To The Word – Day 195

₁Ka letšatši la pele la kgwedi ya ngwaga wa lesome le motšo o tee wa ge re le mathopša, Morena a re go nna: ₂“Wena motho wa nama, batho ba Tirose ba thabetše go wa ga motse wa Jerusalema ba re: ‘O swinegile! Motse wo go thwego ke Lesoro la Ditšhaba o thubilwe! Gomme rena re tla o ema legato. Ka ge bjale o fetošitšwe marope, go tla atlega rena.’

₃“Bjale ge, nna, Morena, Mong wa bohle, ke re: Theeletša! Ke a go lwantšha, wena Tirose. Ke tla tliša ditšhaba tše dintši tša go hlasela bjalo ka lewatle ge le hlatša maphoto a lona. ₄Ba tla kgereša merako ya gago, ba phušola le dibo tša gago. Ke moka ke tla gogola thogorogo ya gago ka šadiša fela letlapa. ₅Barei ba dihlapi ba tla anega malokwa a bona godimo ga lona, gona moo le metšego gona ka lewatleng, ka ge go boletše nna, Morena, Mong wa bohle. Ditšhaba di tla hlakola Tirose, ₆gomme ka ditšhoša tša bona ba bolaya bao ba dulago metseng ya yona ya kua nagengkgolo. Ke mo badudi ba Tirose ba tlago lemoga gore Morena ke nna.”

₇Morena, Mong wa bohle, o re: “Ke tlilo tliša kgoši ya dikgoši, Kgoši Nebukadnesare wa Babilonia, gore a hlasele Tirose. O tla tla a etšwa leboa ka madira a mantši, le dipere le dikoloi tša ntwa le banamedi ba dipere. ₈Bao ba agilego metseng ya nagengkgolo ba tla bolawa ka tšhoša. Manaba a tla aga dithala tša go go hlola, a kgobela mokgobo wa mobu go go dikanetša, a go dikanetša a swere dikotse. ₉Ba tla kgereša merako ya gago ka dithubamorako, ba phušola le dibo tša gago ka ditshipi. ₁₀Dipere tša Kgoši Nebukadnesare e tla be e le tše dintši mo di tlago go khupetša ka marole a di a tupišago. Lešata la banamedi ba dipere, le la maotwana, le la dikoloi tša ntwa le tla šikinya merako ya gago ge Nebukadnesare a tsena ka dikgoro tša gago, bjalo ka banna ba ba tsenago motseng wo o kgerešeditšwego merako. ₁₁Dipere tša gagwe di tla kiba mebileng ka ditlhako. Bahlabani ba gagwe ba tla bolaya badudi ba gago ka tšhoša. Dikokwane tša gago tše dikgolo di tla wišwa. ₁₂Manaba a gago a tla go hula lehumo a go thopela le thoto ya kgwebo ya gago. Ba tla kgereša merako ya gago, ba thuba le dintlo tša gago tša mathedithedi. Ba tla lahlela maswika a gago le dikota le thogorogo ka lewatleng. ₁₃Ke tla kgaotša dikoša tša gago, ka homotša le modumo wa harepa tša gago. ₁₄Ke tla šadiša fela letlapa leo bareadihlapi ba tlago anega malokwa a bona go lona. Motse woo o ka se tsoge o tsošološitšwe, ka ge go boletše nna, Morena, Mong wa bohle.”

₁₅Morena, Mong wa bohle, o re go Tirose: “Mohla o fenywa, batho ba ba dulago lebopong la lewatle ba tla thothomela ka letšhogo ge ba ekwa metsetlo ya ba ba gobaditšwego, ge badudi ba gago ba gagarwa. ₁₆Magoši ohle a ditšhaba tše di agilego lewatleng a tla theoga ditulong tša ona tša bogoši. Ba tla apola diaparo tša bogoši le diaparo tša bona tša mebalabala, ba dula fase ba thothomela. Ba tla tšhoga mo ba tlago ba ba thothomela motšhaotšhele. ₁₇Ba tla opela sefela sa go llela Tirose ba re:

