To The Word – Day 192

₁Moya wa Morena wa nkuka wa nkiša lesorong la ka bohlabela la Tempele le le lebeletšego bohlabatšatši. Gona moo lesorong ka bona banna ba masome a mabedi le ba bahlano. Mo go bona go be go na le Jaasania, morwa wa Asure, le Pelatia, morwa wa Benaya, bona baetapele ba babedi ba setšhaba.

₂Morena a re go nna: “Wena motho wa nama, banna ba ba lakana ka tše mpe, le gona ba fora batho mo motseng. ₃Ba re: ‘Ga sešo ya ba nako ya go aga. Motse wo ke pitša, mme rena re nama.’ ₄Bjale ge, wena motho wa nama, ba porofete! Ba porofete!”

₅Ke ge ke tsenwa ke moya wa Morena, gomme Morena a ntaela gore ke botše setšhaba sa Israele ke re: “Morena o re: Ke tseba se le se bolelago le se le se naganago. ₆Le bolaile batho ba bantši mo motseng mo e lego gore mekgotheng ke ditopo fela.

₇“Ka gona, nna, Morena, Mong wa bohle, ke re: Motse wo ke pitša ka nnete, mme ditopo tša bao le ba rapaladitšego mo go wona ke yona nama. Ke tla le leleka mo motseng! ₈Le tšhaba tšhoša, mme nna, Morena, Mong wa bohle, ke re ke tla le romeletša banna ba le hlasela ka ditšhoša. ₉Ke tla le leleka mo motseng, ka le gafela diatleng tša bašele. Ke tla le otla ₁₀la bolawa ka tšhoša mellwaneng ya naga ya gabolena. Ke gona le tlago tseba gore Morena ke nna. ₁₁Motse wo e ka se be pitša, le lena le ka se be nama ye e lego ka pitšeng yeo. Ke tla le otla mellwaneng ya naga ya gabolena. ₁₂Ke gona le tlago tseba gore ke nna Morena yo le sego la phetha melao le ditaelo tša gagwe, eupša ditlwaedi tša ditšhaba tše di bapilego le lena tšona la di latela.”

₁₃Ya re ge ke sa porofeta, Pelatia, morwa wa Benaya, a hwa. Ka itahlela fase ka sefahlego, ka hlaba mokgoši ka re: “Jonna, Morena, Mong wa bohle! Na e ka ba o tlilo fediša mašaledi a Israele?”

₁₄Morena a bolela le nna a re: ₁₅“Wena motho wa nama, badudi ba Jerusalema ba bolela ka banabeno, le meloko yeno, le Baisraele ka moka ba re: ‘Ba tlogile ba ile kgole le Morena, gomme naga ye e filwe rena.’

₁₆“Bjale ge, botša mathopšakawena gore nna, Morena, Mong wa bohle, ke re: Ke nna ke ba rometšego kgole ditšhabeng, ka ba šwalalanya le dinaga tše dingwe. Le ge go le bjalo, ke ile ka ba bjalo ka lefelo le lekgethwa go bona dinageng tše ba ilego go tšona.

₁₇“Ka gona o ba botše gore nna, Morena, Mong wa bohle, ke re: Ke tla le kgoboketša ka le ntšha ditšhabeng le dinageng tše le šwalalanyeditšwego go tšona, ka le bušetša naga ya Israele. ₁₈Ge ba boa ba tla lahla medingwana le ditlwaedi tšohle tša go šišimiša mo nageng. ₁₉Ke tla ba fa dipelo tše difsa le menagano ye mefsa. Ke tla ba amoga dipelo tša bona tše thata, ka ba fa dipelo tše boleta. ₂₀Ke mo ba tlago phetha melao le ditaelo tša ka ka moka ka potego. E tla ba setšhaba sa ka, nna ka ba Modimo wa bona. ₂₁Eupša bao ba ratago go khunamela medingwana ya bona ba phetha le ditlwaedi tša bona tša go šišimiša, ke tla ba otlela tše ba di dirilego. Ke realo, nna, Morena, Mong wa bohle.”

