otlwe? Ba tla otlwa, gobane ke tla roma manaba go yo lwa le bohle ba ba lego lefaseng. Ke realo, nna, Morena Ramaatlaohle.

₃₀“Batho ba o ba begele tšohle tše ke di boletšego, o re:

₃₂Morena Ramaatlaohle o re masetlapelo a tla wela ditšhaba ka go latelana ga tšona, gomme le ledimo le legolo le tsogile kua mafelelong a lefase. ₃₃Mohlang woo ditopo tša bao ba bolailwego ke Morena di tla gašagana go tloga khutlong ye nngwe ya lefase go yo fihla go ye nngwe. Ga go yo a tlago ba ilela, le gona ditopo tša bona di ka se kgoboketšwe goba tša bolokwa. E tla ba nke ke dišu nageng.

₃₄Gololang, lena baetapele, lena badiša ba setšhaba, le hlaboše lentšu! Ilelang mme le pshikologeng leroleng. Nako ya gore le šwalalanywe mme le kgabetlelwe e fihlile, gomme le tla kgabetlelwa bjalo ka dinku tša dikgapa tše dibotsebotse. ₃₅Badiša bao ba ka se hwetše botšhabelo; baetapele ba ba setšhaba ba ka se phonyokge. ₃₆Ekwang badiši bao ba a lla; baetapele bao ba setšhaba ba a golola ka gobane Morena o fediša setšhaba sa bona. ₃₇O lobiša naga ye e iketlilego a galefile. ₃₈O tlogetše setšhaba sa gagwe boka tau ye e tlogelago seroba sa yona, gobane naga ya bona e fetogile lešoka ka lebaka la masetlapelo a ntwa gotee le kgalefo ye šoro ya Morena.

_1-2E rile ge Joyakime, morwa wa Josia, a sa tšo bewa kgoši ya Juda, Morena a re go Jeremia: “Ema ka lapeng la Tempele ya ka o begele batho ba ba tlago go rapela ba etšwa metseng ya Juda tšohle tše ke go laetšego tšona gore o ba botše. O se ke wa tlogela selo. ₃Mohlomongwe setšhaba se ka go theeletša gomme sa tlogela mekgwa ya sona ye mebe. Ke mo ke tlago lesa masetlapelo a ke ikemišeditšego go ba otla ka ona ka lebaka la mediro ya bona ye mebe.”

₄Morena a mpotša gore ke botše setšhaba ke re: “Nna, Morena, ke rile le ntheeletše le phethe melao ye ke le beetšego yona, ₅le šetše tše di boletšwego ke bahlanka ba ka, baprofeta, bao ke bego ke fela ke ba roma go lena. Ga se la phetha tše ba le boditšego tšona. ₆Ge le ka no se di phethe, gona Tempele ye ke tla e dira se ke se dirilego Shilo, gomme ditšhaba tšohle tša lefase di tla kgatla motswiri ka leina la motse wo.”

₇Baprista le baprofeta le setšhaba ka moka ba ile ba kwa Jeremia ge a bolela ditaba tšeo ka Tempeleng ya Morena, ₈gomme ge a fetša go bolela tšohle tše Morena a bego a mo laetše go di botša setšhaba, baprista le baprofeta le setšhaba ka moka ba mo swara ba re: “O swanetše go bolawa! ₉Ke go reng ge o bolela ka leina la Morena o re Tempele ye e tla swana le Shilo, le gona motse wo e tla ba mašope, gwa se dule motho go wona?”

Ya ba setšhaba se mmokanela gona moo Tempeleng ya Morena.

₁₀E rile ge baetapele ba Juda ba ekwa se se diregilego, ba rotoga mošate ba ya Tempeleng gomme ba fihla ba dula Lesorong le Lefsa. ₁₁Baprista le baprofeta ba nama ba re go baetapele le go setšhaba ka moka: “Monna yo o lebanwe ke go ahlolelwa lehu, ka gobane o porofetetše motse wo tše mpe. Le mo kwele ka tša lena ditsebe.”