₁₉Morena, Mong wa bohle, o re: “Ke tla go fetoša marope, wa etša motse wo o ngadilwego. Ke tla go ribegetša ka lefula la phamphamadiba. ₂₀Ke tla go theošetša kua fase gotee le bao ba theogelago bodulabahu, wa yo dula le bale ba phetšego mehleng ya kgale. Ka go dudiša lefaseng la ka tlase, mašopeng a go ya go ile, gotee le ba ba theogetšego bodulabahu. Ge go le bjalo o ka se sa dulwa ke motho wa ba lefaseng la ba ba phelago. ₂₁O tla ba motse wo o tšhošago batho, ya napa ya ba bofelo bja gago. Le ge batho ba ka go nyaka, ba ka se tsoge ba go bone.” O realo, Morena, Mong wa bohle.

₁Morena a re go nna: ₂“Wena motho wa nama, opela sefela sa go llela Tirose, ₃motse wo o agilwego lebopong la lewatle mme o gwebago le ditšhaba tše dintši tše di agilego mabopong a lewatle. O o botše gore Morena, Mong wa bohle, o re:

₁₀“Bahlabani ba go tšwa Persia le Lidia le Libia ba be ba go hlabanela, bohle e le bagale. Ba be ba fega dikotse le dikuane tša bona ka mešašeng ya gago. Ke bona banna ba ba go tlišeditšego setumo. ₁₁Bahlabani ba go tšwa Arbade le Geleke e be e le bona baleti ba merako ya gago ka gohle, gomme banna ba go tšwa Gamade bona ba leta dibo tša gago. Ba be ba fega dikotse tša bona go dikologa merako ya gago. Ke bona ba go tlaleletša bothakga bja gago.

₁₂“Badudi ba Tarshishe ba be ba gweba le wena ba bona lehumo la gago le lentši. Ba be ba reka phahlo ya gago ka silibera le ka tshipi le ka thini le ka morodi. ₁₃Badudi ba Gerike le ba Tubale le ba Mesheke ba be ba gweba le wena; ba reka diphahlo tša gago ka makgoba le ka dibjana tša mphiri. ₁₄O be o rekiša phahlo tša gago ka dipere tša go goga, le ka tša ntwa, le ka dimeila tša Bethe-Togarma. ₁₅Batho ba Rodose ba be ba rekelana le wena; batho ba dinageng tša lebopo la lewatle tše dintši le bona ba be ba rekelana le wena, mme ba go lefa ka manaka a ditlou, le dikota tša mohlare wa eponi. ₁₆Baedomo ba be ba rekišetšana le wena ka ge o be o na le diphahlo tše dintši. Ba be ba di lefa ka magakabje a mahwibidu, le ka mašela a bohwibidu bja moretele le a mebalabala, le a boletiana, le ka magakabje a mmala wo moso, le a bohwibidu bja mohuta wo mongwe. ₁₇Batho ba Juda le ba naga ya Israele ba be ba rekišetšana le wena. Ba reka diphahlo tša gago ka mabele a go tšwa Minite, le ka leotša, le ka todi, le ka makhura a mohlware, le ka dihlare. ₁₈Batho ba Damaskose ba be ba rekišetšana le wena ka ge o be o na le diphahlo tše dintši tša mehutahuta. Ba be ba di lefela ka beine ya go tšwa Helbone le ka boya bja dinku bja go tšwa Tsahare. ₁₉Batho ba Dedane le ba Jabane ba be ba rekišetšana le wena. Ba reka diphahlo tša gago ka tshipi ye e tološitšwego ya go tšwa Usale, le ka dinoko. ₂₀Batho ba Dedane ba be ba reka diphahlo tša gago ka mašela a go saletša. ₂₁Baarabia le mantona ohle a naga ya Kedara ba be ba gweba le wena ka dikwana le dikgapa le dipudi. ₂₂Babapatši ba Sheba le ba Rama ba be ba reka diphahlo tša gago ka dinoko tše dibosebose tša mehutahuta, le ka magakabje a mehutahuta, le ka gauta. ₂₃Ba motse wa Harane, le wa Kane, le wa Edene, le babapatši ba Sheba, le ba motse wa Ashure le wa Kilmade – ka moka ba be ba rekelana nago. ₂₄Ba be ba go rekišetša diaparo tša botšhepi, le dipurapura tša mmala wa bohwibidu bja moretele le tša mebalabala, le magogwa a mebalabala, le dithapo tše di logilwego gabotse. ₂₅Diphahlo tša gago di be di rwalwa ka maselawatle a magolo.