₂₂Bakerubi bale ba thoma go fofa, gomme maotwana ale a kukega nabo. Letago la Modimo wa Israele la ba ka godimo ga bona. ₂₃Letago la Morena la tlogela motse la ya thabeng ye e lego ka bohlabela bja wona. ₂₄Moo ponong moya wa Modimo o ile wa nkuka wa mpušetša go mathopša kua Babilonia. Ke moka pono yeo ya timelela, ₂₅gomme ka botša mathopša tšohle tše Morena a bego a mpontšhitše tšona.

₁Morena a re go nna: ₂“Wena motho wa nama, o agile gare ga setšhaba sa dingangele. Ba na le mahlo, fela ga ba bone selo; ba na le ditsebe, fela ga ba kwe selo, ka gobane ke dingangele.

₃“Bjale ge, wena motho wa nama, phutha tše o di nyakago o etše lethopša, o ye bothopša e le mosegare ba go lebeletše. O tloge ga geno bjalo ka lethopša o ye felo mo gongwe ba go lebeletše. Mohlomongwe ba tla lemoga gore ke bona setšhaba sa dingangele. ₄A e re e le mosegare ba go lebeletše o ntšhe tše o di phutheletšego go ya bothopša. E re e le mantšiboa o tšwele ka ntle ba go lebeletše, o etše bao ba yago bothopša. ₅E re ba sa go lebeletše o phule lešoba lebotong la ntlo ya gago, o tšwe ka lona. ₆E re ba go lebeletše o athe morwalo wa gago, mme o tšwele ntle leswiswing o ikhurumeditše mahlo gore o se bone mo o yago gona. Se o se dirago e tla be e le seka sa go lemoša setšhaba sa Israele.”

₇Ke ile ka dira tše Morena a mpoditšego gore ke di dire. E rile e le mosegare ka ntšha morwalo wa ka wa ge ke eya bothopša. Mantšiboa ka phula lešoba lebotong ka diatla. Ka swahlane ka tšwela ka ntle, ka atha morwalo wa ka ba ntebeletše.

₈Mosong wa le le latelago Morena a re go nna: ₉“Wena motho wa nama, kgane setšhaba seo sa Israele sa dingangele ga se se go botšiše gore o dirang? ₁₀O ba botše gore nna, Morena, Mong wa bohle, ke re: Molaetša wo ke wa go ama kgoši ye e lego kua Jerusalema le Baisraele bohle ba ba dulago gona. ₁₁O ba botše gore tše o di dirilego ke sešupo sa se ba tlago se dirwa – ba tla išwa bothopša. ₁₂Kgoši ye e ba bušago e tla atha morwalo wa yona leswiswing mme ya tšwa ka lešoba le ba e phuletšego lona lebotong. O tla ikhurumetša mahlo, a se bone mo a yago gona. ₁₃Eupša nna ke tla mo thea ka lelokwa la ka ka mo tanya ka lona, ke moka ka mo iša motseng wa Babilone, nageng ya Babilonia, moo a tlago hwela gona a se a go bona. ₁₄Bohle ba ba mo felesetšago le ba ba mo letago le madira a gagwe ka moka ke tla ba šwalalanyetša gohle lefaseng, gomme ke tla ba romela babolai gore ba ba bolaye ka tšhoša.

₁₅“Ge ke ba šwalalanya le ditšhaba, ke ba phatlalatša le dinaga, ke gona ba tlago lemoga gore ke nna Morena. ₁₆Ke tla dira gore tšhoša le tlala le leuba la bolwetši di phonyokgwe ke ba ba sego bakae gare ga bona, ba anegele ditšhaba tše ba ilego go tšona dilo tšohle tše di šišimišago tše ba di dirilego. Gomme le tšona di tla lemoga gore Morena ke nna.”

₁₇Morena a ntaela a re: ₁₈“Wena motho wa nama, o thothomele ge o eja, ge o enwa le gona o roromele ka letšhogo. ₁₉O botše batho ba naga ye gore nna, Morena, Mong wa bohle, ke bolela ka badudi ba Jerusalema, nageng ya Israele, ke re ba tla thothomela ge ba eja, le ge ba enwa ba tla tšhoga, ka gobane naga ya bona e tla be e hutšwe tšohle ka lebaka la kgaphamadi ya batho bohle ba ba dulago moo. ₂₀Metse ye bjale e dulwago e tla fedišwa, gomme naga ya fetoga lešoka; ke mo le tlago lemoga gore Morena ke nna.”