₁₂Ke mo Jeremia a rilego go baetapele ka moka le setšhaba ka moka: “Nna ke romilwe ke Morena gore ke porofete tšohle tše le kwelego ke di bolela ka Tempeleng ye le motseng wo. ₁₃Ka gona, sokologang mekgweng ya lena ye mebe le go tše mpe tše le di dirago, gomme le theeletše Morena Modimo wa lena. Ke mo a tlago lesa masetlapelo ao a le boditšego gore o tla le otla ka ona. ₁₄Ge e le nna, ke diatleng tša lena! Dirang ka nna se le bonago gore se lokile ebile se a swanela. ₁₅Fela le tsebe gore ge le ka mpolaya, lena le badudi ba motse wo le tla be le ikobela molato wa go bolaya monna yo a se nago molato, ka gobane gabotsebotse yo a nthomilego go le botša taba tše ka moka ke Morena.”

₁₆Ke mo baetapele le setšhaba ka moka ba boditšego baprista le baprofeta ba re: “Monna yo o boletše le rena ka leina la Morena Modimo wa rena; ga se a swanela go bolawa.”

₁₇Bagolo ba bangwe ba setšhaba ba ema, ba re go batho ka moka ba ba bego ba kgobokane: ₁₈“Mola Hiskia e le kgoši ya Juda, moprofeta Mika wa Moreshete o kile a botša setšhaba ka moka sa Juda gore Morena Ramaatlaohle o rile:

₁₉“Kgane Kgoši Hiskia le setšhaba ka moka sa Juda ba ile ba bolaya Mika? Na Hiskia ga se a boife Morena, a ithapeletša go yena, mme Morena a lesa masetlapelo ao a bego a ba boditše gore o tla ba otla ka ona? Bjale ge, rena re šetše re ikobela masetlapelo a a šiišago.”

₂₀Go be go na le yo mongwe monna ba re ke Uria, morwa wa Shemaya, wa go tšwa Kiriate-Jearime, yo a bego a porofetela motse wo le naga ye tše mpe ka leina la Morena tša go swana le tše di bego di porofetwa ke Jeremia. ₂₁Ge Kgoši Joyakime le madira a gagwe le bakgomana bohle ba ekwa tše Uria a di boletšego, kgoši a nyaka go bolaya Uria. Eupša Uria a re go kwa a tšhoga, gomme a tšhabela Egepeta. ₂₂Kgoši Joyakime a roma Elnathane, morwa wa Akboro, le banna ba bangwe Egepeta ba go mo felesetša. ₂₃Ba fihla ba swara Uria gona kua Egepeta, ba mo tliša go Kgoši Joyakime. Yena a laela gore a bolawe ka tšhoša, mme setopo sa gagwe se lahlelwe ka mabitleng a go bolokela bathofela.

₂₄Eupša Jeremia o ile a se gafelwe setšhaba gore se mmolaye, ka gobane Ahikamo, morwa wa Shafane, o be a ema le yena.

₁E rile ge Tsedekia, morwa wa Josia, a sa tšo bewa kgoši ya Juda, Morena a laela Jeremia ₂gore a itirele joko ya go ba le marala, gomme a e rwale molaleng. ₃A mo laela gore a romele molaetša go kgoši ya Edomo, le go ya Moaba, le go ya Amone, le go ya Tirose, le go ya Sidone ka batseta ba bona bao ba bego ba tlile Jerusalema go bona Tsedekia, kgoši ya Juda. ₄Morena Ramaatlaohle, Modimo wa Israele, a mmotša gore a ba laele gore ba tsebiše magoši a bona gore Morena o rile: ₅“Ka maatla a ka a magolo le bonatla ke hlodile lefase le batho le diphoofolo tšohle tše di phelago lefaseng, gomme maatla a ke a fa yo ke mo ratago. ₆Ke nna ke gafetšego dinaga tše ka moka diatleng tša mohlanka wa ka, Nebukadnesare, kgoši ya Babilonia, ke mo file le diphoofolo tša naga gore di mo šomele. ₇Ditšhaba tšohle di tla mo loba, tša loba le morwagwe le setlogolo sa gagwe go fihlela go etla nako ya gore setšhaba sa gagwe se otlwe. Ke gona setšhaba seo sa gagwe se tlago loba ditšhaba tše maatla le dikgoši tše dikgolo.