₃₅“Bohle ba ba agilego lebopong la lewatle ba tšhošitšwe ke tše di go hlagetšego. Le magoši a bona a tšhogile, gomme mahlong a bona go bonala poifo fela. ₃₆Babapatši ba go tšwa ditšhabeng ba go kgotsa ka molodi, batho ba a tšhoga ge ba go bona. Ke gona ge o ile.”

₁Morena a re go nna: ₂“Wena motho wa nama, botša mmuši wa Tirose gore nna, Morena, Mong wa bohle, ke re go yena: Ka boikgantšho bja gago o itshema modimo. O re o dutše setulong sa bogoši go etša modimo, o dikaneditšwe ke mawatle. Le ge o ka itshema modimo, o motho wa nama, ga o modimo. ₃O bona nke o phala Daniele ka bohlale, le gona ga go sephiri se o ka se fihlelwago. ₄O ikhumišitše ka bohlale bja gago le tlhaologanyo, wa ikgobelela gauta le silibera ka polokelong ya gago. ₅Ka ge o hlalefetše kgwebo kudu o ikokeleditše lehumo, mme lona le go hloletše boikgantšho.

₆“Bjale ge, nna, Morena, Mong wa bohle, ke re: Ka gobane o itshema modimo, ₇ke tlilo go tlišetša batho ba šele ba go hlasela, setšhaba se sehlogo go feta tše dingwe ka moka. Ba tla go lobiša tšohle tše dibotse tše o ikhweleditšego tšona ka bohlale bja gago, ba go senyetša le bothakga bja gago. ₈Ba tla go bolaya gasehlogo ka garegare ga lewatle, wa theogela bodulabahu. ₉Na mohla o lebana le babolai ba gago o tla no itshema modimo? Ge o le ka diatleng tša babolai ba gago o tla no be o le motho wa nama, e sego modimo. ₁₀O tla hwa bjalo ka mpša diatleng tša bašele, gobane go boletše nna, Morena, Mong wa bohle.”

₁₁Morena a re go nna: ₁₂“Wena motho wa nama, opela sefela sa go llela kgoši ya Tirose. O mmotše gore Morena, Mong wa bohle, o re: O kile wa ba seka sa bothakga, o le yo bohlale ebile o le yo botse kudu! ₁₃O be o dula Edene, serapeng sa Modimo, o apara magakabje a mehutahuta: dirubi le ditopase le ditaamane le diberile le dikarneliene le dijaspere le disafire le diemerale le digarneta. Mangina le dikgabišo tša diaparo tša gago e be e le tša gauta. Di be di diretšwe wena ka tšatši lela o belegwa. ₁₄Ke ile ka bea mokerubi yo a phuroletšego diphego moo gore a go lete. O be o dula thabeng ya ka ye kgethwa, gomme o sepela gare ga magakabje a a phadimago. ₁₅Boitshwaro bja gago e bile bjo bo se nago bosodi go tloga mohla wola o belegwa go fihlela ge o thoma go dira tše kgopo. ₁₆Kgwebo ya gago ye kgolo e ile ya go hlolela swele, gomme wa dira dibe. Ka gona nna ka go raka thabeng ya ka ye kgethwa, ka ge o be o le motho yo a tšhilafetšego, gomme mokerubi yo a bego a go leta a go raka magakabjeng ale a go phadima. ₁₇O be o ikgogomoša ka botse bja gago, gomme setumo sa gago se go diriša tša bošilo. Ka lebaka leo ke go kgoromeleditše fase, ka go dira segoboga pele ga magoši a mangwe. ₁₈O dirile dibe tše dintši, wa ba wa hlalefetša batho kudu mo kgwebong ya gago, mme wa tšhilafatša mafelo a gago a thapelo. Ka gona nna ka hlola mollo ka motseng wa gago, mme wona wa fiša motse lorelore. Bohle ba ba lebelelago motse woo ba bona ka mo ke o fetošitšego molora. ₁₉Ditšhaba tšohle tše di ilego tša go tseba di a go kgotsa, o tšhoša batho ba ba go bonago. Ke gona ge o ile.”