₂₁Morena a re go nna: ₂₂“Wena motho wa nama, ke ka lebaka la eng setšhaba sa Israele se touta seema se sa go re: ‘Nako e a feta, mme dipono e ba difefe’? ₂₃Bjale ba botše gore nna, Morena, Mong wa bohle, ke re ke tla fediša seema seo; se ka se sa toutwa gape mo Israele. O ba botše o re: Nako e batametše ya gore pono ye nngwe le ye nngwe e tšwelele.

₂₄“Setšhabeng sa Israele go ka se sa ba le dipono tša maaka, le go laola ga bofora, ₂₅gobane go tla be go bolela nna, Morena, gomme se ke se bolelago se tla phethega ntle le tikatiko. Se ke tlago se bolela se tla phethega mehleng yeno ya lena, setšhaba sa dingangele. Ke realo, nna, Morena, Mong wa bohle.”

₂₆Morena a re go nna: ₂₇“Wena motho wa nama, setšhaba sa Israele se re: ‘Pono ye motho yo a e bonego e sa tlilo tšea nako ye telele pele e phethega; o porofeta tša nako ye e sa lego kgole.’ ₂₈Ka gona o ba botše gore nna, Morena, Mong wa bohle, ke re: Ga go le se tee sa tše ke di boletšego se se sa tlilogo diega. Tše ke di bolelago di tla phethega. Ke realo, nna, Morena, Mong wa bohle.”

₁Morena a ntaela a re: ₂“Wena motho wa nama, kgala baprofeta ba Israele ba ba iporofetelago tša bona. E re go bona: ‘Theeletšang lentšu la Morena.’ ”

₃Morena, Mong wa bohle, o re: “Go madimabe baprofeta ba ba ditlaela ba go iporofetela tša bona, mme ba dira tše nkego ba bona dipono. ₄Lena setšhaba sa Israele, baprofeta ba lena ba etša diphukubje tše di tsomago dijo mašopeng. ₅Ga se ba namela morako go thiba mo go kgeregilego; ke ka lebaka leo setšhaba sa Israele se ka se kgonego go šireletšwa ntweng ka Letšatši la Kahlolo la Morena. ₆Dipono tša bona ke tša bofora, le bodupe bja bona ke maaka. Ba re ba bega molaetša wa ka, etšwe ba se ba rongwa ke nna. Le ge go le bjalo ba lebeletše gore tše ba di bolelago di tla phethega! ₇Ke ba botšiša ke re: Kgane dipono tšeo le di bonago ga se tša bofora, le bodupe bja lena ga se maaka, ge le re ke tše di boletšwego ke nna, etšwe nna ke se ka bolela le lena?”

₈Ka gona Morena, Mong wa bohle, o re go bona: “Ka ge dipolelo tša lena e le tša bofora, le dipono tša lena e le tša maaka, ke lwa le lena. ₉Ke tlilo otla lena baprofeta ba le bonago dipono tša bofora le gona le radiago batho ka bodupe bja maaka. Le ka se dumelelwe go tla pitšong ya setšhaba sa ka; maina a lena a ka se ngwalwe le a badudi ba Israele; le ka se sa tsoga le boetše nageng ya Israele. Ke gona le tlago lemoga gore Morena, Mong wa bohle, ke nna.

₁₀“Tšeo di tla le hlagela ka ge baprofeta ba timetša setšhaba sa ka ka go se botša gore tšohle di lokile, etšwe go se go loke selo. Go bjalo ka ge nke setšhaba sa ka se re go aga leboto baprofeta ba ba tla ba le dila ka motaga wo o kgobogago. ₁₁O botše baprofeta bao gore leboto leo la bona le tlilo wa. Go tla na pula ya matlorotloro, gwa na le sefako, le ledimo la tšubutla. ₁₂Leboto leo le tla kgerega, gomme a ke re batho ba tla le botšiša gore mohola wa motaga e bile eng?”

₁₃Bjale Morena, Mong wa bohle, o re: “Ke tla tšubutliša ledimo ke galefile, ka neša pula ya matlorotloro le sefako ke befetšwe, gore di kgereše leboto leo. ₁₄Ke tla thuba leboto leo ba le ditšego ka motaga ka le kgereša, motheo wa lona wa šala kgakala. Le tla le wela la le bolaya bohle. Ke mo le tlago lemoga gore Morena ke nna.