₈“Eupša ge go ka ba le setšhaba goba mmušo wo o ganago go loba Nebukadnesare, kgoši ya Babilonia, goba go ithweša joko ya gagwe, gona ke tla otla setšhaba seo ka ntwa le ka tlala le ka leuba la bolwetši, ka ba ka se feleletša ka seatla sa Nebukadnesare. ₉Le se ke la theeletša baprofeta ba gabolena, goba didupe tša gabolena, goba balori ba gabolena, goba dinoge tša gabolena, goba baloi ba gabolena, bona batho ba ba le botšago gore le ka se lobe kgoši ya Babilonia. ₁₀Ba le porofetela maaka gore le tle le thopelwe kgole le naga ya gabolena. Ke tla le raka, gomme la fedišwa. ₁₁Eupša setšhaba se se ka ithwešago joko ya kgoši ya Babilonia sa mo loba, ke tla se lesa sa no fela se dutše nageng ya sona, sa e lema gomme sa phela go yona. Ke realo, nna, Morena.”

₁₂Le Kgoši Tsedekia wa Juda ke ile ka mmotša bjalo, ka re: “Ithweše joko ya kgoši ya Babilonia. O lobe yena le setšhaba sa gagwe, gomme o tla phela. ₁₃Ke ka lebaka la eng ge wena le setšhaba sa gago le swanetše go bolawa ka tšhoša, goba ka tlala, goba ka leuba la bolwetši? Etse seo ke se Morena a rilego se tla hlagela setšhaba sefe le sefe se se sa lobego kgoši ya Babilonia. ₁₄Le se ke la theeletša baprofeta ba ba le botšago gore le ka se mo lobe, gobane ba le porofetela maaka. ₁₅Morena ka boyena o boletše gore ga se ba rongwa ke yena, le gore ba porofeta maaka ka leina la gagwe. Ka gona, yena o tla le šwalalanya, gomme le tla bolawa, lena le baprofeta ba ba le porofetelago.”

₁₆Ke moka ka botša baprista le setšhaba sohle gore Morena o re: “Le se ke la theeletša baprofeta ba ba rego thoto ya ka Tempeleng ya ka e tla tloga e bušwa Babilonia. Ba le porofetela maaka. ₁₇Le se ke la ba theeletša! Lobang kgoši ya Babilonia gomme le tla phela! Ke ka lebaka la eng ge motse wo o swanetše go ba mašope? ₁₈Ge eba ruri ke baprofeta, le gona ge eba ba na le molaetša wa ka, a ba nkgopele, nna, Morena Ramaatlaohle, gore thoto ye e šetšego ka Tempeleng ya ka le ka mošate, ga kgoši ya Juda, le ka motseng wa Jerusalema e se thopelwe Babilonia.

_19-20“Mola Kgoši Nebukadnesare a thopa kgoši ya Juda, Joyakine, morwa wa Joyakime, le bakgomana ka moka ba Juda le ba Jerusalema a ba iša Babilonia, o ile a šadiša dikokwane, le legopo le legolo, le dikoloyana, le thoto ye nngwenyana ye e bego e tlogetšwe ka motseng wo.

₂₁“Mabapi le thoto ye e šetšego ka Tempeleng ya ka le ka mošate, ga kgoši ya Juda, le ka motseng wa Jerusalema, nna, Morena Ramaatlaohle, Modimo wa Israele, ke re: ₂₂E tla thopelwa Babilonia, ya dula gona go fihlela ge ke e lata. Ke tla e bušetša ka motseng wo. Ke realo, nna, Morena.”