₂₀Morena a re go nna: ₂₁“Wena motho wa nama, kgala motse wa Sidone, o o porofete. ₂₂Botša batho ba gona gore nna, Morena, Mong wa bohle, ke re: Ke lwa le wena, Sidone; batho ba tla ntheta ba le ka gare ga gago. Ba tla lemoga gore ke nna Morena mola ke otla badudi ba gago, le mola ke ba bontšha gore ke nna yo mokgethwa. ₂₃Ke tla go romeletša leuba la bolwetši. O tla hlaselwa ka mathoko ohle, gomme badudi ba gago ba bolawa, ka ediša madi mekgotheng ya gago. Ke gona o tlago lemoga gore Morena ke nna.”

₂₄Morena o re: “Ga go le setšhaba se tee sa tše di bapetšego le Israele se se bego se e nyefola se se tla hlwago se sa e hlaba go etša meetlwa le ditshehlo; gomme ba tla lemoga gore Morena, Mong wa bohle, ke nna.”

₂₅Morena, Mong wa bohle, o re: “Ke tla buša setšhaba sa Israele ditšhabeng tšela ke bego ke se šwalalanyeditše go tšona, gomme ke tla ba bontšha gore ke nna yo mokgethwa ditšhaba di ntebeletše. Ke mo ba tlago dula nageng ya bona ye ke e filego mohlanka wa ka, Jakobo. ₂₆Ba tla dula gona ba bolokegile. Ba tla ikagela dintlo, ba ipšalela merara. Ke tla otla baagišani bohle ba bona bao ba bego ba ba kwera, gomme Baisraele ba tla bolokega. Ke mo ba tlago lemoga gore ke nna Morena, Modimo wa bona.”

₁Ka letšatši la lesome le metšo ye mebedi la kgwedi ya lesome ya ngwaga wa lesome wa ge re le mathopša Morena a re go nna: ₂“Wena motho wa nama, kgala kgoši ya Egepeta. O mo porofete, yena le naga ya Egepeta ka moka. ₃O mmotše gore nna, Morena, Mong wa bohle, ke re: Ke lwa le wena, kgoši ya Egepeta, kwenakgolo towe, o patlamago ka nokeng ya Naele, o ipotšago o re: ‘Noka ya Naele ke ya ka, ke itlholetše yona.’ ₄Ke tla go tsenya kgwega ka mohlagareng ka ba ka dira gore dihlapi tše di lego ka nokeng ya gago di go kgomarele legapi. Ke moka ka go goga ka go ntšha ka nokeng ya Naele o kgomaretšwe legapi ke dihlapi ka moka. ₅Ke tla go lahlela lešokeng gotee le tšona dihlapi tšeo. O tla rapalala moo ntle wa se phuthwe wa bolokwa. Setopo sa gago ke tla se fa dibata le manong gore di se je. ₆Ke mo badudi bohle ba Egepeta ba tlago lemoga gore Morena ke nna.

“Lena Baegepeta, le be le swana le lehlotlo la lehlaka mo go setšhaba sa Israele. ₇E be e re ge ba ithekga ka lena, le pharoge, le ba hlabe ka mahwafeng; ge ba ikokotlela ka lena, le robege mme ba thinyege mekokotlo. ₈Bjale ge, nna, Morena, Mong wa bohle, ke re ke tla le romela manaba a le hlasela ka ditšhoša, a le gagara le diruiwa tša lena. ₉Naga ya Egepeta e tla fetoga leganata. Ke mo le tlago lemoga gore Morena ke nna.