₁₅“Ke tla itefeletša ka leboto leo le ka bao ba le ditšego ka motaga. Ya ba gona ke le botšago gore leboto lela ga le sa le gona mmogo le bale ba le ditšego, ₁₆e lego baprofeta bale ba Israele ba ilego ba porofetela Jerusalema, ba bona dipono tša gore tšohle di tla e lokela, etšwe go ka se loke selo.” O realo, Morena, Mong wa bohle.

₁₇Morena a re: “Bjale, wena motho wa nama, lebelela basadi ba ba iporofetelago tša bona gare ga setšhaba sa geno. Ba kgale, ₁₈gomme o ba botše se Morena, Mong wa bohle, a se bolelago a re:

“ ‘Le madimabe, basadi tenang, le rokelelago maseka a boloi matsogong a bohle, le ba rokelago le dikuane tša boloi go ya ka bogolo bja dihlogo tša bona, gore le ba tanye. Kgane le nyaka go tanya setšhaba sa ka mola lena le ipabalela? ₁₉Le ntlhompholla pele ga setšhaba sa ka le gabile go hwetša magoswi a se makae a garase le marathana a se makae a senkgwa. Le bolaya batho ba ba sego ba swanela go bolawa, la lesa ba ba sego ba swanela go phela. Seo le se dira ka go fora setšhaba sa ka se se ratago go theeletša maaka.’ ”

₂₀Morena, Mong wa bohle, o re: “Ke hloile maseka ao le tanyago batho ka ona mo nkego ke dinonyana. Ke tla a kgaola mo matsogong a lena, ka tanyolla batho bao le bego le ba tantše bjalo ka dinonyana. ₂₁Ke tla phamola dikuane tšeo le di roketšego setšhaba sa ka, ka se hlakodiša go lena gore le se sa se kgona. Ke gona le tlago lemoga gore ke nna Morena.

₂₂“Ka maaka a lena le fetša baloki maatla, bao nna ke sa ratego go ba nyamiša. Le kgothaleditše bakgopo go phegelela go dira tše kgopo, mme ba se sa iphološa. ₂₃Bjale ge, dipono tšela tša lena tša bofora le ka se sa di bona, le go laola le ka se sa laola, ka gobane ke tla hlakodiša setšhaba sa ka go lena. Ke gona le tlago lemoga gore Morena ke nna.”

₁Bagolo ba bangwe ba Baisraele ba ile ba tla go nna ba fihla ba dula pele ga ka. ₂Ke moka Morena a re go nna: ₃“Wena motho wa nama, banna bao ba ikgafetše medingwana, ba dula ba nagana ka yona, gomme e ba diriša sebe. Bjale na nka napa ka dumela go ba eletša?

₄“Ba botše seo nna, Morena, Mong wa bohle, ke se bolelago ke re: Moisraele yo mongwe le yo mongwe yo a ikgafetšego medingwana, a dula a nagana ka yona gomme e mo diriša sebe, gomme ka morago a tle a kgopele maele go moprofeta, o tla arabja ke nna – a arabja ka karabo ye e lebanego medingwana ya gagwe ye mentši. ₅Medingwana ya setšhaba sa Israele e dirile gore setšhaba se mphuralele, eupša ge ke ba arabile ke holofela gore ba tla boa ba mpotegela.

₆“Bjale ge, botša setšhaba sa Israele se nna, Morena, Mong wa bohle, ke se bolelago ke re: Sokologang, le tlogele medingwana yeo ya lena, le furalele le tšohle tša go šišimiša tše le di dirago.

₇“Ge yo mongwe wa setšhaba sa Israele goba mofaladi yo a dulago nageng ya Israele a ka ikaroganya le nna a ikgafela medingwana, a dula a nagana ka yona, ya mo diriša sebe, gomme ka morago a ya go moprofeta go kgopela maele go Morena ka yena, o tla fetolwa ke nna, Morena, ka bonna. ₈Ke tla mo lwantšha, ka mo rutela ba bantši, ka mo phara seka. Ke tla mo kgaola setšhabeng sa ka, gore le tle le lemoge gore Morena ke nna.