₁Ge o eja le mmuši o ele hloko tše di lego pele ga gago. ₂O itshware ge o itseba o na le bojelo. ₃O se dume dijo tše bose tše a go soletšego tšona; a ka no ba a go theile.

₄O be yo bohlale – o se itapišetše lehumo. ₅E ka re o sa ikweša lona la go tšwa ka diatleng, mo nkego le metše diphego, la fofela leratadimeng boka ntšhu.

₆O se je dijo tša ngame; o se dume dijo tše bose tše a go soletšego tšona, ₇gobane o dula a bala tshenyegelo ya gagwe go tšona; o bjalo. Le ge a re: “A re je! A re nwe!” ka pelong ga a realo. ₈O tla hlatša le nthathana ye o e llego, gomme mantšu a gago a tebogo a tla be a lobile.

₉O se bolele le setlaela taba tše thata, gobane se ka se di kwešiše.

₁₀O se šuthiše mollwane wa gago wa bogologolo, goba wa selela ka tšhemong ya tšhuana. ₁₁Gape Mošireletši wa bona ke yo maatla, gomme tabeng ye ya bona ba tla bolelelwa ke yena.

₁₂Tše o di rutwago o di ele hloko, o hlwaele yo a go rutago tsebo tsebe.

₁₃O se dikadike go kgala ngwana; thupa e ka se mmolaye, ₁₄e tla mo hlakodiša gore a se ye bodulabahu.

₁₅Ngwanaka, ge o ka ba yo bohlale nka thaba kudu. ₁₆Ke tla hlalala ge o bolela tše di lokilego.

₁₇O se ke wa duma badiradibe; wena o dule o boifa Morena. ₁₈Ge go ka ba bjalo, gona bokamoso bja gago bo tla kgahliša, le kholofelo ya gago e ka se be ya lefeela.

₁₉O theeletše, ngwanaka, o be yo bohlale, o sepele tseleng ye e lokilego. ₂₀O se tlwaelane le ditagwa goba dijagobe. ₂₁Ditagwa le dijagobe di tla diila; raboroko o tla apara maratha.

₂₂O theetše tatago yo a go tswetšego, le mmago ge a tšofetše o se mo nyatše. ₂₃O ikhweletše therešo le bohlale le thuto le kwešišo, mme o se ke wa di lahla. ₂₄Tatagongwana wa go loka o hlalala gagolo, motswadi wa ngwana yo bohlale o a mo thabela. ₂₅Le wena tatago le mmago a ba go thabele, mmago yo a go belegego a hlalale.

₂₆O ntheetše gabotse, ngwanaka, o kgahlwe ke mokgwa wo ke phelago ka wona. ₂₇Segwebakathobalo ke molete wa go iša, seotswa ke mokoti wo o pitlaganego. ₂₈Basadi bao ba lalela batho bjalo ka mohlakodi, ba febiša banna ba bantši.

₂₉Yo madimabe ke mang? Selewakeletswalo ke mang? Setagwa sa dintwa ke mang? Mmalabadi ke mang? Dintho tša maitirelo ke tša mang? Yo mahlomahubedu ke mang?

₃₀Ke ba go lala ba galampela mabjala, ba go hlwa ba ekwa tatso ya metswako ya madila. ₃₁O se gokwe ke bohwibidu bja beine ge e tsetsema ka senwelong, le ge e theogela gamonate. ₃₂Ka morago o ikwa nke o lomilwe ke noga ya mpholo, nke o tshwetšwe ke petla ka bohloko. ₃₃O bona dilo di šele tše di sego gona; monagano wa gago le polelo ya gago di a hlakahlakana. ₃₄O ikwa nke o ka gare ga lewatle, nke o patlame godimo ga dithapo tša leselawatle. ₃₅O re: “Ke swanetše go ba ke itiilwe ka se gobatšwe. Ke swanetše go ba ke papatlilwe ke sa kwe. Ke tla tsoga neng ka yo tšea se setee?”