“Ka ge o rile noka ya Naele ke ya gago, e dirilwe ke wena, ₁₀ke lwa le wena, le yona Naele yeo ya gago. Egepeta yohle ke tla e fetoša leganata go tloga motseng wa Migdolo go yo fihla go wa Asoane, le go ba go yo fihla mollwaneng wa Etopia. ₁₁Ga go motho goba phoofolo ye e tlago putla fao. Go tla fela mengwaga ye masome a mane go sa phele selo moo. ₁₂Naga ya Egepeta ke tla e dira naga ye e ngadilwego go feta dinaga ka moka. Metse ya Egepeta e tla dula e le marope mengwaga ye masome a mane, maroperope a go feta a metse ka moka. Baegepeta ke tla ba šwalalanya le ditšhaba le dinaga.”

₁₃Morena, Mong wa bohle, o re: “Ge go fetile mengwaga ye masome a mane ke tla kgoboketša Baegepeta ditšhabeng tše ke bego ke ba šwalalanyeditše go tšona. ₁₄Ke tla ba buša bothopša ka ba bušetša nageng ya Patrose, ya setlogo sa bona. Moo e tla ba ba mmušo wa go nyatšega, ₁₅mmušo wa go fokola go feta mebušo ka moka, gomme ba ka se sa tsoga ba bušitše ditšhaba tše dingwe. Ke tla ba nyenyefatša mo ba ka se sa kgonago go laola ditšhaba tše dingwe. ₁₆Baisraele ba ka se sa tsoga ba ikantše bona. Se se tlago hlagela naga ya Egepeta se tla gopotša Baisraele sebe sa go ikanya bona. Ke mo Baisraele ba tlago lemoga gore Morena ke nna.”

₁₇Ka letšatši la pele la kgwedi ya pele ya ngwaga wa masome a mabedi le metšo ye e šupago wa ge re le mathopša Morena a re go nna: ₁₈“Wena motho wa nama, Nebukadnesare, kgoši ya Babilonia, o hlasetše motse wa Tirose. O rwešitše bahlabani ba gagwe merwalo ye boima ba ba ba tšwa mafatla, ba kgoboga le magetla; eupša yena kgoši le bona bahlabani ba gagwe ga se ba boelwa ke selo ka go itshwenya moo ga bona. ₁₉Ka gona, nna, Morena, Mong wa bohle, ke re: Ke fa Nebukadnesare, kgoši ya Babilonia, naga ya Egepeta. O tla e hula, a e hlakola, a rwala mahumo a Egepeta ya ba tefo ya madira a gagwe. ₂₀Ke mo fa naga ya Egepeta e le moputso wa modiro wa gagwe, ka gobane madira a gagwe a be a šomela nna. Ke realo, nna, Morena, Mong wa bohle.

₂₁“Mohlang seo se direga ke tla maatlafatša setšhaba sa Israele, gomme ka dira gore tše ke go botšago tšona, wena Hesekiele, o ba botše tšona ka mafolofolo. Ke mo ba tlago lemoga ge nna ke le Morena.”

₁Morena a re go nna: ₂“Wena motho wa nama, porofeta o bege gore nna, Morena, Mong wa bohle, ke re gololang le re:

₅“Ntweng yeo ba Etopia, le ba Lidia, le ba Libia, le ba Arabia ka moka, le ba Kube, le ba naga ye ke dirilego kgwerano le yona ba tla bolawa ka tšhoša.”

₆Morena, Mong wa bohle, o re: “Go tloga Migdolo go fihla Asoane ba ba emago le Egepeta ba tla bolawa ka tšhoša. Madira a Egepeta a go ikgantšha a tla fedišwa. Ke realo, nna, Morena, Mong wa bohle. ₇Naga yeo e tla ba ye e ngadilwego go feta dinaga ka moka, gomme metse ya yona e tla šala e le marope go feta metse ka moka. ₈Mohla ke tšhuma Egepeta ka mollo gomme bašireletši ba yona ka moka ba bolawa, ke mo ba tlago lemoga gore Morena ke nna.