₉“Ge moprofeta yo a ka forwa mme a fetola ka mokgwa wo o fošagetšego, e tla be e le ka gobane a forilwe ke nna, Morena. Ke tla mo fediša setšhabeng sa ka sa Israele. ₁₀Moprofeta mmogo le yoo a ka kgopelago maele go yena ba tla otlwa, ba otlwa ka kotlo e tee. ₁₁Seo ke tla be ke se direla gore setšhaba sa Israele se se sa aroga go nna, goba sa itšhilafatša ka dibe tša sona. Ke mo bona e tlago ba setšhaba sa ka, mme nna ka ba Modimo wa bona.” O realo, Morena, Mong wa bohle.

₁₂Morena a re go nna: ₁₃“Wena motho wa nama, ge badudi ba naga ye ba ka mphošetša ka go se mpotegele, ke tla ba otla ka go fediša dijo tša yona, ka bolaiša badudi ba yona tlala, ka gagara batho le diphoofolo tša yona. ₁₄Le ge banna bale ba bararo, Noa, Daniele le Jobo ba ka be ba dula moo, go loka ga bona go be go tla phološa bona beng fela.” O realo, Morena, Mong wa bohle.

₁₅“Le ge nka romela dibata tša gerema le naga tša bolaya batho, mme naga ya fetoga lešoka gwa se be le motho yo a fetago mo go yona ka lebaka la tšona, ₁₆gomme le ge banna bao ba bararo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go be go tla iphološa fela bona beng, mme naga yona ya fetoga lešoka.

₁₇“Le ge nka no tsoša ntwa nageng yeo, mme ka re badudi bohle ba naga ye ba bolawe ka tšhoša, ka gagara batho le diphoofolo tša gona, ₁₈le ge banna bao ba bararo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go be go tla iphološa fela bona beng.

₁₉“Ge nka romela leuba la bolwetši nageng yeo, ka bolaya batho ba bantši ke galefile, ka gagara batho le diphoofolo, ₂₀le ge Noa, Daniele le Jobo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go loka ga bona go be go tla phološa fela bona beng.”

₂₁Morena, Mong wa bohle, o re: “Le ge Jerusalema nka e romela dikotlo tša ka tše nne tše di šiišago, e lego ntwa, tlala, dibata, le leuba la bolwetši gore di gagare batho le diphoofolo, ₂₂mašaledi a tla no ba gona, e lego masogana le makgarebe, ba ba tlago ntšhwa mo motseng. Ba tla tla go lena, gomme e tla re ge le bona maitshwaro le mediro ya bona, la kgothatšega mabapi le masetlapelo ohle a ke a tlišeditšego Jerusalema. ₂₃Le tla kgothatšega ge le bona maitshwaro le mediro ya bona, gobane le tla be le tseba gore tše ke e dirilego tšona ke di dirile ka lebaka.” O realo, Morena, Mong wa bohle.

₁Morena a re go nna: ₂“Wena motho wa nama, na kota ya morara e phala ya mehlare ya sethokgwa ka eng? Ke ra lekala la morara ge le bapetšwa le la mehlare ye mengwe ya sethokgwa. ₃Na go na le se se ka dirwago ka yona? Ešita le lona lemapolo le la lešidi la go fega dilo, na le ka dirwa? ₄Gape sa kota ye ke go ba legong la mollo. Gomme ge e swele dintlha, le bogareng bja yona e fišitšwe, na go na le se se ka dirwago ka yona? ₅Etse le ge e sešo ya swa ga e na mohola. Bjale ge e šetše e llwe ke mollo mme e swele, gona e ka hlwa e sa holang!”

₆Bjale ge, Morena, Mong wa bohle, o re: “Bjalo ka ge mo gare ga mehlare ya sethokgwa morara ke o dirile gore kota ya wona e lokele fela go ba legong la mollo, badudi ba Jerusalema le bona ke tla ba dira bjalo. ₇Ke tla ba otla. Ba phonyokgile mollo wa mathomo, eupša wa bobedi o sa tlilo ba tšhuma. Mohla ke ba otla le tla lemoga gore ke nna Morena. ₈Ba be ba sa mpotegele, ka gona naga ya bona ke tla e fetoša lešoka.” O realo, Morena, Mong wa bohle.