₉“Ge letšatši leo le fihla mme Egepeta e fedišwa, ke tla roma batseta ka maselawatle go yo tšhoša batho ba Etopia ba sa itebetše, gomme ba tla welwa ke masetlapelo. Tšatši leo le etla!”

₁₀Morena, Mong wa bohle, o re: “Ke tla swielela makoko a Egepeta ka Nebukadnesare, kgoši ya Babilonia. ₁₁Yena le setšhaba sa gagwe se sehlogo go feta ditšhaba tše dingwe ke tla ba romela go ripitla naga yeo. Ba tla hlasela badudi ba Egepeta ka ditšhoša, gomme ba tlatša naga ka ditopo. ₁₂Ke tla pšheša noka ya Naele gomme ka dira gore naga e bušwe ke badiratšempe. Bašele ba tla senya naga yohle. Ke realo, nna, Morena.”

₁₃Morena, Mong wa bohle, o re: “Ke tla pšhatlaganya medingwana, ka tloša le medimo ya diswantšho le ya maaka Memfise. Go ka se be le yo a bušago naga ya Egepeta, gomme ke tla tšhoša badudi ba gona. ₁₄Ke tla senya Egepeta ka borwa, gomme ka tšhuma motse wa Tsoane ka leboa. Ke tla otla badudi ba motse wa Tebetse. ₁₅Ke tla tšholla kgalefo ya ka godimo ga Pelusiomo, e lego wona motse wa sebo se segolo sa Egepeta. Ke tla fediša makoko a motse wa Tebetse. ₁₆Ke tla tšhuma Egepeta ka mollo, gomme badudi ba Pelusiomo ba tla menekana ka go kwa bohloko. Merako ya Tebetse e tla pšhatlwa, gomme motse wa kgangwa ke meetse. ₁₇Masogana a motse wa Heliopolise le wa Bubastise a tla bolawa ka tšhoša, gomme batho ba bangwe ba thopša. ₁₈Tagpanese mosegare go tla fifala ge ke fediša pušo ya Egepeta, ke fediša le madira a ba bego ba ikgantšha ka ona. Egepeta e tla khurumetšwa ke leru, gomme batho ba metse yohle ya gona ba tla thopša. ₁₉Mohla ke otla Egepeta ka mokgwa woo ba tla lemoga gore ke nna Morena.”

₂₀Ka tšatši la bošupa la kgwedi ya pele ya ngwaga wa lesome le motšo o tee wa ge re le mathopša Morena a re go nna: ₂₁“Wena motho wa nama, ke robile kgoši ya Egepeta letsogo. Ga go motho yo a mmofilego lona goba a mo fapilego lona ka thapo, gore le tle le fole mme le tiele go ka swara tšhoša gape. ₂₂Bjale ge, nna, Morena, Mong wa bohle, ke re: Ke lwa le kgoši ya Egepeta. Ke ya go mo roba matsogo ka mabedi – le le sa itekanetšego le le le robegilego – ka dira gore tšhoša e we seatleng sa gagwe. ₂₃Baegepeta ke tla ba šwalalanya le ditšhaba, ka ba gašanya le dinaga. ₂₄Ke moka ka tiiša kgoši ya Babilonia matsogo, ka mo swariša tšhoša ya ka. Kgoši ya Egepeta yona ke tla e roba matsogo, gomme e tla golola e le pele ga gagwe boka motho yo a gobaditšwego wa go hwa. ₂₅Ee, ke tla tiiša matsogo a kgoši ya Babilonia, a kgoši ya Egepeta ona ka a rephiša. Batho ba tla lemoga gore Morena ke nna ge ke neela kgoši ya Babilonia tšhoša ya ka, mme yena a šupa Egepeta ka yona. ₂₆Ke tla šwalalanya Baegepeta le ditšhaba, ka ba gašanya le dinaga. Ke mo ba tlago lemoga gore Morena ke nna.”